25- июли соли равон муовини Сарвазири Ҷумҳурии Тоҷикистон - Зиёзода Сулаймон Ризоӣ, Вазири кишоварзии мамлакат - Ҳакимзода Қурбон ва раиси Кумитаи бехатарии озуқавории назди Ҳукумати Ҷумҳурии Тоҷикистон- Файзуллозода Муҳаммадсаид Убайдулло бо сафари корӣ ба шаҳри Кӯлоб ташриф оварданд.
Меҳмононро дар даромадгоҳи шаҳр раиси шаҳри Кӯлоб Назарзода Бахтиёр Худоёр бо масъулини мақомоти иҷроияи ҳокимияти давлатии шаҳри Кӯлоб оид ба соҳаи кишоварзӣ ва бехатарии озуқаворӣ истиқбол намуданд.
Мақсади сафари шахсони масъули Ҳукумати Ҷумҳурии Тоҷикистон шиносоӣ ба соҳаи кишоварзии Кӯлоб, аз ҷумла иҷроиши кишти зироатҳои такрорӣ, нашъунамою обёрии заминҳои пахта, вазъи нуқтаҳои барқии таъминоти оби полезӣ ва амнияти озуқавории шаҳри Кӯлоб буд.
Лозим ба ёдоварист, ки дар нимсолаи якуми соли 2023 ҳаҷми умумии истеҳсоли маҳсулоти кишоварзӣ дар ҳамаи бахшҳои хоҷагидорӣ ва 332,9 млн. сомонӣ расонида шуд, ки нисбат ба ҳамин давраи соли гузашта 21,4 млн. сомонӣ зиёд буда, суръати афзоиш 106,9 фоизро ташкил дод.
Кишоварзони шаҳри Кӯлоб дар ин давра, дар ҳамаи шаклҳои хоҷагидорӣ дар майдони 10 ҳазору 646 гектар кишти асосии зироатҳои кишоварзиро гузарониданд.
Мувофиқи ҳисоботҳо ба ҳолати 1 июли соли ҷорӣ ҳамагӣ 2595 га кишти такрории зироатҳои кишоварзӣ гузаронида шудааст, ки ба 88 фоизи нақша баробар аст. Кишти зироатҳо идома дорад.
Дар ҳамаи бахшҳои хоҷагидорӣ чорвои калони шохдор, модагов, саршумори моли майда, парранда ва асп нисбати ҳамин давраи соли гузашта зиёд гардида, истеҳсоли маҳсулотҳои соҳаи чорводорӣ, аз ҷумла гӯшт, шир, моҳӣ ва пашм низ нисбат ба ҳамин давраи соли гузашта афзоиш ёфт.
Дар шаҳру деҳоти Кӯлоб картошка, сабзавот, зироати хӯроки чорво ва меваҷот нисбат ба ҳамин давраи соли гузашта зиёд истеҳсол гардидааст, вале инро бояд фаромӯш накунем, ки кишти такрорӣ асоси амнияти озуқаворӣ маҳсуб меёбад ва барои арзон шудани бозори истеъмолӣ бояд заминҳоро самаранок истифода бурда, аз як замин чанд ҳосил рӯёнем.
Меҳмонон ба вазъияти кишоварзӣ ва амнияти озуқаворӣ шинос шуда, баҳри мусоидат кардан ба мушкилоти соҳа ва мусоидат намудан ба дигар мушкилоти мавҷуда дастуру супоришҳо доданд.
“Навиди Кӯлоб”
24 июли соли 2023 дар доираи “Барномаи давлатии ҳифзи мероси ғайримоддии фарҳангии халқи тоҷик барои солҳои 2021-2025” ва Ҷадвали баргузории фестивал, намоиш, ид, озмунҳои анъана ва ҳунарҳои мардумӣ ва ҷашну солгардҳо дар Ҷумҳурии Тоҷикистон барои соли 2023, ки бо Амри Президенти Ҷумҳурии Тоҷикистон аз 30.01.2023, №АП-318 тасдиқ шудааст дар Қасри фарҳанг ба номи Рустами Абдураҳим даври шаҳрии Фестивал-озмуни ҷумҳуриявии телевизионии эҷодиёти халқ “Андалеб” дар сатҳи баланди фарҳангӣ баргузор гардид.
