Ҳамасола 18 май дар саросари кишвар Рӯзи байналмилалии осорхонаҳо таҷлил карда мешавад.
Ба ин муносибат дар Муассисаи давлатии “Муҷтамаи ҷумҳуриявии осорхонаҳои Кӯлоб” канфиренсияи илмӣ баргузор гардид.
Нахуст, дар чорабинӣ диретори генералии МД “Муассисаи давлатии “Муҷтамаи ҷумҳуриявии осорхонаҳои Кӯлоб” Ҳотам Асозода баромад намуда, ҳамаи иштирокчиёнро ба ин рӯзи фархунда табрик намуда, изҳор дошт, ки дар тӯли асрҳои гузашта донишмандону муҳаққиқон ва аҳли адаби миллати тоҷик шоҳкориҳои зиёде офаридаанд, ки онҳо дар шинохти таъриху фарҳанги миллатамон нақши барҷаста доранд.
Дар осорхона таъриху фарҳанг, расму оин ва урфу одат ҳифз карда мешавад. Қайд намуд, ки халқи тоҷик дорои таъриху фарҳанги бою ғанӣ аст ва аз ин рӯ, на танҳо дар пойтахти кишвар, балки дар ҳар як шаҳру новоҳии он осорхонаи таърихие вуҷуд дорад. Осорхонаи таъриху кишваршиносии 2700-солагии шаҳри Кӯлоб яке аз осорхонаҳое мебошад, ки дар арафаи таҷлили ҷашни 2700-солагии Кӯлоб ба фаъолият оғоз намудааст.
Дар идомаи канфиренсия як қатор ходимони осорхона бо маърӯзаҳои пурмуҳтавои худ дар назди ҳозирин баромадҳо намуданд.
Бахши матбуотии МИҲД-и шаҳри Кӯлоб
Кирмакпарварӣ яке аз соҳаҳои сердаромад дар хоҷагии халқи мамлакат ба ҳисоб рафта, дар самти таъмини корхонаҳои саноатӣ бо маҳсулотҳои гуногуни абрешим, ки бозори молҳои ниёзи мардумро бо ашёи хоми ватанӣ таъмин менамояд, дар самти рушти тараққиёту пешрафти ҷомеа саҳми назаррас мегузорад.
Бояд гуфт, ки ҳамасола дар шаҳру навоҳии мамлакат кирмакпарварӣ рушд намуда, дар хоҷагии қишлоқ парвариш ва нигоҳубини он дар сатҳи зарурӣ ба роҳ монда мешавад.
Дар ҷамоати дехоти Зиракии шаҳри Кӯлоб хоҷагидорон ба ин самт таваҷҷуҳи махсус дода, ҳамасола парвариши кирмакро вусъат мебахшанд. Айни замон хоҷагидорон ба ҷамъоварии ҳосил машғул мебошанд.
Ба иттилои Давлат Шеров намояндаи ҶСК “Пиллаи тоҷик” дар шаҳру деҳоти Кӯлоб мувофиқи дурнамо 63 қуттӣ тухми кирмак дар 4 ҷамоат тақсимот гардида буд ва тибқи нақшабандӣ бояд 2 тонааву 500 кг пилла ҷамъоварӣ карда шавад. алҳол хоҷагидорон ба ҷамъоварии ҳосили он машғул мебошанд.
Маврид ба зикр аст, ки дар мамлакат «Барномаи рушди соҳаҳои кирмакпарварӣ ва коркарди пилла дар Ҷумҳурии Тоҷикистон барои солҳои 2020-2024» амал мекунад, ки мақсади асосии барномаи мазкур фароҳам овардани шароит ва замина барои рушди босуботи соҳаҳои кирмакпарварӣ ва коркарди пилла дар асоси коркарди ашёи хоми маҳаллӣ, таъмини шуғли аҳолӣ, таҳияи механизмҳои иқтисодӣ ва омилҳои ҳавасмандгардонӣ барои ҷалби сармоягузориҳои бевосита ба соҳа ба шумор меравад.
Бибитош Муродова сокини ҷамоати деҳоти Зиракӣ беш аз 30 сол боз ба парвариши кирмак машғул буда, аз ин ҳисоб ҳамасола зиёда аз 100 килограм пилла ба даст оварда, даромади хуби иктисодӣ ба даст меорад.
Ба гуфти кирмакпарварони ҷамоати мазкур парвариши кирмак нигоҳубини пайваста ва дар вақти муайян бо ғизо таъмин намуданро талаб менамояд.
Бояд иброз дошт, ки кирмакпарварӣ ба мисли дигар соҳаҳои кишоварзӣ дар мамлакат мавқеи асосиро доро мебошад. Асоси пилларо нахи он ташкил медиҳад. Он нахи абрешим, ки аз пилла гирифта мешавад, аз дигар нахҳои табиӣ фарқияти калон дорад. Фарқияти он дар мустаҳкам будани нах, хусусияти ёзишхӯрии он, ва аз ҷиҳати экологӣ тоза будани он зоҳир мегардад. Инчунин аз нахи абрешим зиёда аз 330 номгӯй маҳсулот истеҳсол мешавад.
