Дар доираи сафари кории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳри Кӯлоб аз тарафи намояндагони Ҳукумати Ҷумҳурии Тоҷикистон ва намояндагони Мақомоти иҷроияи ҳокимияти давлатии вилояти Хатлон ва шаҳри Кӯлоб бахшида ба таҷлили ҷашни 35 - солагии Истиқлолияти давлатии Ҷумҳурии Тоҷикистон як қатор иншооти таъиноташон гуногун мавриди истифодабарӣ қарор дода шуд.

Аз ҷумла, бо иштироки вазири нақлиёти Ҷумҳурии Тоҷикистон Азим Иброҳим, раиси вилояти Хатлон Қурбон Ҳакимзода ва раиси шаҳри Кӯлоб Бахтиёр Назарзода Маркази хизматрасонӣ, воқеъ дар кӯчаи Чармгарони Поён мавриди баҳрабардорӣ қарор дода шуд.

Сохтмони маркази хизматрасонӣ, воқеъ дар кӯчаи Чармгарони поён соли 2022 оғоз гардида, иншоот аз 3 ошёна иборат мебошад. Соҳибмулки иншооти мазкур Сафаров Шамсудин буда, дар ошёнаи якуми иншоот мағозаи хӯрокворӣ ва дар ошёнҳои болоӣ маркази хизматрасонӣ бунёд гардидааст.

Дар рафти корҳои сохтмонӣ то 7 нафар сохтмончӣ ба кор ҷалб гардида, дар рафти иҷрои корҳои сохтмонӣ масолеҳи сохтмонии босифат истифода бурда шудааст. Баъди ба истифодадиҳӣ то 10 ҷойи нави корӣ таъсис дода мешавад.

Инчунин, дар ин зимн бо иштироки намояндагони Ҳукумати ҷумҳурӣ ва МИҲД вилоят ва шаҳри Кӯлоб Толори варзишӣ воқеъ дар деҳаи Даҳанаи ҷамоати Даҳана мавриди истифодабарӣ қарор дода шуд.

Сохтмони толори варзишӣ соли 2021 оғоз гардида, ягона толори варзишии замонавӣ дар қаламрави ҷамоати мазкур мебошад. Масоҳати зери сохтмони он 400 метри мураббаъ буда, он бо тамоми таҷҳизотҳои замонавии варзишӣ таъмин мебошад.

Фармоишгари иншоот соҳибкори маҳаллӣ Зайниддинов Маҳмадёр буда, арзишии харҷномавии он 500000 сомониро ташкил медиҳад. Дар рафти корҳои сохтмонӣ мутахассисони маҳаллӣ ба кор ҷалб гардида, корҳо бо сифати баланд иҷро шудаанд. Ҳангоми иҷрои корҳо масолеҳи сохтмонии босифат истифода бурда шуда, баъди ба истифода додан дар як баст то 50 нафар ба тамрин ҷалб карда мешаванд.

Дар ин маврид, Дорухона, воқеъ дар деҳаи Даҳанаи ҷамоати деҳоти Даҳана, ки сохтмонаш соли 2021 оғоз гарида буд, фаъолияташро оғоз кард. Иншооти мазкур 2 ошёна буда, дар рафти корҳои сохтмонӣ то 5 нафар сохтмончии маҳаллӣ ба кор ҷалб гардидаанд. Баъди ба истифода додани иншоот 4 ҷойи нави корӣ таъсис дода мешавад. Дар марҳиллаи дуюм таъсиси мағозаи хӯрокворӣ дар назар дошта шудааст. Фармоишгари иншоот соҳибкор Амиршоев Исуф буда, маблағи сохтмон 250000 сомониро ташкил медиҳад.

Инчунин, бинои 4 синфхонаи иловагӣ дар назди ЛКТ №22, воқеъ дар ҷамоати деҳоти Даҳана, мавриди истифодабарӣ қарор дода шуд.

Иншооти мазкур, аз ҷониби Бунёди миллии иҷтимоии маблағгузории Тоҷикистон бунёд шудааст. Лоиҳаи иншооти мазкур аз ҷониби КВД “Хатлон лоиҳасоз” омода шуда, дар корҳои сохтмонӣ сохтмончиёни маҳаллӣ ҷалб гардидаанд. Бинои мазкур барои маркази омӯзишии ҷавонон пешбинӣ гардида, синфхонаҳо бо мизу курсӣ, компютер ва дигар таҷҳизотҳои зарурӣ таъмин шудааст.

