Имрӯз, ки Тоҷикистон соҳибистиқлол шудааст ва дар ҷаҳон мавқеи худро ёфта, ҳамчун як узви ҷомеаи ҷаҳонӣ эътироф шуда, пеш рафта истодааст ва ин барои баъзе қувваҳои дохилию берунӣ писанд нест ва онҳо мехоҳанд, ки ҷомеаи мо ноором бошад, аз ин лиҳоз ҳар гуна ҳизбу ҳаракатҳои бегонаро дастгирӣ менамоянд. Аз ин ҷо, мо бояд ҳушёр бошем, дар атрофи Сарвари давлат ва Ҳукумати Тоҷикистон муттаҳид гардида, худшиносӣ ва ғурури миллиамонро баланд бардорем, Ватанамонро, ки Тоҷикистон ном дорад, ҳифз намоем ва обод созем. Парчами ваҳдати миллиро ҳамеша боло бардорем.
Ҷумҳурии Тоҷикистон баъди ба даст овардани Истиқлолияти давлатӣ ба марҳилаи нави инкишофи таърихӣ-бунёди давлати соҳибихтиёр, демократӣ, ҳуқуқбунёд, дунявӣ, ягона ва иҷтимоӣ ворид гардида, баҳри таҳкими ваҳдати миллӣ ва сулҳу осоиш дар кишвар тамоми соҳаҳои фаъолияти ҳаёти давлативу ҷамъиятиро сафарбар менамояд.
Тоҷикистон ҳамчун давлати соҳибистиқлол, ки 31-солагии онро дар фазои суботи сиёсии осуда таҷлил намуд, дар баробари дигар кишварҳои ҷаҳон аз таъсири имконпазири рӯйдоду таҳаввулоти манфии ҷомеаи ҷаҳонӣ истисно намебошад.
Имрӯз яке аз масъалаҳои муҳим ва ногуворе, ки ҷомеаи ҷаҳонӣ ва ҷумҳурии моро низ ба ташвиш овардааст, терроризм ва ифротгароӣ мебошад. Терроризм ва ифротгароӣ яке аз зуҳуроти номатлуб дар замони имрўза ба шумор меравад, зеро он боиси ба миён омадани оқибатҳои нохуш таҳдид ё истифодаи зўроварӣ, расонидани зарари вазнин, бенизомӣ, тағйири сохти конститутсионӣ дар мамлакат, ғасби ҳокимият ва аз они худ кардани ваколатҳои он, барангехтани низои миллӣ, иҷтимоӣ ва динӣ мебошад.
Вазъи мураккаби геополитикии ҷаҳони муосир ва паҳншавии зуҳуроти номатлубу даҳшатовар дар мисоли терроризм ва экстремизм, ки барои ҷомеаи башар, сулҳу субот, амнияти давлат ва рушди устувори ҷомеа таҳдиди бевосита менамояд, на танҳо Ҷумҳурии Тоҷикистон, балки сайёраро ба ташвиш овардааст. Бо дар назардошти чунин омилҳо, ки ба амнияту давлати ҳар як кишвар таъсири манфӣ мерасонад, аз ҷониби роҳбарияти Вазорати корҳои дохилӣ пайваста дар ин самт чорабиниҳои мақсаднок гузаронида мешавад, ки мо омӯзгорон пайваста иштирок менамоем ва ҳамкории худро бо корманадони Вазорати корҳои дохилӣ пурзӯртар мегардонем.
Дар ҷаҳони муосир равандҳо ва зуҳуроте мавҷуданд, ки на танҳо ба як кишвар ва ё як минтақа, балки ба тамоми кишварҳои ҷаҳон ва дар маҷмӯъ ба кулли мардумони сайёра таҳдид мекунанд. Яке аз чунин зуҳуроти номатлуб, ки хатари минтақавию байналмилалиро ба бор оварда, дар ҳама минтақаҳои олам тамоюли паҳншавиро дорад, терроризм ва экстремизм мебошад, ки боиси таваҷҷуҳи ҳаматарафаи созмону ташкилотҳои байналмилалӣ ва давлатҳои ҷаҳон гардидааст. Ҳарчанд падидаҳои ҷойдошта мавҷуди ин аср нестанд, вале дар баробари асри нав симои навро ба худ гирифта, моҳияти онҳо шакли муташаккилтару мураккаби зоҳиршавиро пайдо кардааст. Имрӯз ва дар оянда низ терроризм ва экстремизм ҳамчун хавфноктарин таҳдидҳо барои инсоният ва ҷомеаи умумибашарӣ боқӣ монда, бо истифода аз технологияи муосир, ки босуръат рушд намуда истодааст, тарзу усулҳои нави истифодабариро ба худ касб мекунад. Барои мисол, дар як даҳсолаи охир садҳо ҳазор нафар мардуми осоишта қурбони амалҳои террористӣ ва экстремистӣ гардида, ҳазорҳо нафари дигар маъюбу корношоям шуданд. Ҳалокати ҳазорон мардуми осоиштаи сайёра, алалхусус қисми осебпазири ҷомеа занону кӯдакон аз ин хатари марговар гувоҳи он аст, ки ин амалу кирдори ваҳшиёна ба касеву чизе раҳм надорад ва ҳамчун василаи амалӣ сохтани ҳадафу мақсадҳои нопок аз ҷониби як тӯдаи аз фарҳангу маърифат дур, бехирад ва ҷоҳилу нотавонбин истифода мегардад.