Идимо Бобулова сокини ҷамоати деҳоти Зиракӣ дехаи Зарқалъа беш аз 25 сол боз ба парвариши кирмак машгул буда, хамасола дар мавсим саҳми хешро дар парваришу истеҳсол ва иҷрои нақшаи дурнамои ҷамоат мегузорад.
Бояд кайд намуд, ки соҳаи кирмакпарварӣ ва коркарди пилла рукни муҳими кишоварзӣ маҳсуб мешаванд. Зеро маҳз иқлими мусоиди Тоҷикистон имконият фароҳам овардааст, ки ба ин намуди соҳа сокинон шуғл варзида, маҳсулоти истеҳсолнамудашонро пешкаши бозори дохилӣ ва ҷаҳонӣ гардонанд.
Парвариши кирмаки пилла аллакай дар хоҷагиҳо ба охир расида хоҷагидорон ба ҷамъоварии ҳосили пилла оғоз намуданд.
Маврид ба зикр аст, ки бо парваришу нигоҳубини дурусти кирмакпарварӣ дар хоҷагиҳои мамлакат рушди корхонаҳои саноатӣ зиёд гардида, таъмини бозори маҳсулотҳои абрешими ва дастраси ба ашёи хоми аълосифат саҳми назаррас мегузорад.
Бахши матбуотии МИҲД-и шаҳри Кӯлоб
Ҳамасола дар Ҷумҳурии Тоҷикистони санаи 15 май ҳамчун рӯзи байналмилалии оила бо тантана ҷашн гирифта мешавад.
Санаи 13- майи соли равон дар толори Қасри фарҳанги ба номи Рустами Абдураҳими шаҳри Кӯлоб бахшида ба Рӯзи байналмилалии оила таҳти унвони “Оила- асоси пешрафт ва устувории давлат аст” чорабинии идона баргузор гардид.
Чорабинии мазкур бо иштироки муовини раиси шаҳри Кӯлоб Ҳомидиён Орзу, Сардори Раёсати сабти асноди ҳолати шаҳрвандии вилояти Хатлон Сафарзода Зинатбӣ, оилаҳои намунавӣ, ботаҷриба, рӯзгордида, фаъолзанон ва ҷавондухтарон ҳамчунин дигар шахсони фаъолу кордон доир шуд.
Нахуст меҳмонон намоиши ҳунарҳои мардуми ва аз даври шаҳрии Фестивали ҷумҳуриявии «Сад ранги чакан», ки дар саҳни қаср ба намоиш гузошат шуда буд, дидан намуданд. Гуфта шуд, ки мақсади асосии баргузории фестивал ин баланд бардоштани эҳсоси ватандӯстиву хештаншиносӣ, ифтихори миллӣ, арҷ гузоштан ба таъриху тамаддун, фарҳанг, расму ойинҳои миллию мардумӣ ва муаррифии санъату ҳунари волои халқи тоҷик дар арсаи байналмилалӣ ба ҳисоб меравад.
Сипас, аз ҷониби муовини раиси шаҳри Кӯлоб Ҳомидиён Орзу табрикотӣ раиси шаҳр Назарзода Бахтиёр Худоёр бахшида ба Рӯзи байналмилалии оила саҳми ҳамагон расонида шуд.
Гуфта шуд, ки ба ҳамаи мову шумо маълум аст, ки оила сарчашмаи тарбияи маънавии инсон маҳсуб ёфта, маҳз аз муҳити солими он, муносибати минбаъдаи ҳар як шахс ба ҷамъият муайян мешавад. Тоҷикон аз қадимулайём фарҳанги бузурги оиладорӣ дошта, тавассути урфу одат ва суннату анъаноти худ онро ба оламиён муаррифӣ кардаанд.
Дар идомаи чорабини Сардори Раёсати сабти асноди ҳолати шаҳрвандии вилоят Сафарзода Зинатбӣ, низ баромад намуда афзуд, ки фарҳанги оиладорӣ ва тарбияи фарзандони хонаводаи шоҳони тоҷиктабор, ки ҳамчун намунаи беҳтарини ахлоқ ва маърифати инсонӣ шинохта шуда аст.
Ҳамчунин дар идомаи чорабинӣ оилаи Талаб Нозимов, дар назди ҳозирин доир ба роҳҳои тайнамудаи оиладории хеш ва мақоми оилаву оиладорӣ баромад намуданд.
Дар ин рӯз ба як қатор оилаҳои намунавӣ, ботаҷриба ва рӯзгордида аз ҷониби мақомоти иҷроияи ҳокимияти давлатии шаҳри Кӯлоб барои саҳми арзанда гузоштан дар тарбияи насли наврас дар руҳияи ватанпарварию хештаншиносӣ, тарғиби риояи оинҳои миллӣ таҳкими оила , тарбияи хуби фарзандон шахсони фаъол сипоснома, раҳматнома ва ҳамчунин туҳфаҳои хотиравӣ дар вазъияти хотирмон тақдим гардид.
