Имрӯз вохӯрии Судяи Суди конститутсионии Ҷумҳурии Тоҷикистон Қувватзода Фотеҳ Ҷумъа бо ҳайати профессорону омӯзгорон ва донишҷӯёни Донишгоҳи давлатии Кӯлоб ба номи Абуабдуллоҳи Рӯдакӣ оид ба самтҳои афзалиятноки Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон баргузор гардид.
Дар вохӯрӣ ректори Донишгоҳ доктори илмҳои ҳуқуқшиносӣ, профессор Раҳмон Дилшод Сафарбек, ноибони ректор, садорати факултетҳо ва донишҷӯён иштирок доштанд.
Нахуст профессор Раҳмон Дилшод Сафарбек суханронӣ намуда, меҳмононро хайрамақдам гуфтанд.
Сипас, Қувватзода Фотеҳ Ҷумъа суханронӣ намуда, оид ба нуктаҳои муҳими Паём андешаҳои худро баён намуданд. Зикр карданд, ки дастовардҳои замони соҳибистиқлолӣ бештару беҳтар аз 70 соли замони Шӯравӣ мебошанд.
Ӯ афзуд: "Хизматҳои Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмонро бояд бидонем. Ба қадри озодӣ ва ободии ватан бояд расид. Ҷавононро аз шомилшавӣ ба гурӯҳҳои ифротгаро боздорем. Истиқлол на ба ҳар кас муяссар мешавад."
Дар қисмати охир оид ба Паём фикру назарҳои нишастагон шунида шуд.
Имрӯз, 7-уми феврали соли равон дар толори мақомоти иҷроияи ҳокимияти давлатии шаҳри Кӯлоб, нишасти матбуотии раиси шаҳр Назарзода Бахтиёр Худоёр бо иштироки васеи намояндагони воситаҳои ахбори омма доир шуд.
Сараввал, раиси шаҳри Кӯлоб барои ҳамкории мутақобилан судманд бо мақомоти иҷроияи ҳокимияти давлатии шаҳри Кӯлоб, дастгирии сиёсати давлатӣ, тарғибу ташвиқи арзишҳои миллию давлатдорӣ ва муаррифии дастовардҳои иҷтимоию иқтисодии шаҳр дар соли 2022 ба кулли рӯзноманигорон изҳори сипосу миннатдорӣ баён кард.
Зимни баромади худ раиси шаҳри Кӯлоб Назарзода Бахтиёр Худоёр дар назди намояндагони ВАО доир ба муҳимтарин нишондиҳандаҳои рушди иқтисодиву ичтимоии шаҳр дар соли 2022 ба иштирокчиёни нишасти матбуотӣ муффас баромад намуд.
Аз ҷумла, қайд гардид, ки соли 2022 барои сокинони шаҳру деҳоти Кӯлоб соли таърихӣ ва хотирмон буд. Бахусус сафари кории Асосгузори сулҳу ваҳдати миллӣ- Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ба шаҳри Кӯлоб ва дар рафти он ба истифода супоридани як қатор иншоотҳо, аз ҷумла биноҳои Коллеҷи технологияи инноватсионию иттилоотӣ-коммуникатсионӣ, филиали муассисаи давлатии “Ташаккул ва рушди соҳибкорӣ”, муассисаи таълимии №47, коргоҳи истеҳсоли гӯшти мурғ, бинои Кумитаи идораи замини шаҳр, бинои баландошёна, ки ҳангоми ифтитоҳи бино ба сад нафар ятимони кул аз ҷониби муҳтарам Пешвои миллат зиёфат ва ба ҳамаи онҳо туҳфаҳои арзишманд дода шуд, ки барои мардуми шаҳри Кӯлоб хотирмон буд. Аз ин ғамхории навбатии муҳтарам Ҷаноби Олӣ ятимон хело ҳам миннатдор шуданд. Ҳамчунин бо роҳбарони ташкилоту муассисаҳо ва собиқадорони меҳнат вохӯрӣ доир гардид, ки ба сокинон руҳу илҳоми тоза бахшид. Қобили қайд аст, ки 14-уми декабри соли ҷорӣ Маҷмаи Умумии Созмони Милали Муттаҳид дар бораи «Соли байналмилалии ҳифзи пиряхҳо» эълон кардани соли 2025 ва 21-уми март ҳамчун «Рӯзи ҷаҳонии пиряхҳо», ки аз ҷониби Тоҷикистон пешниҳод шуда буд, якдилона қарор қабул кард. Мувофиқи ин қатънома дар чаҳорчӯби Созмони Милали Муттаҳид Фонди мақсадноки байналмилалӣ оид ба масъалаҳои ҳифзи пиряхҳо таъсис ёфта, вобаста ба ин мавзӯъ соли 2025 дар шаҳри Душанбе конфронси сатҳи баланди Созмони Милали Муттаҳид баргузор мегардад. Боиси ифтихор ва сарфарозии ҳамаи сокинони Тоҷикистон, бахусус шаҳру деҳоти Кӯлоб аст, ки панҷумин ибтикори ҷаҳонии кишвари мо оид ба масъалаҳои об ва иқлим дар миқёси сайёра амалӣ хоҳад шуд.