Ифротгароён бо шиорҳои динӣ баромад намуда, ҳарф мезананд ва амалҳову аъмоли худро аҳкоми динӣ мешуморанд. Аммо, ҳамаи ин ба хотири сӯистифода аз шуури динии мардум равона шуда, ҳеҷ робитаро ба арзишҳои динӣ ва аҳкоми он надорад. Дар ин бора Пешвои миллат Эмомалӣ Раҳмон низ пайваста чунин иброз медоранд: “терроризм ба ягон дин, мазҳаб ё миллат хос нест, яъне террорист ватан, миллат ва дину мазҳаб надорад”.
Махсусан, ин нуктаро Асосгузори сулҳу Ваҳдат Пешвои миллат, Президенти кишвар Эмомалӣ Раҳмон дар Паёми навбатии худашон ба Маҷлиси Олӣ иброз доштанд, ки масъалаи «мубориза бар зидди терроризм ва экстремизм, хурофотпарастиву ифротгароӣ» ва ҳифзи манфиатҳои миллию давлатӣ яке аз самтҳои муҳими фаъолияти идеологии муассисаҳои илмӣ, миёнаи касбӣ ва умумӣ мебошад.
Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳар як Паёми солонаи хеш ба Маҷлиси Олии Ҷумҳурии Тоҷикистон оид ба ҷамъбасти масъалаҳои муҳими сол ва дурнамои соли минбаъда суханронӣ менамоянд, ки дар оғози ҳар Паём пеш аз баррасии вазъи соҳаҳои ҳаёти ҷомеа, вазъи мавҷудаи байналмилалӣ ба таври мухтасар баён мегардад.
Ҷумҳурии мо дар заминаи ба даст овардани Истиқлолияти давлатӣ ва барқарорсозии Ваҳдати миллӣ мушкилиҳои зиёд ва манфури сиёсиву иқтисодӣ, иҷтимоиву фарҳангиро пушти сар намуд, ки хисороти зиёди пулию молиро ба вуҷуд оварданд. Аз ин рӯ мебояд, кишвари мо барои таҳкими пояҳои Истиқлолияти давлатӣ, пойдории Ваҳдати миллӣ ва таъмини суботи комил барои пешгирӣ, аз байн бурдан ва несту нобуд кардани омилҳои манфии сиёсии ҷомеаи имрӯза, махсусан терроризму экстремизм зарурат дорад.
Экстремизм аз вожаи фаронсавии «ехtrеmismе» ва лотинии «eхtrеmus» гирифта шуда, маънои луғавиаш ифротгароӣ, тундравӣ, фикру андешаҳо ва амалҳои тундравона, аз ҳад гузаштан, аз андоза гузаштанро дорад. Экстремист шахсест, ки дар фаъолияти худ ҷонибдори амалҳои якравию тундравӣ аст. Ин амалу зуҳурот метавонад, дар тамоми соҳаҳои фаъолияти инсон дар дин, сиёсат, идеология, илм ва ҳатто дар варзиш низ ба миён ояд.
Терроризм худ падидаи номатлуби ҷомеаи навин буда, фаҳмиши он дар содир кардани ҷиноятҳои вазнин, аз қабили қатлу куштори инсон, ба гаравгон гирифтани одамон, тарконидани иншоотҳои гуногуни истеҳсолӣ ва маишиву фароғатӣ, рабудани воситаҳои гуногуни нақлиётӣ ва амсоли инҳо дониста мешавад. Экстремизм бошад, хислати ҷӯдоихоҳӣ, ифротгароӣ ва иғвоангезиро доро буда, бо терроризм алоқаи ногусастанӣ дорад. Бо тарзи дигар, мақсад ва оқибати экстремизм ин терроризм аст. Вале дар умум чунин баҳогузорӣ мебояд намуд, ки ҳарду ба истилоҳ комилан хатари калони парокандагиву бесарусомониро доро буда, оқибати басо нанговар доранд.
Бояд тазаккур дод, ки ҳаракатҳои террористӣ дар миқёси олам гуногун буда, онҳоро асосан ду унсури умумӣ бо ҳам муттаҳид мекунад: аввалан, онҳо барои халалдор сохтани амнияти ҷамъиятӣ ва суст намудани пояҳои ҳокимияти давлатӣ равона гардида ва дигар ин, ки ин ҳаракатҳо дар байни аҳолӣ ҳиссиёти тарс, оҷизиро ба вуҷуд меоваранд.
