Санаи 10 октябри соли 2022 дар толори Мақомоти иҷроияи ҳокимияти давлатии шаҳри Кӯлоб ҷаласаи ҷамъбастии натиҷаҳои рушди иҷтимоию иқтисодии шаҳри Кӯлоб дар нуҳ моҳи соли 2022 бо иштироки намояндаи Ҳукумати мамлакат ва Дастгоҳи иҷроияи Президенти Ҷумҳурии Тоҷикистон, Вазири нақлиёти Ҷумҳурии Тоҷикистон, роҳбари гуруҳи корӣ дар шаҳри Кӯлоб Азим Иброҳим, раиси шаҳри Кӯлоб Назарзода Бахтиёр Худоёр, Қурбонзода Амирхон, муовини раиси вилояти Хатлон баргузор гардид.
Ҳамчунин дар чаласаи ҷамъбастии мазкур муовини якум, муовинони раиси шаҳр, роҳбари дастгоҳи раиси шаҳр, мудирони шуъбаву бахшҳои дастгоҳи раис ва мақомоти иҷроияи ҳокимияти давлатии шаҳр, намояндагони мақомотҳои ҳифзи ҳуқуқ, роҳбарони муассисаҳои таълимиву тиббӣ,
сардорони қитъаҳои истифодабарии манзилии шаҳр, раисони ҷамоатҳо, роҳбарони хоҷагиҳои деҳқонӣ, имомхатибони масҷидҳои ҷомеъ, намояндагони васоити ахбори омма ва дигар шахсони масъул иштирок доштанд.
Нахуст, раиси шаҳри Кӯлоб Назарзода Бахтиёр Худоёр дар ҷаласаи ҷамбастӣ суханронӣ намуда, изҳор дошт, ки дар давраи сипаригашта сокинони шаҳри Кӯлоб бо мақсади дар амал татбиқ намудани дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Мақомоти иҷроияи ҳокимияти давлатии вилояти Хатлон баҳри расидан ба нишондиҳандаҳои назаррасу арзандаи меҳнатӣ аз ҳама имкониятҳо истифода бурда, дар фаъолияти кориашон ба тақвияти корҳои созандагиву бунёдкории шаҳр саҳми хешро гузошта истодаанд.
Сипас, дар маҷлиси васеи фаъолони шаҳри Кӯлоб муовини якуми раиси шаҳр Ташрифзода Мунаваршо оид ба ҷамъбасти натиҷаҳои рушди иҷтимоию иқтисодии шаҳри Кӯлоб дар нуҳ моҳи соли 2022 ва вазифаҳо барои минбаъда ҳисобот пешниҳод намуд. Зимни баромад қайд гардид, ки дар нуҳ моҳи соли равон мақомоти иҷроияи ҳокимияти давлатии шаҳри Кӯлоб дар асоси Конститутсияи Ҷумҳурии Тоҷикистон, Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” фаъолият намуда, Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон (21 декабри соли 2021), дастуру супоришҳое, ки дар Маҷлиси Ҳукумати Ҷумҳурии Тоҷикистон аз 24 январи соли 2022 “Дар бораи натиҷаҳои рушди иҷтимоию иқтисодии Ҷумҳурии Тоҷикистон дар соли 2021 ва вазифаҳо барои соли 2022” ва вазифаву супоришҳое, ки аз машварати кории Президенти Ҷумҳурии Тоҷикистон муҳтарам Эмомалӣ Раҳмон бо фаъолони вилояти Хатлон 24 феврал ва 18 июни соли 2022 бармеоянд, ба роҳбарӣ гирифта, дар нуҳ моҳи соли 2022 ҷиҳати пешбурди иқтисодиёту иҷтимоиёт корҳои муайянро ба сомон расонида, ба нишондодҳои назаррасу мусбӣ ноил гардидааст.