Дар чорабинии мазкур Раиси шаҳри Кӯлоб Назарзода Бахтиёр Худоёр, ҳайати ҳакамон, роҳбарони ташкилоту муассисаҳо ва дигар шахсони масъул иштирок доштанд.
Кормандони ташкилоту муассиса ва сокинони шаҳр дар саҳни қасри фарҳанг дастоварду ҳунари худро аз қабили дӯзандагию бофандагӣ, сабадбофӣ, заргарӣ, оҳангарӣ кандакорӣ, рассомӣ ва дигар ҳунарҳои мардумиро муаррифӣ намуда, аз ҷониби ҳайати ҳакамон баҳои баланд гирифтанд.
Дар даври шаҳрии фестивал озмуни ҷумҳуриявии эҷодиёти халқ “Андалеб 2023” дастаҳои ҳунарии шаҳр дар мавзуъҳои марбут ба Истиқлолияти давлатӣ, меҳру муҳаббат нисбат ба Ватан, инъикоси рӯҳияи хештаншиносӣ, ватандорӣ, ифтихори миллӣ, файзу баракати истиқлолият ва ваҳдату ягонагӣ бо маҳорати баланд ҳунарнамоӣ карда, комёбиҳову ҳунари мардуми тоҷикро бо тобишҳои рангини он манзури тамошоинон гардониданд.
Мавриди зикр аст, ки фестивал озмуни ҷумҳуриявии телевизонии эҷодиёти халқ “Андалеб 2023” дар баланд бардоштани тарбияи маънавии шаҳрвандон, бахусус тарбияи насли наврас, дар руҳияи ватандӯстӣ хештаншиносӣ, ифтихори миллӣ. арҷгузорӣ ба мероси пурғановати фарҳанги миллӣ мусоидати фаъол хоҳад кард.
Ҳунармандони шаҳри Кӯлоб дар ин фестивал озмун аз рӯи шартҳои озмун аз ҷумла намоиши ҳунарҳои бадеии халқӣ, суруди ҳамсароёни бисёровоза. навозиши умумӣ бо созҳои миллии мусиқӣ, намоиши либосҳои миллӣ бо иловаи навгониҳо, рақсу суруд ва навозиши якка, бадеҳа, намоиши порча аз ҷашну марсимҳои мардумӣ, суруди анъанавӣ, саҳначаи ҳаҷвӣ ва сютаи вокалӣ ва дигар ҳунарнамоӣ карда, бо гирифтани 120 хол сазовор гардиданд.
Бояд гуфт, ки ҳадаф аз баргузор намудани Фестивал-озмуни ҷумҳуриявии телевизионии эҷодиёти халқ “Андалеб” рушди фаъолияти дастаҳои ҳунарӣ, дарёфти чеҳраҳои нави санъаткор, ҷалби ҳарчи бештари мардум ба фарҳангу ҳунар, баланд бардоштани нақши ансамблу гуруҳҳои эҷодӣ дар раванди тарбияи ҷавонону наврасон, эҳсоси ватандӯстиву фарҳангпарварӣ, зебоипарастию эҷодкории онҳо, рушди тарғиби ҳунарҳои бадеии халқӣ, танзими анъана ва расму ойинҳои миллиию мардумӣ ва дастгирии шахсони эҷодкору соҳибистеъдод мебошад.
Бахши матбуотии МИҲД-и шаҳри Кӯлоб
Пос доштани хотираи устодону собиқадорон ва шахсоне, ки дар рушди варзиши тоҷик хизматҳои бузург доранд барои насли оянда як руҳияи тозаеро мебахшад.
Бо ин мақсад дар толори Маҷмааи варзишии шаҳри Кӯлоб VII-умин мусобиқаи ҷумҳуриявӣ оид ба “Гуштингирӣ” байни ҷавонони соли таваллудашон 2003-2004 бахшида ба гиромидошти хотираи Устоди варзиши собиқ Иттиҳоди Шӯравӣ ва Ҷумҳурии Тоҷикистон Устод Шариф Саидов баргузор гардид.
Дар мусобиқаи мазкур варзишгарон аз шаҳру ноҳияҳои ҷумҳурӣ бо як нерӯи тоза иштирок намуда қувваозмоӣ намуданд.