Дар тафсири Кодекси ҷиноятии Ҷумҳурии Тоҷикистон бошад, мақсадҳои терроризм чунин шарҳ додашудааст: “Мақсади ибтидоии терроризм халалдор сохтани амнияти ҷамъиятӣ, тарсонидаи одамон, ба воҳима ва таҳлука овардани аҳолӣ буда, тавассути он фишор овардан ба мақомоти давлатист. Чунин ҳаракатҳо мақсади ниҳоии ҷинояткоронро дар маҷбур сохтани мақомоти давлатӣ барои қабули қарори ғайриҳуқуқӣ мебошад, ки ба манфиати онҳост ва ё бо мақсади резонидани обрӯ ва манзалати мақомоти давлатист”. Мутаассифона дар натиҷаи чунин амалиёти террористии бо номи исломиён шумораи зиёди аҳолии бегуноҳ ба ҳалокат расида, нисбат ба дини мубини ислом ҳисси бадбинии мардуми ғайримусулмонро ба вуҷуд оварда, барои пешрафти давлатҳои мусулмонӣ монеаҳои ҷиддӣ эҷод намуда истодааст. Паёмадҳои амалҳои тундгароӣ, ифротгароӣ ва террористӣ бешубҳа на ба манфиати башарият ва на ба манфиати халқҳои мусулмони дунё мебошад. Хисороти моддию маънавӣ дар натиҷаи содир намудани амалҳои террористӣ низ беҳисоб аст.
Дар ҷомеаи имрӯзаи Тоҷикистон ва дар замири ҳар як шахси ба ин гурӯҳҳо ва ҳаракатҳо пайвастшаванда ақидаи гурӯҳи аввали олимони ҷомеашинос мувофиқ меояд, чунки маҳз ҷанбаҳои иҷтимоӣ дар зиндагӣ ва сатҳи нопурраи тафаккури маънавӣ ба ин роҳ шахсро водор месозад.
Ифротгароии динӣ аз ҷиҳати динӣ асосноккунии фаъолиятӣ бо дин рўйпўшкардашудае аст, ки бо зўран ғасб намудани ҳокимият, халалдор кардани истиқлолият ва якпорчагии давлат бо ин мақсад барангехтани душманӣ ва бадбинии динӣ равона карда шудааст, ки дар асл дини мубини Ислом инро намехоҳад. Имрўз ба ҳамагон маълум аст, ки иддае аз дини поки Ислом сўйи истифода намуда даст бар қатли бузургону тифлони ноболиғ мезананд, аммо дар асл аз аркон ва моҳияти ин дини пок бохабар нестанд ё агар бохабар бошанд ҳам онро на ба манфиати дин, ҷомеа ва аҳли он, балки ба манфиати нопоки хеш истифода мебаранд.
Ба ақидаи аксар олимон низ экстремизм дар дин бештар хусусияти ҷалбнамоиро созгор мебошад ва он дар тамоми гӯшаву канори олам ба мушоҳида мерасад. Зеро дар бисёр мавридҳо ба назар мерасад, ки ифротгароён дар зери шиорҳои динӣ баромад намуда, аз номи дин ҳарф мезананд ва амалҳову аъмоли худро аҳкоми динӣ мешуморанд, ки ин пеш аз ҳама, ба хотири сӯистифода аз шуури динии мардум равона гардида, ҳеҷ рабте ба арзишҳои динӣ ва аҳкоми он надорад. Яъне, ин амалкарда ва рафтори барғалат боз ҳам аз бединию хоинӣ ва ақоиди пасти чунин гурӯҳҳо дарак медиҳад.
Чуноне ки сарвари давлат, Пешвои миллат муҳтарам Эмомалӣ Раҳмон аз сатҳи баланди созмонҳои бонуфузи байналмилалӣ пайваста иброз медоранд, “терроризм ба ягон дин, мазҳаб ё миллат хос нест, яъне террорист ватан, миллат ва дину мазҳаб надорад”, гувоҳӣ он аст, ки ин амалҳои номатлуб рабте ба ягон дин ва аҳкоми он надоранд.
Аз ин рӯ, ҳар як фарди соҳибшуур ва бомаърифати ҷомеа, махсусан ҷавононро, ки қисми асосии ҷамъиятро ташкил медиҳанд месазад ба ин афкори барғалати чеҳраҳои сиёсии ноаён фирефта нашаванд, дар ҷустуҷӯи омӯзиш, аз барнамоӣ ва ғанигардонии маърифати ахлоқӣ, ҳуқуқӣ ва сиёсии хеш бошанд, то дар таҳкими суботи комили сиёсии Тоҷикистони азиз поягузор бошанд. Чунки суботу амнияти Тоҷикистон, устувории ҷойгоҳи Тоҷикистон дар сатҳи ҷаҳонӣ ва амнияту осудагии марзҳои давлатии Ҷумҳурии Тоҷикистон барои ҳар яки мо арзиши муҳим ва калидӣ дорад.
