Имрӯз, 28 апрели соли равон дар Қасри фарҳанги ба номи Рустами Абдураҳим-и шаҳри Кӯлоб бахшида ба Рӯзи ҷаҳонии сил – 2022 таҳти унвони “Ҷомеаи ман бидуни сил” чорабинӣ доир гардид.
Сараввал, меҳмонон аз намоиши асарҳои рассом Ҷонибек Асозода ва ҳунарҳои мардумии шаҳри Кӯлоб, аз қабили чакан, гулдӯзӣ, қуроқдӯзӣ дидан намуданд.
Дар чорабинӣ раиси шаҳри Кӯлоб Назарзода Бахтиёр Худоёр, Вакили Маҷлиси намояндагони Маҷлиси Олии Ҷумҳурии Тоҷикистон, Раиси Анҷумани миллии сил Муртазозода Ҷамшед, муовини Вазири тандурустӣ ва ҳифзи иҷтимоии аҳолии кишвар Амирзода Абдухолиқ, раиси ноҳияи Восеъ, муовинони раисони ноҳияи Ҳамадонӣ, Фархор, Муъминобод намояндагони кумитаи миллии ҳамоҳангсозии мубориза бар зидди бемориҳои пайдошудаи норасоии масуният, сил ва вараҷа, Агентии ИМА оид ба рушди байналмилалӣ, сохторҳои тандурустии марбута, Сафирони пешгирии сил, табибон, донишҷӯён, шахсони аз сил шифоёфта, намояндагони ташкилотҳои ҷамъиятӣ ва ҳамчунин намояндагони васоити ахбори омма иштирок доштанд.
Чорабинӣ бо сухани ифтитоҳӣ раиси шаҳри Кӯлоб Назарзода Бахтиёр Худоёр оғоз гардида, меҳмоноро ба ин сарзамини куҳанбунёду овозадор ва меҳмоннавоз, яъне Кӯлобшаҳри бостонӣ хайрамақдам гуфт.
Роҳбарияти шаҳри зимни суханронӣ иброз доштанд, ки лоиҳаи «Ҷомеаи ман бидуни сил» оид ба пешгирӣ ва табобати яке аз бемориҳои вазнинтарини олам ба ҳисоб рафта, баргузории чунин чорабиниҳо баҳри пешгирии ин бемори аз манфиат холӣ нест.
Гуфта шуд, ки ба ақидаи мутахассисон сил бемории марговартарин дар байни касалиҳои сироятӣ мебошад. Ҳар сол дар олам ҳазорон нафар аз ин касалии даҳшатбор мефавтанд. Барои табобати як бемор аз 80 то 10000 долари амрикоӣ масраф мешавад. Он бемории сироятӣ яъне гузаранда мебошад. Боиси осеби шуш ва баъзан дигар узвҳои бадан мегардад. Аз қадиммулаём вуҷуд дорад ва ба инсон маълум мебошад. Табобатшаванда ва пешгиришаванда аст.
Таъкид гардид, ки ҳадаф аз баргузории чунин чорабинӣ пешгирӣ, дарёфт ва табобати саривақтии ҳолатҳои бемории сил дар байни аҳолӣ тавассути ҷалби ҷомеаи маҳаллӣ ва дастгирии беморон мебошанд.
Дар идома Вакили Маҷлиси намояндагони Маҷлиси Олии Ҷумҳурии Тоҷикистон, Раиси Анҷумани миллии сил Муртазозода Ҷамшед, муовини Вазири тандурустӣ ва ҳифзи иҷтимоии аҳолии кишвар Амирзода Абдухолиқ, намояндагони кумитаи миллии ҳамоҳангсозии мубориза бар зидди бемориҳои пайдошудаи норасоии масуният, сил ва вараҷа Зиёвуддин Авғонов, Агентии ИМА оид ба рушди байналмилалӣ бо маърӯзаҳои пурмуҳтавои худ баромад намуданд.
Инчунин дигар коршиносон аз фаъолиятҳои афзалиятнок сухан гуфта, дар бораи вазъи эпидемиологии шаҳру ноҳияҳои минтақаи Кӯлоб маълумот доданд. Дар баробари ин, ҳадафу мақсад ва вазифаҳои лоиҳа аз ҷониби масъулин шарҳ дода шуд.
Зимни муколама мутахассисони соҳаи тиб, фаъолони ҷомеаи шаҳрвандӣ ва шахсони аз сил осебдида аз мушкилот ва имкониятҳои лоиҳа муҳокима намуданд.