Зимни баргузории чорабинии варзишӣ Раиси шаҳри Кӯлоб Назарзода Бахтиёр Худоёр иштирок намуда, аз хизматҳо ва саҳми хотираи Устоди варзиши собиқ Иттиҳоди Шӯравӣ ва Ҷумҳурии Тоҷикистон Устод Шариф Саидов дар риштаи варзиш ёдовар гардида аз корҳои неки ин шахсияти бузург ба варзишгарон сухан гуфтанд.
Дар идома ба як қатор устодони варзиш барои ҳамкориҳои созанда бо мақомоти иҷроияи ҳокимияти давлатии шаҳри Кӯлоб ва саҳми арзанда гузоштан дар рушди варзиши миллӣ, инчунин бахшида ба хотири гиромидошти хотираи Устоди варзиши собиқ Иттиҳоди Шӯравӣ ва Ҷумҳурии Тоҷикистон Устод Шариф Саидов бо Сипосномаи раиси шаҳри Кӯлоб сарфароз гардонида шуд.
Сипас, мусобиқа оғоз гардида, варзишгарон байни ҳамдигар дар вазнҳои муайянгардида рақобат намуданд.
Бахши матбуотии МИҲД-и шаҳри Кӯлоб
Имрӯз, 21 июли соли 2023 дар толори маҷлисгоҳи Мақомоти иҷроияи маҳаллии ҳокимияти давлатии шаҳри Кӯлоб, таҳти раёсати раиси шаҳри Кӯлоб Назарзода Бахтиёр Худоёр иҷлосияи ғайринавбатии Маҷлиси вакилони халқи шаҳр, даъвати шашум баргузор гардид.
Дар кори иҷлосия вакилон, муовини якум, муовинони раиси шаҳр, роҳбари дастгоҳи раиси шаҳр, мудирони шуъбаю бахшҳои мақомоти иҷроияи ҳокимияти давлатӣ ва дигар шахсони масъул иштирок намуданд.
Иҷлосияи мазкур бо садо додани Суруди миллии Ҷумҳурии Тоҷикистон оғоз гардид.
Дар кори иҷлосияи ғайринавбатӣ масъалаҳо;
- Дар бораи як қатор ваколатҳои вакилоне, ки бинобар сабаби иваз намудани ҷои зист ваколатҳояшон пеш аз муҳлат қатъ карда шаванд
-Дар бораи таъин кардани интихобот дар ҳавзаҳои интихоботи вакилони хориҷшуда
-Дар бораи таъсиси Комиссияи интихоботии шаҳр мавриди баррасӣ қарор дода шуд.
Сипас, вакилон рӯзномаи маҷлисро тасдиқ намуда, масъалаҳои мазкурро баррасӣ намуданд.
Зимни баргузории иҷлосияи ғайринавбатии Маҷлиси вакилони шаҳри Кӯлоб роҳбарияти шаҳр суханронӣ намуда, иброз доштанд, ки бо мақсади дар амал татбиқ намудани дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомали Раҳмон вобаста ба таҷлили сазовори ҷашни 35 солагии Истиқлолияти давлатии Ҷумҳурии Тоҷикистон ҳар яки моро мебояд ҷиҳати зиёд намудани корҳои ободониву созандагӣ, таъмини тозагиву ободии маҳал, тақвият бахшидани корҳои созандагиву ободкорӣ бо сокинон ва соҳибкорони маҳаллӣ ҳамкории зич намоем.
Баъди муҳокимарониҳои масъалаҳои иҷлосия раиси шаҳри Кӯлоб муҳтарам Назарзода Бахтиёр Худоёр аз масъулин даъват ба амал овард, ки дар иҷрои вазифаҳои ба зиммадошта масъулиятшинос буда, баҳри беҳбудии рӯзгори мардум саъюу талоши бештар дошта бошем, то ин ки дар ободониву созандагии шаҳри Кӯлоб саҳмгузор бошем.
Ба ҳамин иҷлосияи ғайринавбатии Маҷлиси вакилони халқи шаҳри Кӯлоб бо садо додани Суруди миллӣ ба итмом расид.
Бахши матбуотии Миҳд- шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