Мақомоти иҷроияи ҳокимияти давлатии шаҳри Кӯлоб Конститутсияи Ҷумҳурии Тоҷикистон, Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ”, Паёмҳои Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, қарорҳои Ҳукумати Ҷумҳурии Тоҷикистону раиси вилояти Хатлон ва дигар санадҳои меъёрӣ-ҳуқуқиро ба роҳбарӣ гирифта, дар соли 2022 ҷиҳати пешбурди иқтисодиёту иҷтимоиёт корҳои муайянро ба сомон расонид.
Дар соли 2022 нақшаи андозҳои давлатии шаҳри Кӯлоб 116,0 фоиз иҷро ва ба буҷет 127,3 млн. сомонӣ ворид карда шуд, ки нисбати нақша 17,7 млн. сомонӣ зиёд мебошад. Нақшаи андозҳо якҷоя бо андози иҷтимоии ғайрибуҷетӣ 113,2 фоиз таъмин гардида, ба буҷет ба ҷойи 140 млн. 691 ҳазор сомонӣ, 158 млн. 960 ҳазор сомонӣ ворид карда шуд, ки ин нишондиҳанда аз нақша 18 млн.268 ҳазор сомонӣ зиёд аст.
Гуфта шуд, ки бо назардошти эълон гардидани солҳои 2022-2026 “Солҳои рушди саноат” ва амалӣ намудани ҳадафи чоруми миллӣ- саноатикунонии бо суръати мамлакат соли 2022 тибқи қарори раиси шаҳр “Соли рушди саноат ва роҳҳои обод” эълон, нақшаи чорабиниҳо таҳия ва дар соли 2022 дар ин самт чораҳои дахлдор амалӣ карда шуданд.
Дар натиҷаи чораҳои амалигардида ба 01 январи соли 2023- 7 корхонаи саноатӣ, аз ҷумла ҶДММ “Махсус” ва ҶДММ “Мелиоратор”- корхонаҳои коркарди сангу шағал, ҶДММ “Мадазим”- корхонаи истеҳсоли маҳсулот аз филизот, ҶДММ “Оби навруша”- истеҳсоли сафолаку хишти сементӣ, ҶДММ “Марямбибӣ”- истеҳсоли хишти сементӣ, ҶДММ “Истеҳсоли гушти мурғи Кӯлоб” ва ҶДММ “Тоҷик Алмос” - истеҳсоли филтрҳои равғанӣ ва ҳавоӣ барои автомошинаҳо ба истифода супорида шуда, дар ин замина 73 ҷойҳои нави корӣ таъсис ёфтанд. Ҳамчунин дар ҶДММ “Комбинати хонасозӣ”-и шаҳри Кӯлоб 3 коргоҳҳои нав, аз ҷумла истеҳсоли сафолак, хишти сабук ва сангҳои ороишӣ, дар ҶДММ “Сувайба-2014” коргоҳи парвариши мурғи гуштӣ, дар ҶДММ “Хуршед-Н” коргоҳи истеҳсоли сангу шағал ҳамагӣ бо таъсиси 40 ҷойҳои нави корӣ ба истифода супорида шуданд ва дар маҷмуъ дар соҳаи саноат 113 ҷойи нави корӣ таъсис ёфт.
Иттилоъ дода шуд, ки дар соли сипаригашта ҳаҷми умумии истеҳсоли маҳсулоти кишоварзӣ дар ҳамаи бахшҳои хоҷагидорӣ 810,0 млн. сомонӣ расонида шуд, ки нисбат ба соли гузашта 32,1 млн. сомонӣ зиёд буда, суръати афзоиш 104,1 фоизро ташкил дод.
Яке аз соҳаи афзалиятноки иҷтимоӣ маориф ба ҳисоб меравад. Барои фаъолияти самаранок ба соҳаи маориф дар соли 2022- 94,9 млн. сомонӣ, аз маблағҳои қисми хароҷоти буҷети маҳаллӣ равона гардид.