Дар доираи чорабинии мазкур Мағозаи хӯрокворӣ ва нуқтаи фурӯши сӯзишворӣ, воқеъ дар деҳаи Тоқакаппаи ҷамоати деҳоти Даҳана мавриди истифодабарӣ қарор гирифт.

Иншооти мазкур аз 2 ошёна иборат буда, аз тарафи соҳибкори маҳаллӣ Зарипов Сироҷ сохта шудааст ва дар корҳои сохтмонӣ 4 нафар коргарони маҳаллӣ ба кор ҷалб карда шудаанд. Дар ошёнаи якуми бино мағозаи хӯрокворӣ ва дар ошёнаи дуюми он фурӯши либосҳо ба роҳ монда шудааст.

Баъди ба истифода додани иншооти мазкур 7 нафар бо ҷойи кори доимӣ фаро гирифта мешаванд.

Дар идомаи сафари корӣ дар шаҳри Кӯлоб Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон марҳилаи аввали Фабрикаи парандапарварии мурғи гӯштии Ҷамъияти дорои масъулияти маҳдуди “Сувайба-2014”-ро мавриди баҳрабардорӣ қарор доданд.

Корхонаи парандапарварӣ дар марҳилаи аввал парвариши 12 ҳазору 500 сар чӯҷаро ба роҳ мондааст ва барои нигоҳубини дурусти онҳо шароити зарурӣ фароҳам оварда шудааст. Коргоҳ мутобиқи талабот бо системаи муосири таъмини гармӣ ва таҷҳизоти автоматии хӯроктақсимкунӣ муҷаҳҳаз буда, тибқи реҷаи муқараргардида, парандаҳо бо хӯроку об таъмин карда мешаванд. Бояд қайд кард, ки хӯроки паранда дар коргоҳи нав ба пуррагӣ аз ҳисоби истеҳсолоти корхонаҳои ватанӣ таъмин карда мешавад.

Дар коргоҳи парандапарварии “Сувайба-2014” парвариши чӯҷаҳои навъи “Бройлер” роҳандозӣ шуда, мувофиқи баҳогузории мутахассисон, ин навъи мурғ барои истеҳсоли гӯшти хушсифати парҳезӣ мувофиқ мебошад.

Ба Сарвари давлат иттилоъ доданд, ки дар марҳилаи аввали фаъолият корхона имконият дорад, ки дар як сол 150 тонна гӯшти парҳезии мурғ истеҳсол намуда, ин нишондод бо ба истифода додани марҳилаҳои баъдӣ афзоиш хоҳад ёфт.

Фермаи парандапарварии мурғи гӯштии “Сувайба-2014” дар доираи дастуру супоришҳои Пешвои муаззами миллат ба хотири таъмини бозорҳои мамлакат бо гӯшти парҳезии истеҳсоли худӣ аз ҷониби соҳибкори маҳаллӣ Амрохон Чориев бунёд гардида, мавриди истифода қарор гирифтани он таъминоти аҳолиро бо ин навъи маҳсулот боз ҳам беҳтар хоҳад кард.

Ҳоло дар давраи аввал наздик ба 20 нафар сокини маҳаллӣ соҳиби ҷойи кори доимӣ ва маоши хуб гардидаанд.

Зимни муаррифии лоиҳаи марҳилаҳои баъдии корхонаи парандапарварӣ иттилоъ дода шуд, ки ҳам шумораи ҷойҳои корӣ афзоиш дода мешавад ва ҳам ҳаҷми истеҳсоли гӯшт бештар хоҳад шуд.

То соли 2023 шумораи фермаҳои парандапарварӣ дар ҳудуди корхона ба 4 адад расонида мешавад, ки ба ин васила истеҳоли гӯшти парҳезӣ дар як сол ба 600 тонна баробар мегардад. Ба ин васила саршумори чӯҷа дар корхонаи “Сувайба-2014” то 50 ҳазор сар расонида мешавад.

Айни замон корҳои сохтмонӣ дар бинои забҳхона ва яхдони нигоҳдории маҳсулоти тайёр анҷом ёфта, васлу насби дастгоҳҳои корӣ, ки аз ширкатҳои маъруфи хориҷӣ харидорӣ гардидаанд, бомаром идома дорад.

Дар саҳни иншооти нав намоиши маҳсулоти бахши парандапарварии шаҳри Кӯлоб доир шуд, ки аз рушди бомароми соҳаи мазкур дар шаҳр гувоҳӣ медиҳад. Дар ин ҷо гӯшти паранда, тухм, маҳсулоти аз гӯшти парҳезии мурғ омодагардида ва намунаи дастгоҳу таҷҳизоте, ки дар корхонаҳои парандапарварӣ насб гардидаанд, ба намоиш гузошта шуд.