Ҷумҳурии Тоҷикистон дар радифи дигар кишварҳои ҷаҳон бо ин зуҳуроти номатлуб мубориза бурда, талош менамояд, то ки аз пайомади ногувори ин гуна амалҳо ҷилавгирӣ намояд. Вобаста ба ин ва баҳри тадбиқи сиёсати давлатӣ дар ин самт, аз ҷониби Ҳукумати мамлакат як қатор санадҳои меъёрии ҳуқуқӣ ва зерқонунӣ қабул ва мавриди амал қарор дода шудаанд, ки бо мақсади таъмини ҳифзи амният, шаҳрвандони он ва дигар шахсони дар қаламрави он қарордошта, аз таҳдиди терроризм ва экстремизм (ифротгароӣ), тадбиқи уҳдадориҳои байналмилалии Ҷумҳурии Тоҷикистон дар соҳаи мубориза бар зидди терроризм ва экстремизм, танзими ҳуқуқии муносибатҳои вобаста ба мубориза бар зидди терроризм ва экстремизм, барҳам додани таҳдиди терроризм ва экстремизм (ифротгароӣ) дар қаламрави кишвар, ошкор намудан, аз байн бурдан ва пешгирии сабаб ва шароитҳое, ки боиси ба миён омадан ва паҳн шудани терроризм ва экстремизм (ифротгароӣ) мегарданд, инчунин рафъи оқибатҳои ҷиноятҳои дорои хусусияти террористӣ ва экстремистидошта, равона гардидаанд.
Ҳамин тариқ, дар баробари муқаррароти танзимкунандаи фаъолияти давлатӣ ва баҳри амалинамоии онҳо дар самти мубориза бар зидди терроризм ва экстремизм фаъолияти якҷояи қишрҳои гуногуни ҷомеа талаб карда мешавад. Яъне имрӯз танҳо муборизаи дастаҷамъонаи мақомоти ҳифзи ҳуқуқ, мусоидати аҳолӣ бо мақомот ва ҳушёрию зиракии мардум имкон медиҳад, ки пеши роҳи ин омилҳои манфӣ гирифта шавад, то ки суботу оромӣ таъмин ва ҳар як фард дар ватани азизи хеш Тоҷикистони соҳибистиқлол зиндагии ободу осоишта ба сар барад. Инчунин, мо ҷавонон ҳамчун нерӯи пешбаранда, ворисони асилу арзандаи миллату давлат ва созандагони имрӯзу фардои Тоҷикистони азиз бо ҳисси баланди миллӣ пояҳои давлатдории миллиамонро ҳамчун гавҳари ноёб эҳтирому нигоҳ медорем, ҳамчун нерӯи бузурги созанда ва сипари боэътимоди давлатамон бар зидди ҳама гуна хатари терроризму экстремизм бо роҳҳои пешбини намудаи қонунгузорӣ мубориза мебарем.
Хулоса, ҳар як шаҳрванди Тоҷикистонро мебояд баҳри ҳифзи ватан аз ин хатарҳои муосир камари сидқу садоқат бандад ва баҳри пойдории сулҳу субот ва амнияти миллӣ содиқона ба ватан хизмат намояд. Хусусан ҷавонони меҳанро мебояд зиракии сиёсиро аз даст надода фирефтаи гурӯҳҳои террористӣ ва экстремистӣ нашаванд.
Ба ҳамин хотир моро зарур аст, ки баҳри ҳимояи манфиатҳои миллӣ ҳамеша кӯшиш намуда, манфиатҳои шахсиро дар зинаи охир бимонем ва ҳамеша дӯстдори Ватани маҳбубамон бошем. Мо дар якҷоягӣ метавонем бар зидди ҳамагуна зуҳуроти номатлуб муборизаи беамон барем. Пас даст бар дасти ҳам монда кӯшиш намоем, баҳри муҳофизати ин марзу бум ҷони худро дареғ надошта, содиқонаю софдилона хизмати арзандае намоем.
Мунзима Нумонзода - омӯзгор
Дар маҷлисгоҳи мақомоти иҷроияи ҳокимияти давлатии шаҳри Кӯлоб таҳти роҳбарии раиси шаҳр Назарзода Бахтиёр Худоёр бо иштироки муовини раиси вилояти Хатлон Қурбонзода Амирхон, муовини якуми роҳбари гуруҳи кории Ҳукумати Ҷумҳурии Тоҷикистон дар шаҳри Кӯлоб Бег Сабуров, муовинон ва роҳбари дастгоҳи раиси шаҳри Кӯлоб, роҳбарони мақомотҳои ҳифзи ҳуқуқ, сардорони раёсатҳо, мудирони шуъбаву бахшҳои дастгоҳ ва мақомоти иҷроияи ҳокимияти давлатӣ, роҳбарони ташкилоту муассисаҳо, раисони ҷамоатҳо, масъулони муассисаҳои таълимию тиббии шаҳр, имомхатибони масҷидҳои ҷомеъ, намояндагони васоити ахбори омма ва дигар шахсони масъул ҷаласаи ҷамъбастӣ аз рӯйи натиҷаи фаъолияти шаҳрдорӣ давоми 6 моҳи соли ҷорӣ баргузор гардид.
