Дар шаҳри Газиантепи Туркия вохӯрии раиси вилояти Хатлон Қурбон Ҳакимзода ва гурӯҳи соҳибкорони вилояти Хатлон бо маъмурияти Минтақаи муташаккили саноатӣ (ММС)-и Газиантеп баргузор гардид.
Раиси вилояти Хатлон ва ҳайати ҳамроҳонашро ноиби президенти ММС-и Газиантеп Умар Ҷинҷикчи истиқбол гирифт.
Зимни мулоқот намояндаи Минтақаи муташаккили саноатии Газиантеп оид ба имрӯз ва дурнамои минтақа маълумот дод. Зикр шуд, ки дар Газиантеп 6 минтақаи муташаккили саноатӣ мавҷуд буда, дар масоҳати 4,5 ҳазор гектар доман афрохтааст.
Дар беш аз ҳазор ширкати истеҳсолие, ки дар ҳудуди ин минтақаҳои саноатӣ фаъолият доранд, 250 ҳазор нафар кор мекунанд.
Умар Ҷинҷикчи афзуд, ки феълан дар Минтақаи муташаккили саноатӣ то 30 ширкати хориҷӣ, аз ҷумла аз Сурия, Амороти Муттаҳидаи Араб, кишварҳои Балтик фаъолият доранд.
Раиси вилояти Хатлон Қурбон Ҳакимзода дар мулоқот бо масъулони ММС ва соҳибкорони Газиантеп қайд карданд, ки Ҷумҳурии Тоҷикистон бо Ҷумҳурии Туркия муносибатҳои гарму дӯстона дорад, ки дар асоси принсипҳои эҳтироми якдигар, эътимод, ҳамдигарфаҳмӣ ва ба назар гирифтани манфиатҳои тарафайн бунёд шудаанд.
Айни замон бештар аз 100 ширкати сармоягузории Ҷумҳурии Туркия дар Ҷумҳурии Тоҷикистон фаъолияти босамар доранд ва ҳаҷми сармоягузорӣ ҳамасола рӯ ба афзоиш аст.
- Тоҷикистон барои дастгирӣ ва ҷалби сармоя шароити муосид фароҳам овардаву минтақаҳои озоди иқтисодӣ ташкил намудааст, инчунин аз имтиёзҳои андозиву гумрукӣ низ онҳо бархӯрдоранд, - идома доданд раиси вилоят. - Мо барои тавсеаи ҳамкориҳои тиҷоратию иқтисодӣ захираю иқтидор ва имкониятҳои калон дорем ва Роҳбарони Тоҷикистону Туркия дар ин ҷода барои баланд бардоштани нишондиҳандаҳои ҳамкории байниминтақавӣ дар назди мо вазифагузорӣ намудаанд.
Қурбон Ҳакимзода ҳамчунин доир ба зарфиятҳои иқтисодии вилояти Хатлон ва самтҳои асосии сармоягузорӣ маълумот дода, гуфтанд, ки барои бунёди корхонаҳои муштарак ва тақвияти ҳамкориҳо дар вилоят захираҳои зиёди ашёи хом ва имконияту иқтидорҳои зарурӣ мавҷуд мебошад.
- Ташрифи мо ба Ҷумҳурии Туркия ба дарёфти ҳамкории судманд дар соҳаҳои комплекси агросаноатӣ, аз ҷумла растанипарварию чорводорӣ, коркарди гӯшту шир, меваю сабзавот, коркарди гиёҳҳои шифобахш ва истеҳсоли доруворӣ, тақвияти ҳунармандӣ ва инчунин ба роҳ мондани алоқаи мустақим байни корхонаҳои саноати сабук, аз ҷумла, ресандагӣ, бофандагӣ, рангубор ва дӯзандагӣ, пойафзолбарорию маҳсулот аз чарм, ташкил ва таъмини фаъолияти босамари минтақаҳои саноатии ба содиротнигаронидашуда бахшида шудааст, - зикр намуданд раиси вилоят.