Қисмате аз чорабинӣ барномаҳои фарҳангӣ, аз қабили таронаву рақсу ҳаҷв дар иҷрои Сафирони пешгирии сил – овозхонони шинохта, Ҳабиб Ҳакимов, ҳаҷвнигор Муқимҷон Абдуфаттоев ва дигар гурӯҳҳои ҳунари бахши фарҳанги мақомоти иҷроияи ҳокимияти давлатии шаҳри Кӯлоб пешниҳоди аҳли толор карда шуд.
Бахши матбуотии МИҲД-и шаҳри Кӯлоб
Санаи 18 апрели соли равон дар толори Мақомоти иҷроияи ҳокимияти давлатии шаҳри Кӯлоб ҷаласаи назоратии раиси шаҳр Назарзода Бахтиёр Худоёр баргузор гардид.
Дар ҷаласа муовинони раиси шаҳр, роҳбари дастгоҳ, мудирони шуъбаву бахшҳои мақомоти иҷроияи ҳокимияти давлатии шаҳри Кӯлоб, сардорони раёсатҳо, раисони ҷамоатҳои деҳот, масъулони ташкилоту муассисаҳо ва дигар шахсони масъул иштирок доштанд.
Ҷаласаро ба сухани муқаддимавӣ раиси шаҳр ифтитоҳ бахшида, изҳор намуданд, ки ба хотири дар амал татбиқ намудани дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корбариро бояд дар ҳамаи ҷамоатҳои деҳоти шаҳр аз ҷониби масъулини ҳар як соҳа ва тамоми кормандон боз ҳам беҳтару хубтар ба роҳ монда, то ба ҳадафҳои ниҳоӣ ва рушду пешрафти шаҳрамон ноил гардем.
Дар идомаи ҷаласа ҳамчунин, муовини раиси шаҳр, (ҳамзамон раиси комиссияи даъватӣ) Ҳамидиён Орзу оид ба рафти омодагиҳои даъвати ҷавонон ба сафи Қувваҳои Мусаллаҳи Ҷумҳурии Тоҷикистон маълумот пешниҳод намуд.
Сипас, раиси шаҳри Кӯлоб Назарзода Бахтиёр ба масъулин оид ба сафарбарнамоӣ ба сафи Қувваҳои Мусаллаҳ дастуру супоришҳои мушаххас дода, таъкид намуд, ки нақшаи сафарии даъватшавандагон ба хизмати ҳарбӣ бояд дар наздиктарин фурсат анҷом ёбад.
Баъдан, мудири бахши сармоягузорӣ ва идораи амволи давлатии мақомоти иҷроияи ҳокимияти давлатии шаҳри Кӯлоб Сафарализода Саидҳомид оид ба рафти иҷрои Қонуни Ҷуҳурии Тоҷикистон аз 2 июни соли 2021, №1802 “Дар бораи авф бинобар қонунгардонии дороиҳо ва маблағҳои шаҳрвандони Ҷумҳурии Тоҷикистон суханронӣ намуд.
Ҳамчунин, дар маҷлиси назоратӣ сармутахассис-ҳуқуқшиноси дастгоҳи раиси шаҳр Амирҷон Гулмадов оид ба пешниҳодҳои Прокуратураи шаҳри Кӯлоб ва пешниҳоди шуъбаи 1-и Вазорати корҳои дохилӣ дар ноҳияи Рӯдакӣ баромад намуд.
Дар идомаи кори ҷаласаи имрӯза инчунин, масъалаҳои вобаста ба иҷроиши андозҳои маҳаллӣ, сари вақт пардохт намудани музди меҳнати кормандон, раванди кишти баҳорӣ, ва корҳои соҳилмустаҳкамкунӣ, таъмири роҳҳо, бартараф намудани мушкилиҳои симчӯб дар ҷамоатҳо, фаъолияти корхонаҳои саноатӣ, сохтмону бунёди иншоотҳо ва назоратии қатъии он аз ҷониби сармеъмори шаҳр, шинонидани гулҳои мавсимӣ дар хиёбону кӯчаҳои марказии шаҳр, таъмини об ба аҳолӣ ва дигар масъалаҳои ҷорӣ мавриди баррасӣ қарор дода шуд.
Баъди баррасии масъалаҳои ҷаласаи мазкур раиси шаҳри Кӯлоб Назарзода Бахтиёр Худоёр ба роҳбарони ташкилоту муассисаҳо ҷиҳати дар амал татбиқ кардани нишондиҳандаҳои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, иҷрои супоришҳои қаблии раиси шаҳр, дастурҳои маҷлиси навбатии Мақомоти иҷроияи ҳокимияти давлатии шаҳри Кӯлоб, вусъати корҳои ободонӣ, ташкили дурусти корҳо дар самти кишту кори баҳорӣ ва дигар масъалаҳои мубрами рӯз, супоришҳои мушаххас доданд.
Бахши матбуотии МИҲД-и шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