Дар шаҳру деҳоти Кӯлоб 77 муассисаи таълимию тарбиявӣ, аз ҷумла 52 муассисаи таҳсилоти миёнаи умумӣ, 1 муассисаи таҳсилоти умумии асосӣ, 4 литсей, мактаби Президентӣ барои хонандагони болаёқат, 2 мактаб-интернат, марказҳои таҳсилоти иловагӣ, дарёфт ва рушди истеъдодҳо, технологияи информатсионӣ ва коммуникатсионӣ, фароғатгоҳи «Шарора», 13 муассисаи таҳсилоти томактабӣ (аз ҷумла 4 муассисаи таҳсилоти хусусии томактабии «Меҳрона», «Миҷгона», «Сабрина» ва «Ягона») фаъолият доранд
Дар соли 2022 ба соҳаи тандурустӣ 44,8 миллион сомонӣ равона гардид, ки 23,6 фоизи қисми хароҷотии буҷети маҳаллиро ташкил медиҳад.Дар шаҳру деҳоти Кӯлоб 72 адад муассисаҳои тандурустӣ, аз ин 5 муассиса ба бахши госпиталӣ ва 67 адади дигар ба бахши кӯмаки аввалияи тиббию санитарӣ рост меояд. Аз 72 адад муассисаҳои тиббӣ 15 адад дар ҳудуди шаҳр ва 57 адад, аз ҷумла маркази саломатии ноҳиявӣ, 14 адад марказҳои саломатии деҳотӣ ва 41 адад бунгоҳҳои тиббӣ дар ҷамоатҳои деҳот ҷойгир мебошанд.
Дар нишасти матбуотӣ намояндаи телевизиони “Сафина” дар минтақаи Кӯлоб, намояндаи нашрияи расмии Ҷумҳурии Тоҷикистон “Ҷумҳурият”, Намояндаи телевизони “Точикистон” намояндаи нашрияи "Пайк", намояндаи телевизиони "Синамо" ва чанде аз дигарон ба суолҳои худ оид ба масъалаҳои мухталифи иҷтимоию иқтисодӣ, кишоварзию рушди саноат посухи мушаххас гирифтанд.
Дар охир раиси шаҳри Кӯлоб Назарзода Бахтиёр изҳор дошт, ки сокинони фарҳангдӯсти шаҳр бо ҷонибдорӣ аз сиёсати пешгирифтаи Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмонро баҳри иҷрои ҳадафҳои пешгирифта дар самти корҳои ободонию созандагии диёри биҳиштоосоямон содиқона саъю талош хоҳанд варзид.
Бахши матбуотии МИҲД-и шаҳри Кӯлоб
Имрӯз, 6 феврали соли 2023 дар толори мақомоти иҷроияи ҳокимияти давлатии шаҳри Кӯлоб ҷаласаи назоратии назди раиси шаҳри Кӯлоб Назарзода Бахтиёр Худоёр баргузор гардид.
Дар ҷаласаи мазкур муовини якум ва муовинон, мудирони шуъбаву бахшҳои дастгоҳ ва мақомоти иҷроияи ҳокимияти давлатӣ, роҳбарони мақомотҳои ҳифзи ҳуқуқ, сардорони раёсатҳо, роҳбарони ташкилоту муассисаҳо, раисони ҷамоатҳо, масъулони муассисаҳои таълимию тиббии шаҳр, имомхатибон ва намояндагони васоити ахбори омма иштирко доштанд.
Дар оғози ҷаласа раиси шаҳри Кӯлоб Назарзода Бахтиёр Худоёр ҷиҳати дар амал татбиқ намудани дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон ки дар Паёми навбатӣ ба Маҷлиси Олии Ҷумҳурии Тоҷикистон ва таъкиду супоришҳои дигаре, ки дар Маҷлиси васеи Ҳукумати Ҷумҳурии Тоҷикистон ба масъулин дода шуда буд суханронӣ намуданд. вобаста ба ин масъала ба шахсони масъул супоришҳои дахлдор дода шуд.
Дар идомаи ҷаласаи назоратии назди раиси шаҳри Кӯлоб ректори Донишгоҳи давлатии Кӯлоб ба номи Абӯабдуллоҳи Рӯдакӣ Раҳмон Дилшод Сафарбек доир ба нуқтаҳои асосии Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 23 декабри соли 2022 бармеояд назару андешаи худро бо факту далелҳо ва таҳлилҳои амиқу дақиқ ба аҳли толор изҳор доштанд.
