11 феврали соли 2023 дар толори мақомоти иҷроияи ҳокимияти давлатии шаҳри Кӯлоб ҷиҳати иҷрои дастуру супоришҳои Ҳукумати Ҷумҳурии Тоҷикистон, бахусус Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ба хотири сазовор истиқбол гирифтани ҷашни 35- солагии Истиқлолияти давлатии Ҷумҳурии Тоҷикистон машварати гуруҳи кории ҷумҳуриявӣ бо фаъолони шаҳри Кӯлоб баргузор гардид.
Дар машварати мазкур аъзои гурӯҳи корӣ, намояндаи Ҳукумати мамлакат, Вазири нақлиёти Ҷумҳурии Тоҷикистон Азим Иброҳим, Раиси шаҳри Кӯлоб Назарзода Бахтиёр Худоёр, муовинон ва роҳбари дастгоҳи раиси шаҳри Кӯлоб, мудирони шуъбаву бахшҳои дастгоҳи раис ва мақомоти иҷроияи ҳокияти давлатии шаҳр, роҳбарони мақомотҳои ҳифзи ҳуқуқ, сардорони раёсатҳо, роҳбарони ташкилоту муассисаҳо, раисони ҷамоатҳо, сардорони қитъаҳои истифодабарии манзили шаҳр, намояндагони васоити ахбори омма ва дигар шахсони масъул ширкат доштанд.
Дар идомаи кори ҷаласа намояндаи Ҳукумати мамлакат, Вазири нақлиёти Ҷумҳурии Тоҷикистон Азим Иброҳим суханронӣ намуда изҳор намуд, ки бо мақсади дар амал татбиқ гардидани дастуру супоришҳои Роҳбарияти Олии кишвар ва хотирмон таҷлил намудани ҷашни 35-солагии Истиқлолияти Ҷумҳури Тоҷикистон ҳар яки моро мебояд дар фаъолияти кории худ масъулиятшинос бошем. Ҳамчунин масъулон вазифадор гардиданд, ки нақшаи корӣ тартиб дода тибқи он ҳамарӯза корбарӣ бояд намуд.
Зимни ҷаласа вазифадор гардиданд, ки дар муҳлати кутоҳтарин бояд нақшаи даъвати ҷавонон ба сафи Қувваҳои мусаллаҳи Ҷумҳурии Тоҷикистон иҷро карда шавад. Аз рӯи масъалаи дигари ҷаласа роҳбарони ташкилотҳои шаҳрӣ вазифадор карда шуданд, ки баҳри истифодаи босамари заминҳои ҳудуди ташкилоту муассисаҳо ва заминҳои бекорхобидаи хоҷагиҳои деҳқонӣ бо сокинони шаҳру деҳот корҳои фаҳмондадиҳӣ бурда аз натиҷааш ба гуруҳи кории ҷумҳуриявӣ мунтазам ахборот пешниҳод намоянд.
Ҳамчунин дар кори машварат масъалаҳо доир ба самтҳои асосии сиёсати дохилӣ ва хориҷии кишвар, оид ба пардохти саривақтии андозҳо, корҳои ободониву созандагӣ, кишти такрории маҳсулотҳои кишоварзӣ, вазъи муассисаҳои соҳаи маориф, тандурустӣ, фарҳанг ва фаъолияти онҳо дар ҷамоату деҳот, вазъи рӯзгори мардум ва дигар масъалаҳои марбут ба ҳаёти ҷомеаи имрӯз мавриди таҳлилу баррасӣ қарор дода шуд.
Бахши матбуотии МИҲД-и шаҳри Кӯлоб
Дар толори мақомоти иҷроияи ҳокимияти давлатии шаҳри Кӯлоб бо ибтикори шуъбаи кор бо занон ва оилаи мақомоти иҷроияи ҳокимияти давлатии шаҳр дар доираи "Барномаи рушди оила" таҳти унвони "Иффати зан" мизи мудаввар баргузор гардид.
Дар мизи мудаввар муовини раиси шаҳри Кӯлоб Даминзода Арафамо, роҳбари дастгоҳи раиси шаҳр Қурбонзода Наргис, мудири шуъбаи кор бо занон ва оилаи мақомоти иҷроияи ҳокимияти давлатии шаҳри Кӯлоб Маҳмудзода Рӯъё Сафарӣ, фаъолзанони шаҳри Кӯлоб, роҳбарони ташкилоту муассисаҳои шаҳрӣ ва дигар шахсони масъул иштирок доштанд.