Нахуст, Роҳбарияти шаҳри Кӯлоб Назарзода Бахтиёр Худоёр суханронӣ намуда, рӯзномаи маҷлисро ба ҳозирин ироа намуд.
Сипас, Асозода Манучеҳр, муовини раиси шаҳр доир ба бурду бохти хоҷагии халқи шаҳр дар шашмоҳаи соли равон иттилоъ дода, аз ҷумла афзуд, ки мақомоти иҷроияи ҳокимияти давлатии шаҳри Кӯлоб дар асоси Конститутсияи Ҷумҳурии Тоҷикистон, Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», дастуру супоришҳои Асосгузори сулҳу ваҳдати миллӣ,Пешвои миллат Президенти Ҷумҳурии Тоҷикистон муҳтарам Эмомалӣ Раҳмон, ки аз Паём ба Маҷлиси Олии Ҷумҳурии Тоҷикистон аз 23 декабри соли 2022 бармеоянд, қарорҳои Ҳукумати Ҷумҳурии Тоҷикистон ва супоришҳои раиси вилояти Хатлон дар 6 моҳи соли ҷорӣ корҳои муайянро ба анҷом расонида, дар натиҷа аксарияти нишондиҳандаҳои иҷтимоию иқтисодии шаҳр дар давраи ҳисоботӣ бо натиҷаҳои назаррас ҷамъбаст гардид.
Бояд қайд намуд, ки бо дастгирии бевоситаи муҳтарам Пешвои миллат Барномаи рушди иҷтимоию иқтисодии шаҳри Кӯлоб барои солҳои 2020-2025 бо қарори Ҳукумати Ҷумҳурии Тоҷикистон аз 25 июни соли 2020, №389 тасдиқ карда шуд. Ҳадафҳои асосии Барнома таъмини рушди устувори иктисодии шаҳр, таъсиси корхонаҳои нави истеҳсолӣ, баланд намудани ҳосилнокии зироатҳои кишоварзӣ, рушди соҳаи иҷтимоӣ, беҳтар намудани ҳолати инфрасохтори мавҷуда, ташкили ҷойҳои нави корӣ ва дар ин замина баланд бардоштани сатҳу сифати зиндагии аҳолии шаҳру деҳот мебошад.
Мавриди зикр аст, дар давоми нимсолаи якуми соли ҷорӣ гурӯҳи корӣ бо роҳбарии раиси шаҳр, муовини соҳавии раиси шаҳру шахсони масъул 3 маротиба ба шаҳри Душанбе сафари корӣ анҷом дода, оид ба ҳалли масъалаҳои марбут ба Барномаи рушди иҷтимоию иқтисодии шаҳри Кӯлоб бароисолҳои 2020-2025 назди вазорату идораҳо масъалагузорӣ кард.
Ба ҳолати 1 июли соли 2023 ҳамагӣ дар иҷрои барномаи мазкур 830,6 млн. сомонӣ аз худ шудааст, ки дар 5 сол 11,8 фоиз ва дар 3 сол 14,8 фоизро ташкил медиҳад. Дар моҳи июни соли 2023 лоиҳаи “Бо оби полезӣ таъмин намудани шаҳри Кӯлоб аз дарёи Панҷ” ба маблағи 381,5 миллион сомонӣ (35 млн. доллари ИМА) оғоз гардид.
Ҷиҳати таъмини иҷрои нақшаи қисми даромади буҷети маҳаллӣ чораҳои дахлдор амалӣ гардида, дар натиҷа дар 6 моҳи соли 2023 нақшаи андозҳо111,4 фоиз иҷро гардид, ки нисбати нақша 6,8 млн. сомонӣ зиёд мебошад.
Мақомоти иҷроияи ҳокимияти давлатии шаҳр барои рушди соҳаи саноат- соҳаи афзалиятноки иқтисодии шаҳр ва бо назардошти эълон гардидани солҳои 2022-2026 “Солҳои рушди саноат” чораҳои дахлдорро амалӣ намуда истодааст. Дар шаҳру деҳоти Кӯлоб ҳамагӣ 82 корхонаҳои саноатӣ фаъолият дошта, барои таъмини фаъолияти самараноки онҳо, бунёди корхона ва коргоҳҳои нав мунтазам вохӯрии раиси шаҳр бо роҳбарону соҳибмулкони корхонаҳои саноатӣ ва соҳибкороне, ки қитъаи замин барои бунёди корхонаҳо гирифтаанд, доир карда мешавад. –афзуд дар баромади хеш муовини раиси шаҳри Кӯлоб Манучеҳр Асозода.