Дар идомаи кори ҷаласа Раҳимзода Назирмад, сардори нозироти андози шаҳр, Хуҷамқуллов Абдураззоқ, мудири бахши саноат, энергетика ва нақлиёту комуникатсияи мақомоти иҷроияи ҳокимияти давлатии шаҳри Кӯлоб, Ҳамоҳангсози соҳаи тандурустӣ, Абураҳмонов Бобохон оид ба фаъолияти корӣ дар нуҳ моҳи соли равон ҳисобот пешниҳод намуданд.
Зимни баррасии масъалаи ҷамъбастии натиҷаҳои рушди иҷтимоию иқтисодии шаҳри Кӯлоб дар нуҳ моҳаи соли 2022 ҷиҳати пурра таъмин намудани дурнамои кишти зироатҳои кишоварзӣ, самаранок истифода бурдани қитъаҳои замини наздиҳавалигӣ, аз ҷумла кишти пахта, иҷрои саривақтии нақшаи андоз ва кам кардани бақияпулиҳои андоз, баҳри рушди соҳаи саноат ва фароҳам овардани ҷойҳои нави корӣ, дуруст ба роҳ мондани корхонаҳои саноатӣ, бунёди корхонаҳои саноатӣ, ба кор андохтани корхонаҳои бозистода, ҷалби мутахассисони ҷавони соҳаҳои маорифу тандурустӣ ба кор, иҷрои нақшаи даъвати ҷавонон ба Сафи Қувваҳои Мусаллаҳи Ҷумҳурии Тоҷикистон, иҷрои нақшаи обуна ба рӯзномаҳои шаҳрӣ, вилоятӣ ва ҷумҳуриявӣ барои соли 2023 ва дигар масъалаҳо мавриди муҳокимронӣ қарор дода шуда дар ин бобат ба масъулин дастуру супоришҳои мушаххас дода шуданд.
Бахши матбуотии МИҲД-и шаҳри Кӯлоб
Боиси ифтихор ва сарфарозӣ аст, ки бо Қарори Ҳукумати Ҷумҳурии Тоҷикистон ва сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамасола 10-уми октябр дар кишварамон “Рӯзи фалак” бо шукуҳу шаҳомати хоса таҷлил карда мешавад.
Ба ин муносибат санаи 8 октябри соли равон дар Қасри фарҳанги ба номи Рустами Абдураҳими шаҳри Кӯлоб чорабинии ҷашнӣ баргузор гардид.
Чорабинии мазкур бо иштироки муовини раиси шаҳри Кӯлоб Даминзода Арафамо, шоирону адибон, омӯзгорони муассисаҳои таълимӣ ва хонандагону донишҷӯёни донишгоҳу колеҷу муассисаҳои таълимии шаҳр доир гардид.
Нахуст, меҳмонон аз намоиши ҳунарҳои мардумии шаҳр Кӯлоб аз қабили гулдӯзию чакандӯзӣ, қуроқдӯзӣ, чӯбтарошиву кандакорӣ ва дигар навъҳои ҳунарии мардумӣ дидан намуда, ба ҳунари волои онҳо баҳои баланд доданд..
Дар маросими тантанавӣ бахшида ба Рӯзи Фалак муовини раиси шаҳри Кӯлоб суханронӣ намуда, табрикоти роҳбарияти шаҳри Кӯлоб Назарзода Бахтиёр Худоёрро ба саҳми ҳозирин расонид.
Қайд намуд, ки барои мо мардуми Тоҷикистони соҳибистиқлол, хусусан сокинони шаҳри Кӯлоб мояи ифтихор ва сарфарозист, ки бо эъҷози баланди ҳунар тули асрҳо дар рушди фарҳанги миллӣ ва умумиҷаҳонӣ саҳми арзанда гузошта истодаем. Тавре ки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иброз доштаанд: “Ватани Чакан ва ватани Фалак шаҳри Кӯлоб аст”.
Фалак жанри озод буда, дар шаҳри Кӯлоб ҳамеша дар такомул ва таҳаввули инкишоф аст. Чуноне, ки медонем Ҳукумати ҷумҳурӣ бахусус Роҳбарияти Олии мамалакат муҳтарам Эмомалӣ Раҳмон ба рушду нумӯи жанри мусиқии Фалак пайваста таваҷҷуҳ зоҳир менамояд. Бо ташаббуси Пешвои миллат 16 ноябри соли 2001 ба ансамбли “Фалак” мақоми давлатӣ дода шуд. Маҳз чунин ташаббусҳои созанда боис гардид, ки минбаъд Фалак аз ҷониби ЮНЕСКО ҳамчун мероси фарҳанги умумибашарӣ эътироф гардад.