Нахуст, бо сухани ифтитоҳӣ муовини раиси шаҳри Кӯлоб Даминзода Арафамо баромад намуда, изҳор намуд, ки зан дар оилаи тоҷикон ҳамеша нақши асосӣ дошт ва дорад. Зеро иффату зебоӣ, фурӯтаниву маърифатнокӣ хоси зан буда, ба зиндагии аҳли хонадон таровату покизагӣ мебахшад.
Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатиашон оид ба нақши зан- модар чунин иброз намуд. "Мо, ҳамчунин, ба нақши зан-модар, ки мавҷуди муқаддас мебошад, ҳамеша арҷ мегузорем, чунки ӯ насли инсонро ба вуҷуд меоварад, тарбия мекунад ва ба камол мерасонад".
Сипас, аз рӯи барнома мудири шуъбаи кор бо занон ва оилаи Миҳд-и шаҳри Кӯлоб Маҳмудзода Рӯъё Сафарӣ, Шарофат Худойдодова, ноиби ректор оид ба робитаҳои байналмиллалии Донишгоҳи давлатии Кӯлоб ба номи Абӯабдуллоҳи Рӯдакӣ дар мавзӯи "Занон дар илми муосир", Марям Саймуминзода, мудири бахши сабти асноди ҳолати шаҳрвандии шаҳри Кӯлоб дар мавзӯи "Пошхӯрии оилаҳо ва таҳлили сабабҳои он", Комилова Ш.,собиқадор дар соҳаи хизмати давлатӣ, мудири кафедраи забони тоҷикии Коллеҷи тиббии шаҳри Кӯлоб дар мавзӯи "Этика ва эстетика" ва Шамсзода З. судяи суди минтақавӣ дар шаҳри Кӯлоб иштирок ва суханронӣ намуданд.
Бояд қайд намоем, ки мақсад аз баргузор намудани чорабинии мазкур баланд бардоштани мавқеи зан дар ҷомеа ва ҳамчунин бартараф намудани камбудиҳои дар ҷомеаи имрӯза ҷойдошта мебошад.
Имрӯз вохӯрии Судяи Суди конститутсионии Ҷумҳурии Тоҷикистон Қувватзода Фотеҳ Ҷумъа бо ҳайати профессорону омӯзгорон ва донишҷӯёни Донишгоҳи давлатии Кӯлоб ба номи Абуабдуллоҳи Рӯдакӣ оид ба самтҳои афзалиятноки Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон баргузор гардид.
Дар вохӯрӣ ректори Донишгоҳ доктори илмҳои ҳуқуқшиносӣ, профессор Раҳмон Дилшод Сафарбек, ноибони ректор, садорати факултетҳо ва донишҷӯён иштирок доштанд.
Нахуст профессор Раҳмон Дилшод Сафарбек суханронӣ намуда, меҳмононро хайрамақдам гуфтанд.
Сипас, Қувватзода Фотеҳ Ҷумъа суханронӣ намуда, оид ба нуктаҳои муҳими Паём андешаҳои худро баён намуданд. Зикр карданд, ки дастовардҳои замони соҳибистиқлолӣ бештару беҳтар аз 70 соли замони Шӯравӣ мебошанд.
Ӯ афзуд: "Хизматҳои Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмонро бояд бидонем. Ба қадри озодӣ ва ободии ватан бояд расид. Ҷавононро аз шомилшавӣ ба гурӯҳҳои ифротгаро боздорем. Истиқлол на ба ҳар кас муяссар мешавад."
Дар қисмати охир оид ба Паём фикру назарҳои нишастагон шунида шуд.
Имрӯз, 7-уми феврали соли равон дар толори мақомоти иҷроияи ҳокимияти давлатии шаҳри Кӯлоб, нишасти матбуотии раиси шаҳр Назарзода Бахтиёр Худоёр бо иштироки васеи намояндагони воситаҳои ахбори омма доир шуд.
Сараввал, раиси шаҳри Кӯлоб барои ҳамкории мутақобилан судманд бо мақомоти иҷроияи ҳокимияти давлатии шаҳри Кӯлоб, дастгирии сиёсати давлатӣ, тарғибу ташвиқи арзишҳои миллию давлатдорӣ ва муаррифии дастовардҳои иҷтимоию иқтисодии шаҳр дар соли 2022 ба кулли рӯзноманигорон изҳори сипосу миннатдорӣ баён кард.
Зимни баромади худ раиси шаҳри Кӯлоб Назарзода Бахтиёр Худоёр дар назди намояндагони ВАО доир ба муҳимтарин нишондиҳандаҳои рушди иқтисодиву ичтимоии шаҳр дар соли 2022 ба иштирокчиёни нишасти матбуотӣ муффас баромад намуд.