Асозода Манучеҳр дар ҷараёни баромади худ доир ба фаъолияти дигар бахшҳои хоҷагидории шаҳр низ маълумоти муфассал дод.
Ҳамчунин дар идомаи ҷаласаи ҷамъбастӣ, Абдуқайюм Назаров, муовини сардори ҶДММ Vahdat Textile, Илҳомҷони Саид, раиси ҷамоати деҳоти Зарбдор, Кишваров Наврӯз, сардори ҶСК Шабакаҳои барқи шаҳри Кӯлоб, Достиев Ғиёсиддин, директори корхонаи фаръии давлатии “Хоҷагии комуналӣ”-и назди МИҲД-и шаҳри Кӯлоб оиди нишондиҳандаҳои муҳими рушди фаъолити ҷамоат ва корхонаҳо маълумоти муфассал пешниҳод намуданд.
Сипас, Раиси шаҳри Кӯлоб Назарзода Бахтиёр Худоёр доир ба соҳаҳои маорифу тиб, занон, ҷавонон, ноболиғон аз масъулини дахлдор пурсиш ба амал оварда, барои бартараф намудани мушкилот ва ҷоннок намудани корҳои фаҳмондадиҳӣ байни аҳолӣ, тарғиби дастовардҳои Истиқлолият, Ваҳдат миллӣ ва ғайра дастуру супоришҳо дод.
Зимни баррасии ҷодаи иқтисодиёт аз масъулини соҳаи саноат даъват ба амал оварда шуд, ки фаъолияти ширкату корхонаҳоро ҳамоҳангсозӣ намуда, барои иҷрои нақшаи буҷет, зиёд намудани ҳаҷми истеҳсолот, афзун намудани ҷойҳои нави корӣ тадбирҳо андешанд.
Дар ҷараёни ҷаласа ҳамзамон ҷиҳати тақвияти корҳои ободонию созандагӣ, дастгирии мутахасисони ҷавон, риояи қонунгузории танзими расму оин, баланд бардоштани сатҳи хизматрасонии коммуналӣ, сафарбар намудани ҷавонон ба хизмати ҳарбӣ, масъулини дахлдор муваззаф гардиданд.
Зимни баррасии мавзуъҳои матраҳгардида Қурбонзода Амирхон, муовини Раиси вилояти Хатлон ва муовини якуми роҳбари гуруҳи кории Ҳукумати Ҷумҳурии Тоҷикистон дар шаҳри Кӯлоб Бег Сабуров бо таҳлилҳои амиқ ва ояндабинӣ фикру андешаҳои хешро баён доштанд.
Раиси шаҳри Кӯлоб Назарзода Бахтиёр Худоёр ҷаласаро натиҷабардорӣ намуда, аз ҷумла афзуд, ки дар оянда низ Мақомоти иҷроияи ҳокимияти давлатии шаҳр ҷиҳати дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, нишондодҳои Раиси вилояти Хатлон Давлаталӣ Саид ва истиқболи сазовори ҷашни 35-солагии Истиқлоли давлатии Ҷумҳурии Тоҷикистон тадбирҳои муассир меандешад ва аз масъулин даъват ба амал овард, ки дар иҷрои вазифаҳои ба зиммадошта масъулиятшинос бошем, то ин ки ба натиҷаҳои мусбӣ ноил гардем.
Бахши матбуотии МИҲД-шаҳри Кӯлоб
«Ман ба кӯдакони ятиму бепарастор, маъюбону пиронсолони бесаробон муроҷиат карда, изҳор менамоям, ки шумоёнро ҳаргиз хору зор шудан намемонам ва ҳеҷ гоҳ бесоҳиб намегузорам».
Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон
Боиси зикр аст, ки ҳамасола 8-уми июл дар саросари кишварамон Рӯзи маъюбон таҷлил карда мешавад, ки далели эътибори Ҳукумати мамлакат ва Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон нисбати инсонҳоест, ки бо амри тақдир маъюбанд, вале тавассути иродаи матину мустаҳкамашон побанди тақдир нестанд, балки тақдирсозанд, рӯҳафтода нестанд ва ҳамеша сарбаланданд.
Бахшида ба ин рӯз дар боғи фарҳангӣ-фароғатӣ ба номи Мир Сайи Алии Ҳамадонии шаҳри Кӯлоб бо иштироки муовини раиси шаҳр Даминзода Арафамо ва дигар фаъолон чорабинии бошукуҳ баргузор карда шуд.
Нахуст, иштирокчиён аз намоиши ҳунарҳои маҳсули дастии шахсони имконияташон маҳдуд боздид намуда, ба ҳунари волои ин табақа баҳои баланд доданд.