Ҳамчунин дар вазъияти тантанвӣ ба як қатор ҳунармандони шаҳри Кӯлоб барои хизматҳои назаррас, ноил гардидан ба дастовардҳои пурсамари меҳнатӣ, саҳми арзанда гузоштан дар рушди соҳаи фарҳанг Сипосномаи раиси шаҳри Кӯлоб тақдим карда шуд.
Чорабинии фарҳангӣ аз тамошои наворҳои видиоӣ аз ҷараёни қабулшавии жанри Фалак дар Юнеско оғоз гардид.
Дар идомаи ин чорабинии бошукӯҳ барномаи омоданамудаи фалаксароёни шаҳри бостонии Кӯлоб пешниҳоди иштирокчиён гардид.
Бахши матбуотии МИҲД-и шаҳри Кӯлоб
Имрӯз, 5 октябри соли равон дар толори маҷлисгоҳи донишгоҳи давлатии Кӯлоб ба номи Абӯабдуллоҳи Рӯдакӣ бахшида ба таҷлили Рӯзи забони тоҷикиӣ ҷамъомади тантанвӣ баргузор гардид.
Дар ҷамъомади мазкур раиси шаҳри Кӯлоб Назарзода Бахтиёр Худоёр, сардори Раёсати Вазорати корҳои дохилӣ дар вилояти Хатлон Нозимзода Файзулло Ватан, роҳбарони мақомотҳои ҳифзи ҳуқуқ, зиёиён, гуруҳи фаъоли “Авангард”, гуруҳи захиравии шаҳри Кӯлоб ва дигар шахсони масъул иштирок доштанд.
Баъд аз садо додани суруди миллии Ҷумҳурии Тоҷикистон ҷамъомад оғоз гардида, сардори Раёсати Вазорати корҳои дохилӣ дар вилояти Хатлон, полковники милитсия Нозимзода Файзулло Ватан вобаста ба аҳамияти забони давлатӣ, ташаббусҳои созандаву бунёдкоронаи Асосгузори сулҳу ваҳдати миллӣ, Пешвои миллат, Президенти Ҷумуҳурии Тоҷикистон муҳтарам Эмомалӣ Раҳмон дар самти баланд бардоштани мақоми забони давлатӣ ибрози андеша намуд.
Ҳамчуни раиси шаҳри Кӯлоб Назарзода Бахтиёр Худоёр суханронӣ намуда, тамоми мардуми Кӯлобшаҳри бостониро ба муносибати Рӯзи забони давлатии Ҷумҳурии Тоҷикистон табрик намуд. Зикр гардид, ки бо туфайли сиёсати хирадмандона ва дастгириҳои доимии Роҳбарияти Олии мамлакат, Ҷаноби Олӣ дар замони соҳибистиқлолӣ, забони давлатӣ ба марҳилаи тозаи рушд ва таҳаввул ворид гардид. Пеш аз ҳама дар ин давра ба сифати як унсури миллатсоз ҳусну қубҳи худро дигар ва дар ҷомеа мавқеи худро устувор намуд. Пешвои муаззами миллат забони тоҷикиро барои худ чунин мешуморад: “Забони тоҷикӣ натанҳо воситаи гуфтугую муошират, балки болотар аз он, шиносномаи миллати азизам, руҳи поки гузаштагонамон ва оинаи осори ниёгонамон мебошад».
Ин гуфтаҳо далели онанд, ки забони давлатӣ зери пуштибонии бевоситаи Пешвои миллат ва давлату ҳукумати Тоҷикистон қарор дорад.