Аз ҷумла, қайд гардид, ки соли 2022 барои сокинони шаҳру деҳоти Кӯлоб соли таърихӣ ва хотирмон буд. Бахусус сафари кории Асосгузори сулҳу ваҳдати миллӣ- Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ба шаҳри Кӯлоб ва дар рафти он ба истифода супоридани як қатор иншоотҳо, аз ҷумла биноҳои Коллеҷи технологияи инноватсионию иттилоотӣ-коммуникатсионӣ, филиали муассисаи давлатии “Ташаккул ва рушди соҳибкорӣ”, муассисаи таълимии №47, коргоҳи истеҳсоли гӯшти мурғ, бинои Кумитаи идораи замини шаҳр, бинои баландошёна, ки ҳангоми ифтитоҳи бино ба сад нафар ятимони кул аз ҷониби муҳтарам Пешвои миллат зиёфат ва ба ҳамаи онҳо туҳфаҳои арзишманд дода шуд, ки барои мардуми шаҳри Кӯлоб хотирмон буд. Аз ин ғамхории навбатии муҳтарам Ҷаноби Олӣ ятимон хело ҳам миннатдор шуданд. Ҳамчунин бо роҳбарони ташкилоту муассисаҳо ва собиқадорони меҳнат вохӯрӣ доир гардид, ки ба сокинон руҳу илҳоми тоза бахшид. Қобили қайд аст, ки 14-уми декабри соли ҷорӣ Маҷмаи Умумии Созмони Милали Муттаҳид дар бораи «Соли байналмилалии ҳифзи пиряхҳо» эълон кардани соли 2025 ва 21-уми март ҳамчун «Рӯзи ҷаҳонии пиряхҳо», ки аз ҷониби Тоҷикистон пешниҳод шуда буд, якдилона қарор қабул кард. Мувофиқи ин қатънома дар чаҳорчӯби Созмони Милали Муттаҳид Фонди мақсадноки байналмилалӣ оид ба масъалаҳои ҳифзи пиряхҳо таъсис ёфта, вобаста ба ин мавзӯъ соли 2025 дар шаҳри Душанбе конфронси сатҳи баланди Созмони Милали Муттаҳид баргузор мегардад. Боиси ифтихор ва сарфарозии ҳамаи сокинони Тоҷикистон, бахусус шаҳру деҳоти Кӯлоб аст, ки панҷумин ибтикори ҷаҳонии кишвари мо оид ба масъалаҳои об ва иқлим дар миқёси сайёра амалӣ хоҳад шуд.
Мақомоти иҷроияи ҳокимияти давлатии шаҳри Кӯлоб Конститутсияи Ҷумҳурии Тоҷикистон, Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ”, Паёмҳои Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, қарорҳои Ҳукумати Ҷумҳурии Тоҷикистону раиси вилояти Хатлон ва дигар санадҳои меъёрӣ-ҳуқуқиро ба роҳбарӣ гирифта, дар соли 2022 ҷиҳати пешбурди иқтисодиёту иҷтимоиёт корҳои муайянро ба сомон расонид.
Дар соли 2022 нақшаи андозҳои давлатии шаҳри Кӯлоб 116,0 фоиз иҷро ва ба буҷет 127,3 млн. сомонӣ ворид карда шуд, ки нисбати нақша 17,7 млн. сомонӣ зиёд мебошад. Нақшаи андозҳо якҷоя бо андози иҷтимоии ғайрибуҷетӣ 113,2 фоиз таъмин гардида, ба буҷет ба ҷойи 140 млн. 691 ҳазор сомонӣ, 158 млн. 960 ҳазор сомонӣ ворид карда шуд, ки ин нишондиҳанда аз нақша 18 млн.268 ҳазор сомонӣ зиёд аст.
Гуфта шуд, ки бо назардошти эълон гардидани солҳои 2022-2026 “Солҳои рушди саноат” ва амалӣ намудани ҳадафи чоруми миллӣ- саноатикунонии бо суръати мамлакат соли 2022 тибқи қарори раиси шаҳр “Соли рушди саноат ва роҳҳои обод” эълон, нақшаи чорабиниҳо таҳия ва дар соли 2022 дар ин самт чораҳои дахлдор амалӣ карда шуданд.