Сипас, муовини раиси шаҳри Кӯлоб Даминзода Арафамо ин табақаи эҳтиёҷманди чомеаро аз номи роҳбарияти мақомоти иҷроияи ҳокимияти давлатии шаҳри Кӯлоб муҳтарам Назарзода Бахтиёр Худоёр ба муносибати ҷашнашон табрику таҳният намуда, изҳор дошт, ки таваҷҷӯҳу ғамхорӣ нисбат ба маъюбону пиронсолон, шахсони яккаву танҳо ва ба меҳрубонӣ ниёздошта дар меҳвари сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Инчунин, таваҷҷӯҳи доимӣ аз ҷониби Ҳукумати кишвар ба маъюбон, ҷорӣ кардани имтиёз ва аёдати ин қабил ашхос дар рӯзҳои иду айём, аз тадбирҳое маҳсуб меёбанд, ки барои дастгирии моддию маънавӣ равона карда шудааст. Дар идома дигар иштирокчиён низ баромад намуда, ба шахсони имконияташон маҳдуд ва боиродаву сарбаланд умри бардавом, сарсабзию сарфарозӣ ва дастархони шодро таманно намуданд.
Дар идомаи чорабинӣ ба як қатор фаъолон барои саҳми арзанда гузоштан дар таълиму тарбияи кӯдакони имконияташон маҳдуд ва дар руҳияи ватандӯстиву худшиносӣ тарбия намудани онҳо бахшида ба Рӯзи маъюбон дар Тоҷикистон бо Сипосномаи мақомоти иҷроияи ҳокимияти давлатии шаҳри Кӯлоб сарфароз гардонида шуданд.
Ҳамчунин, ба кӯдакони имконияташон маҳдуд туҳфаҳои хотиравиии мақомоти иҷроияи ҳокимияти давлатии шаҳри Кӯлоб тақдим карда шуд.
Дар охир барномаи пурмуҳтавои фарҳангӣ аз тарафи санъаткорони шинохтаи бахши фарҳанги мақомоти иҷроияи ҳокимияти давлатии шаҳри Кӯлоб ва маъюбони боистеъдод пешниҳоди ҳозирин намуданд.
Бахши матбуотии МИҲД-и шаҳри Кӯлоб
Файзи Ашӯр аз ҷумлаи шоирони хушзавқ ва пурталош аст, ки кӯшиш мекунад суханаш бикр, нигоҳаш нав ва ҳарфаш барҷой бошад. Ин хусусиятро дар маҷмуаҳои шеърии ба нашррасидаи ӯ баръало эҳсос мекунем. Ӯ дар ҳар як маҷмуа, ки ба нашр мерасонад дигаргунӣ ва таҳаввулӣ эҷодӣ дорад ва давра ба давра, маҷмуа ба маҷмуа рушд мекунад. Маҳсули эҷодаш боиси ба дасти хонанда расидани маҷмуаҳои шеърии “Карашмаи субҳ”, “Касби падар”, “Хоки роҳ”, “Ғамномаи нотамом”, “Дунёи саҳна”, “Ғизои андеша”, “Рози оина” ва “Аз пайроҳа то роҳ” гардидааст, ки ҳамагӣ аз ҷониби хонандагон истиқболи гарм ёфтанд. “Оре, манам дарахт”, маҷмуаи навбатии ашъори Файзи Ашӯр аст, ки соли 2021 дар нашриёти “Адиб” ба табъ расидаасту дар он шеъру ғазал ва манзумаҳову нигоштаҳои дар солҳои гуногун эҷод намудаи ӯ ҷой дода шудаанд.
Баррасии шеърҳои маҷмуаи мазкур нишон медиҳад, ки вусъати андеша ва ҷаҳони тасовиру хаёлоти Файзи Ашӯр бою рангин буда, ҳар ҳарфу ҳиҷо ва мисраву байти ӯ реша дар фалсалафаи амиқи зиндагӣ дорад. Диду нигоҳи тозаи шоир сатҳӣ набуда, масоили муҳимми иҷтимоӣ ва ҳалли уқдаҳои сарбастаи ҳаёти ҷомеаро дар бар мегиранд. Доираи мавзуоти ашъори Файзи Ашӯр мутанаввеъ ва гуногунпаҳлу буда, муҳимтарини онҳо Ватан, модар, зиндагӣ, дӯстӣ, бародарӣ, ахлоқ, ишқу ҷавонӣ ва арзиши қаламу қоғазу илму ҳунар мебошанд.
Садоқату вафодорӣ ва эҳтироми шоир ба неруи қалам, бузургии қалам ва илҳому ҳунари эҷод ниҳоят маҳкам аст, маҳзи хотири ин шоир маҷмуаро бо шеъри “Савти қалам” оғоз мебахшад:
Қалам дубора ба дафтар салом мегӯяд,
Пас аз салом муборак калом мегӯяд.