Ҳамчунин дар идомаи ҷаласа намояндаи шӯъбаи Агентии назоратии давлатии молиявӣ ва мубориза бо корупсияи Ҷумҳурии Тоҷикистон дар шаҳру ноҳияҳои минтақаи Кӯлоб оид ба нуқтаҳои муҳими Паёми Президенти Ҷумҳурии Тоҷикистон суханронӣ намуд.
Ҳамчунин, дар идома мудири бахши иҷтимоӣ ва робита бо ҷомеаи дастгоҳи раиси шаҳри Кӯлоб Ғаффорзода Давлатҷон бобати қарорҳои раиси шаҳри Кӯлоб дар бораи озмунҳои ҷумҳуриявӣ аз ҷумла “Фурӯғи субҳи доноӣ китоб аст”, Тоҷикистон-Ватани азизи ман, “Илм фурӯғи маърифат” ва “Тоҷикон-оинаи таърихи миллат” ба саҳми ҳамагон расонид.
Муовини раиси шаҳри Кӯлоб Ҳамидиён Орзу вобаста ба омодагӣ ба даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон дар назди раиси шаҳр муфассал ҳисобот дод.
Зимни баррасӣ ва муҳокимаронии масъалаи мазкур раиси шаҳри Кӯлоб Назарзода Бахтиёр Худоёр ба масъулини мақомоти иҷроияи ҳокимияти давлатии шаҳри Кӯлоб ва дигар сохторҳои марбута ҷиҳати саривақт иҷро намудани нақшаи даъвати баҳории ҷавонон ба сафи Қувваҳои мусаллаҳи Ҷумҳурии Тоҷикистон дастуру супоришҳои мушаххас доданд.
Дар охир, роҳбарияти шаҳри Кӯлоб ҷиҳати вусъат бахшидан ба корҳои ободониву созандагӣ, таъмини иҷрои дурнамои кишти маҳсулоти кишоварзӣ, самаранок истифода бурдани ҳар як ваҷаб замин, бо оби нушокӣ наъмин намудани аҳолие, ки аз об танқисӣ мекашанд, баланд бардоштани савияи дониши хонандагон ва дуруст ба роҳ мондани таълиму тарбия дар муассисаҳои таълимӣ, иҷрои нақшаи андоз ва пардохт намудани бақияпулиҳои он, саривақт пардохт намудани маоши кормандони соҳаҳои буҷетӣ, назорат аз рафти амаликунии лоиҳаҳои сармоягузорӣ, шинонидани дарахтон ва гулу буттаҳо дар назди ҳамаи ташкилоту муассисаҳо ва дигар масъалаҳо ба масъулин дастуру супоришҳои мушаххас доданд.
Бахши матбуотии МИҲД шаҳри Кӯлоб
Имрӯз, 4 феврали соли 2023 ҷиҳати иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баррасии муроҷиатҳои саривақтии сокинон ва дар амал татбиқ намудани Қонуни Ҷумҳурии Тоҷикистон дар бораи муроҷиати шаҳрвандон дар мақомоти иҷроияи ҳокимияти давлатии шаҳри Кӯлоб ҳар ҳафта рӯзҳои шанбе аз ҷониби Раиси шаҳри Кӯлоб Назарзода Бахтиёр Худоёр қабули шаҳрвандон ба роҳ монда мешавад.
Дар рафти қабули шаҳрвандон аз ҷониби роҳбарияти шаҳр зиёда аз 50 нафар сокинон аз ҷамоату деҳоти шаҳри Кӯлоб бо масъалаҳои мухталиф, аз ҷумла, ҷудо кардани қитъаи замини наздиҳавлигӣ, расонидани кӯмаки моддиву молиявӣ, мусоидат барои гирифтани табобат, таъмири роҳҳо ва амсоли инҳо пазируфта шуданд.
Бояд қайд намоем, ки зимни қабули шаҳрвандон ҳамаи муроҷиаткунандагон миннатдории хешро ба Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси шаҳри Кӯлоб Назарзода Бахтиёр Худоёр ҷиҳати дастгириҳои пайваста баён намуданд.
Раиси шаҳр пас аз шунидани муроҷиатҳои сокинон ба масъулини сохторҳои шаҳрӣ барои баррасӣ ва ҳалли масъалаҳои матраҳшуда супоришҳои мушаххас доданд.
Бахши матбуотии МИҲД-и шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