Дар натиҷаи чораҳои амалигардида ба 01 январи соли 2023- 7 корхонаи саноатӣ, аз ҷумла ҶДММ “Махсус” ва ҶДММ “Мелиоратор”- корхонаҳои коркарди сангу шағал, ҶДММ “Мадазим”- корхонаи истеҳсоли маҳсулот аз филизот, ҶДММ “Оби навруша”- истеҳсоли сафолаку хишти сементӣ, ҶДММ “Марямбибӣ”- истеҳсоли хишти сементӣ, ҶДММ “Истеҳсоли гушти мурғи Кӯлоб” ва ҶДММ “Тоҷик Алмос” - истеҳсоли филтрҳои равғанӣ ва ҳавоӣ барои автомошинаҳо ба истифода супорида шуда, дар ин замина 73 ҷойҳои нави корӣ таъсис ёфтанд. Ҳамчунин дар ҶДММ “Комбинати хонасозӣ”-и шаҳри Кӯлоб 3 коргоҳҳои нав, аз ҷумла истеҳсоли сафолак, хишти сабук ва сангҳои ороишӣ, дар ҶДММ “Сувайба-2014” коргоҳи парвариши мурғи гуштӣ, дар ҶДММ “Хуршед-Н” коргоҳи истеҳсоли сангу шағал ҳамагӣ бо таъсиси 40 ҷойҳои нави корӣ ба истифода супорида шуданд ва дар маҷмуъ дар соҳаи саноат 113 ҷойи нави корӣ таъсис ёфт.
Иттилоъ дода шуд, ки дар соли сипаригашта ҳаҷми умумии истеҳсоли маҳсулоти кишоварзӣ дар ҳамаи бахшҳои хоҷагидорӣ 810,0 млн. сомонӣ расонида шуд, ки нисбат ба соли гузашта 32,1 млн. сомонӣ зиёд буда, суръати афзоиш 104,1 фоизро ташкил дод.
Яке аз соҳаи афзалиятноки иҷтимоӣ маориф ба ҳисоб меравад. Барои фаъолияти самаранок ба соҳаи маориф дар соли 2022- 94,9 млн. сомонӣ, аз маблағҳои қисми хароҷоти буҷети маҳаллӣ равона гардид.
Дар шаҳру деҳоти Кӯлоб 77 муассисаи таълимию тарбиявӣ, аз ҷумла 52 муассисаи таҳсилоти миёнаи умумӣ, 1 муассисаи таҳсилоти умумии асосӣ, 4 литсей, мактаби Президентӣ барои хонандагони болаёқат, 2 мактаб-интернат, марказҳои таҳсилоти иловагӣ, дарёфт ва рушди истеъдодҳо, технологияи информатсионӣ ва коммуникатсионӣ, фароғатгоҳи «Шарора», 13 муассисаи таҳсилоти томактабӣ (аз ҷумла 4 муассисаи таҳсилоти хусусии томактабии «Меҳрона», «Миҷгона», «Сабрина» ва «Ягона») фаъолият доранд
Дар соли 2022 ба соҳаи тандурустӣ 44,8 миллион сомонӣ равона гардид, ки 23,6 фоизи қисми хароҷотии буҷети маҳаллиро ташкил медиҳад.Дар шаҳру деҳоти Кӯлоб 72 адад муассисаҳои тандурустӣ, аз ин 5 муассиса ба бахши госпиталӣ ва 67 адади дигар ба бахши кӯмаки аввалияи тиббию санитарӣ рост меояд. Аз 72 адад муассисаҳои тиббӣ 15 адад дар ҳудуди шаҳр ва 57 адад, аз ҷумла маркази саломатии ноҳиявӣ, 14 адад марказҳои саломатии деҳотӣ ва 41 адад бунгоҳҳои тиббӣ дар ҷамоатҳои деҳот ҷойгир мебошанд.
Дар нишасти матбуотӣ намояндаи телевизиони “Сафина” дар минтақаи Кӯлоб, намояндаи нашрияи расмии Ҷумҳурии Тоҷикистон “Ҷумҳурият”, Намояндаи телевизони “Точикистон” намояндаи нашрияи "Пайк", намояндаи телевизиони "Синамо" ва чанде аз дигарон ба суолҳои худ оид ба масъалаҳои мухталифи иҷтимоию иқтисодӣ, кишоварзию рушди саноат посухи мушаххас гирифтанд.
Дар охир раиси шаҳри Кӯлоб Назарзода Бахтиёр изҳор дошт, ки сокинони фарҳангдӯсти шаҳр бо ҷонибдорӣ аз сиёсати пешгирифтаи Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмонро баҳри иҷрои ҳадафҳои пешгирифта дар самти корҳои ободонию созандагии диёри биҳиштоосоямон содиқона саъю талош хоҳанд варзид.
Бахши матбуотии МИҲД-и шаҳри Кӯлоб