Дар идомаи мулоқот миёни масъулони вилояти Хатлон ва Минтақаи муташаккили саноатии Газиантеп, инчунин доираҳои тиҷоратии ҳар ду ҷониб вобаста ба дастовардҳои соҳаи кишоварзӣ, рушди саноати сабук ва хӯрокворӣ, ҳунармандӣ, имкониятҳо барои роҳандозии ҳамкориҳои тиҷоратӣ, таъсиси корхонаҳои муштарак ва ҷалби сармояи туркӣ ба иқтисоди вилояти Хатлон саволу ҷавоб ва мубодилаи афкор сурат гирифт.
Дар интиҳои мулоқот раиси шаҳри Бохтар Сиҷоуддин Саломзода ва ноиби президенти Минтақаи муташаккили саноатии Газиантеп Умар Ҷинҷикчи санади ҳамкориро оид рушди равобити иқтисодию тиҷоратӣ, баррасии имконияти сармоягузорӣ ва таъсиси корхонаҳои муштараки саноати сабук ба имзо расониданд.
Ҳамчунин санади ҳамкорӣ миёни роҳбари Минтақаи озоди иқтисодии “Панҷ” Илҳом Камол ва ноиби президенти ММС-и Газиантеп Умар Ҷинҷикчи ба имзо расида, аз ҳайати музофоти Газиантеп, аз ҷумла ММС-и Газиантеп, даъват карда шуд, ки дар соли оянда ба Минтақаи озоди иқтисодии “Панҷ” ташриф биоранд.
Пас аз мулоқот бо роҳбарияти ММС-и Газиантеп гурӯҳи соҳибкорони вилояти Хатлон бо фаъолияти корхонаҳои истеҳсолию саноатии ин минтақа шинос шуданд.
Тибқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон, 11 сентябри соли ҷорӣ сафари ҳайати бонуфузи ҳукуматию тиҷоратии вилояти Хатлон, таҳти роҳбарии Раиси вилоят Қурбон Ҳакимзода ба Ҷумҳурии Туркия оғоз гардид.
Ҳадафи ин сафар ба роҳ мондани ҳамкориҳои судманд, густариш додани муносибатҳои тиҷоративу иқтисодӣ бо минтақаю шаҳрҳои Газиантеп, Қаҳраманмараш, Бурса ва Истанбул унвон шудааст.
Зимни сафари корӣ ҳайати вилояти Хатлон аз корхонаҳои саноатӣ, аз ҷумла корхонаву коргоҳҳои нассоҷӣ, қолинбофӣ, пойафзолдӯзӣ, истеҳсоли мебел, истеҳсоли маҳсулоти ғизоӣ ва коркарди ашёи хоми гуногун боздид ба амал оварда, таҷрибаи Туркияро дар самти ташкили минтақаҳои саноатӣ мавриди омӯзиш қарор медиҳад.
Дар назар аст, ки дар доираи сафари мазкур вохӯриҳо бо роҳбарияти минтақаҳои болозикр, инчунин дар шаҳрҳои Қаҳраманмараш ва Истанбул нишастҳои корӣ бо соҳибкорон ва дар шаҳрҳои Газиантеп ва Бурса “Бизнес Форуми байниминтақавии вилояти Хатлони Тоҷикистон ва минтақаҳои Туркия бо дарназардошти мулоқотҳои тиҷоратӣ дар шакли В2В байни ширкатҳои тоҷикию туркӣ ҷиҳати ба роҳ мондани ҳамкории мутақобилан судманд баргузор гардад.
Сафари ҳайати беш аз 60-нафараи вилояти Хатлон то 18 сентябр идома хоҳад кард. Сафорати Ҷумҳурии Тоҷикистон дар Туркия барои дар сатҳи матлуб иҷро шудани барномаи сафар мусоидат мекунад.
Қобили зикр аст, ки Президенти Ҷумҳурии Тоҷикистон муҳтарам Эмомалӣ Раҳмон пайваста таъкид ба он меварзанд, ки имконот ва шароити феълан фароҳамовардашудаи ҳамкорӣ бо Туркия бояд самаранок ва ба нафъи ҳарду ҷониб истифода гардад, то дар тамоми бахшҳои ҳамкорӣ нишондиҳандаҳои чашмраси рушд ба даст оянд.