Дар идомаи ҷамъомади мазкур Давлатзода Раҳмон Қодир сардори қисми минтақавии РВКД ҶТ оид дар минтақаи Кӯлоб, ректори донишгоҳи давлатии Кӯлоб ба номи Абӯабдуллоҳи Рӯдакӣ Раҳмонзода Дилшод ва дигар зиёиён оид ба нақши забони давлатии тоҷикӣ дар замони соҳибистиқлолӣ андешаронӣ намуданд.
Дар охир ба як зумра фаъолони шаҳру минтақаи Кӯлоб Сипоснома ва туҳфаҳои хотиравӣ тақдим карда шуд.
Бахши матбуотии Миҳд-и шаҳри Кӯлоб
Имрӯз 5 октябри соли равон дар Қасри фарҳанги ба номи Рустами Абдураҳими шаҳри Кӯлоб бахшида рӯзи забони давлатӣ ва омӯзгорон бо иштироки раиси шаҳри Кӯлоб Назарзода Бахтиёр Худоёр, доираи васеъи омӯзгорони муассисаҳои таълимӣ, фаъолон, собиқадорон, роҳбарони ташкилоту муассисаҳо ва хонандагону донишҷӯёни донишгоҳу колеҷу муассисаҳои таълимии шаҳр чорабинии идона баргузор гардид.
Пеш аз оғози чорабинӣ роҳбарияти шаҳри Кӯлоб ва дигар меҳмонон аз намоиши дастовардҳои илмии таълимгирандагони муассисаҳои миёна ва олии касбӣ дидан намуда, ба истеъдоди волоии онҳо баҳои баланд доданд.
Дар ин чорабинии бошукӯҳ нахуст раиси шаҳри Кӯлоб муҳтарам Назарзода Бахтиёр Худоёр суханронӣ намуда, ҳамагонро ба ин муносибат табрику таҳният гуфт. Изҳор доштанд, ки нақш ва ҷойгоҳи Пешвои муаззами миллат дар баланд бардоштану бартарӣ додани рукнҳои давлатӣ, бахусус забон ниҳоят бузург аст. Зеро ба туфайли сиёсати хирадмандона ва дастгириҳои доимии Ҷаноби Олӣ дар замони соҳибистиқлолӣ, забони давлатӣ ба марҳилаи тозаи рушд ва таҳаввул ворид гардид. Пеш аз ҳама дар ин давра ба сифати як унсури миллатсоз ҳусну қубҳи худро дигар ва дар ҷомеа мавқеи худро устувор намуд.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар яке аз суханрониҳои худ бахшида ба муносибати Рӯзи забони давлатии Тоҷикистон таъкид карданд, ки «Забон неъмати бебаҳои зиндагии аҳли башар мебошад. Инсон фақат тавассути забон метавонад эҳсос ва фикру андешаҳои худро иброз намояд.
Забони миллӣ оинаи пурҷиллои таърих, ҷаҳони маънавӣ ва хираду маърифати ҳар як халқу миллат ба шумор меравад».
Дар идомаи чорабинӣ устоди Донишгоҳи давлатии Кӯлоб ба номи Абӯабдуллоҳи Рӯдакӣ, ховаршинос, Зафар Мирзоён баромад намуда, қайд кард, ки тайи ҳазорсолаҳо шоирону муттафакирон, олимону донишмандони гузаштаи мо, аз ҷумла Рӯдакиву Ибни Сино, Фирдавсиву Дақикӣ, Саъдиву Ҳофиз ва Ҳилоливу Бедил бо ин забони нобу беолоиш асарҳо эҷод кардаанд, ки боиси ифтихор ва сарбаландӣ мебошанд.
Дар идомаи чорабинӣ бахшида ба рӯзи забони давлатӣ ба як зумра кормандони соҳаи маорифи шаҳри Кӯлоб бо Сипосномаҳои раиси шаҳри Кӯлоб қадрдонӣ карда шуданд.
Дар охир барномаи омоданамудаи ҳунармандони шаҳри бостонии Кӯлоб, ки тараннумгари ватандустиву хештаншиносӣ буд пешкаши ҳозирин гардонида шуд.
Бахши матбуотии МИҲД-и шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