Дар интиҳои чорабинӣ барномаи фарҳангии бахши фарҳанги мақомоти иҷроияи ҳокимияти давлатии шаҳри Кӯлоб ва дигар ҳунармандон пешкаши меҳмонон гардонида шуд.
Бахши матбуотии МИҲД-и шаҳри Кӯлоб
Ҳамдиёрони азиз!
Бо эҳсоси хушнудӣ аз истиқболи Рӯзи байналмилаллии оила, ки ҳар сол 15 май дар саросари кишвари азизамон ҷашн гирифта мешавад, Шумо ва дар шахси Шумо тамоми мардуми шарифи Кӯлобро ба ин муносибат табрику таҳният гуфта, бароятон дар кор ва зиндагии оилавиатон барору комёбиҳо орзумандам.
Дӯстони азиз!
Ба ҳамаи мову шумо маълум аст, ки оила сарчашмаи тарбияи маънавии инсон маҳсуб ёфта, маҳз аз муҳити солими он, муносибати минбаъдаи ҳар як шахс ба ҷамъият муайян мешавад. Тоҷикон аз қадимулайём фарҳанги бузурги оиладорӣ дошта, тавассути урфу одат ва суннату анъаноти худ онро ба оламиён муаррифӣ кардаанд. Фарҳанги оиладорӣ ва тарбияи фарзандони хонаводаи шоҳони тоҷиктабор, ки ҳамчун намунаи беҳтарини ахлоқ ва маърифати инсонӣ шинохта шуда аст, ҳанӯз аз дарбори шоҳ Ҷамшед манша гирифта ба сулолаи бузурги Сомониён ва то имрӯзи мо ҳамчун мерос омада расида аст.
Ин ананаи нек дар даврони соҳибистиқлолии кишвар аз ҷониби Сарвари оқилу донои миллат, Асосгузори сулҳу ваҳдати милли-Пешвои миллат муҳтарам Эмомалӣ Раҳмон дастгирӣ ёфта, барои эҳёи суннатҳои бузурги оиладорӣ тадбирҳои зарурӣ андешида шудааст. Қабули Қонуни Ҷумҳурии Тоҷикистон «Дар бораи масъулияти падару модар дар тарбияи фарзанд», ки ба хотири тақвият бахшидани раванди тарбия дар оила нигаронида шуда аст, гувоҳи гуфтаҳои болост. Сарвари давлат, Ҷаноби Олӣ муҳтарам Эмомалӣ Раҳмон оиларо ҷузъи ҷудонашавандаи ҷомеъа номида, муҳити созгор ва солимии онро омили пешрафт ва рушди ҷамъият маънидод мекунанд.
Дар баромади худ муҳтарам Ҷаноби Олӣ Эмомалӣ Раҳмон нақши оиларо дар пешбурди сиёсати давлат муҳим ҳисобида, қайд карданд, ки «Тарбияи фарзанди солим, бомаърифату соҳибмаълумот, ватандӯсту ватанпараст ва бонангу номус вазифаи муҳим ва муқаддаси оила мебошад».Ҳамзамон зимни баромади дигарашон Пешвои маҳбуби миллат таъкид доштанд, ки имрӯз ҷомеаи Тоҷикистон дар симои зан на танҳо модар, хоҳар ва ҳамсар балки сиёсатмадори шинохта, олими нуқтасанҷ, сарвари муваффақ, соҳибкори саховатпеша, табиби ҳозиқ, донишманди асил, ҳимоятгари ҳифзи ҳуқуқ, ҳомии Ватан, деҳқони асил, бинокори номдор, мураббии наслҳо ва ҳамшираи меҳрубонро мебинад, ки ин мояи ифтихори ҳар яки мову шумо мебошад.
Боиси тазаккур мебошад, ки имрӯз дар шаҳри Кӯлоб тибқи маълумоти оморӣ 222 ҳазору 500 нафар аҳолӣ зиндагӣ дорад, ки аз ин 110 ҳазору 400 нафари онро занон ташкил медиҳад.
Айни ҳол дар соҳаи тандурустӣ 2008 нафар , маориф 3307, фарҳанг 127 занону ҷавондухтарон фаъолияти пурсамар доранд.
Ногуфта намонад, ки имрӯз дар шаҳри Кӯлоб шумораи оилаҳои намунавӣ кам нестанд. Аз ҷумла, оилаи Талаб Нозимов, Зариф Валиев, Искандар Хоҷаев, Сайвалӣ Ёқубов, Шодӣ Холназаров ва даҳҳо оилаҳои дигарро метавон ном бурд, ки дар рушду пешрафти ҷомеа саҳми босазои хешро гузоштаанд ва ин аз сиёсати ғамхоронаи Пешвои миллат муҳтарам Эмомалӣ Раҳмон гувоҳӣ медиҳад.
Бо ҳамин ниятҳои нек бори дигар ҳамаи Шумо, ҳамдиёрони азизро, ба муносибати Рӯзи байналмиллалии оила табрику таҳният гуфта, бароятон саодати рӯзгор ва хонаи ободро таманно дорам.
Саломату сарбаланд бошед!
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