Соли 2021 гардиши савдои хориҷии Ҷумҳурии Тоҷикистон бо Ҷумҳурии Туркия 390,5 млн. доллари Иёлоти Муттаҳидаи Амрикоро ташкил дод.
Маҷмуан, солҳои 2007-2021 ба соҳаҳои мухталифи иқтисодиёти Ҷумҳурии Тоҷикистон, алалхусус саноат, хизматрасонӣ ва савдо беш аз 221 млн. доллари ИМА (2%-и ҳаҷми умуми воридоти сармояи хориҷӣ) сармояи туркӣ, аз ҷумла 124 млн. доллари ИМА (2,2% аз ҳаҷми умуми воридоти сармояи мустақими хориҷӣ) сармояи мустақим ҷалб гардида, аз рӯи ин нишондодҳо Туркия мутаносибан дар мавқеи 14 ва 9 дар байни кишварҳои хориҷӣ ҷойгир шудааст.
Имрӯз, 12 сентябри соли ҷорӣ дар толори мақомоти иҷроияи ҳокимияти давлатии шаҳри Кӯлоб таҳти раёсати муовини якуми раиси шаҳри Кӯлоб Ташрифзода Мунаваршо ҷаласаи назоратӣ баргузор гардид.
Дар кори ҷаласа муовинони раиси шаҳр, роҳбари дастгоҳи раиси шаҳр, мудирони шуъбаву бахшҳои дастгоҳи раис ва мақомоти иҷроияи ҳокимияти давлатии шаҳр, намояндагони мақомотҳои ҳифзи ҳуқуқ, роҳбарони ташкилоту муассисаҳои таълимӣ ва тиббӣ, раисони ҷамоатҳо, имомхатибон ва дигар шахсони масъул ширкат доштанд.
Дар ҷаласаи мазкур оид ба рафти даъвати тирамоҳии ҷавонон ба сафи Қувваҳои Мусаллаҳи Ҷумҳурии Тоҷикистон, рафти корҳои омодагӣ дар иншоотҳои сохташаванда, рафти иҷрои нақшаи обуна ба рӯзномаҳои ҷумҳуриявӣ, вилоятӣ ва шаҳрӣ, иҷрои кишти тирамоҳӣ ва дигар масъалаҳо мавриди муҳокимаронӣ қарор дода шуд.
Аз рӯи масъалаи якум муовини раиси шаҳри Кӯлоб Ҳамидиён Орзу оид ба рафти даъвати тирамоҳии ҷавонон ба сафи Қувваҳои Мусаллаҳи Ҷумҳурии Тоҷикистон ба ҳозири ҳисобот пешниҳод намуд. Дар идомаи баррасии масъалаи мазкур изҳор гардид, ки тибқи нақшаи тасдиқгардида ҳар як масъулинро мебояд дар муҳлати кутоҳтарин дастуру супоришҳоро иҷро намоянд .
Тибқи рӯзномаи маҷлис мудири шуъбаи меъморӣ ва шаҳрсозии мақомоти иҷроияи ҳокимияти давлатии шаҳри Кӯлоб Аҳмадзода Қурбон оид ба рафти иншоотҳои сохташаванда дар шаҳру деҳоти Кӯлоб ва муовини раиси шаҳри Кӯлоб Даминзода Арафамо оид ба рафти иҷрои нақшаи обуна ба рӯзномаҳои ҷумҳуриявӣ, вилоятӣ ва маҳаллӣ муфассал ҳисобот доданд.
Ҳамчунин дар кори ҷаласа масъалаҳо оид ба иҷроиши пардохти андоз, сари вақт пешниҳод намудани ҳисоботҳои оморӣ аз ҷониби масъулон, тоза ва озода намудани гирду атрофи ташкилоту муассисаҳо, оид ба рафти кишти зироатҳои кишоварзӣ ва дигар масъалаҳо мавриди баррасӣ қарор дода шуд.
Зикр гардид, ки дар доираи дастуру супоришҳои бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳар яки моро мебояд, ки корбариро дар самтҳои рушди иқтисодию иҷтимоии хоҷагии халқ боз ҳам беҳтару хубтар ба роҳ монда то дар рушду пешрафти шаҳри азизамон ҳиссагузор бошем.
Бахши матбуотии МИҲД-и шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