Оре, қалам, ба андешаи шоир, дар дасти инсони хирадманду масъулиятшинос мубораку мунаввар аст ва ӯ бо қалам зиндагӣ карданро ба хонанда талқин менамояд, зеро қалам унсурҳои ибратпазирии зиёд дорад ва ҳамеша аз ростӣ ва покиву садоқат паём медиҳад ва бо вуҷуди сахтиҳои рӯзгораш, паёмбарвор панд медиҳад на аз интиқом мегӯяд. Дар ин шеъри шоир қалам ниҳоят зебо, бомантиқ ва шоирона ба тасвир кашида шудааст, махсусан вақте мегӯяд:
Ба ҳаққи қатраи хуни сиёҳи хома, ки Файз,
Сараш буранд агар, аз низом мегӯяд!
Дар эҷодиёти Файзи Ашӯр таъбиру ибораҳои шоирона чун: “муғпари гулофар”, “остинбарзадагон”, “кампири фандхӯрда”, “гардипотакӣ”, “дуои бадгирифта”, “соқии муҳтарами ғамбезор”, “хӯшачинии аҷал”, “деҳқонтабиатӣ”, “виҷдонхаридорӣ” ва хеле зиёди дигар, тасвирҳои ноби дилкаш, таркибсозиҳои зебову шево, истифодаи мазомини дилчасп ва дидгоҳи хоси шоирона ба зиндагӣ, ашё ва табиат хеле зиёд ба назар мерасанд. Ҳар шеър баёнгари ҳолот, назариёт ва руҳу равони шоир нисбат ба ҳаводиси рӯзгори ӯ мебошад ва ин ифодаҳо гиреҳи масъалаеро кушода, барои ҳалли масоили дигар роҳнамо мегарданд.
Диду назари шоир ба Ватан хеле самимӣ ва отифӣ аст. Ӯ ватанро фарзандвор дӯст дорад ва барои салоҳи Ватану бақои меҳан ҷонро фидо мекунад. Ба андешаи шоир хизмат ба Ватан набояд забонӣ, балки ҷонӣ бошад ва дар ҳама вазъу ҳолат ватандор танҳо бояд барои меҳан ҳарфи “итоат” дошта бошад:
То дар ин хоки муқаддас зиндагонӣ мекунем,
Пой то сар, сар ба гардун, шодмонӣ мекунем.
Хуни мо одат ба нону оби покаш кардааст,
Бар Ватан хидмат забонӣ чист? Ҷонӣ мекунем.
Дар ҳама амри Ватан ҳарфи “Итоат” бар забон,
Пайравӣ аз гурдҳои ориёнӣ мекунем.
Шеърҳои “Қасри миллат”, “Роғунсоз”, “Рози бунёдгар”, “Меҳри миллат”, “Мужда”, “Кӯлоб” ва чанде дигар, ки ба мавзуи Ватан ва тавсифи обу хоки сарзамини куҳанбунёду навободамон – Тоҷикистон бахшида шудаанд, хеле самимӣ, ҷолиб, шоирона ва зебо эҷод шудаанд.
Дар ин баробар ашъори дар васфи модар бахшидашуда низ хеле зебо ва дилнишин ба риштаи тасвир кашида шудаанд. Аз ҷумла, шеърҳои “Нони модар”, “Ранҷи модар”, “Ҳастияш инқилобҳо дорад”, “Андуҳи модар”, “Меҳри модар”, “Тан ба пирӣ надиҳад” ва иддае дигар, ки аз тасовиру таобири шоирона рангинанд аз ҳунари волои як эҷодкор ба унвони шоир дарак медиҳад. Албатта, дар ин радиф наметавон шеъри “Дасту танӯр”-ро нодида гирифт, ки дар ниҳояти тасвир ва баёни ҳунармандона, аз қалби пуршӯр ва нигоҳи зебобинона бар рӯйи авроқ таровидааст:
Дар танӯри чун шафақ сурх,
Лахча чун истора месӯхт.
Чашм-равшан,чеҳра пурнур,
Модари ман кулча мепухт.
Ӯ ҳамегустард бо завқ
Осмони суфраи файзу барорашро,
Рӯйи маҳтоби рафида
Пораи абри хамири ширборашро.
Пас, ба он бо муғпари гулофараш
Хол мекӯбид модар,
Гаҳ зи нӯги панҷаҳои рӯҳбахшаш
Орд меборид чун нури саҳар.
Бар тани сӯзони чагдон
Нарм мезад хомнонро,
То гул аз сӯзиш набандад кулчааш
Об мепошид онро.
Бо алавшӯри ба оташ ошно
Лахчаҳоро боз мекард ӯ тагу рӯ, ҷо ба ҷо.
Дар танӯри чун шафақ сурх,
Лахча чун истора месӯхт.
Модари эъҷозкорам
Бар қатори кулчаҳояш дида медӯхт.
Гӯиё ӯ дар муҳити моҳу анҷум
Пушти ҳам хуршед мепӯхт.
Агар аз як тараф, ташбеҳоти зебову диданӣ аз қабили “танӯри чун шафақ” “лахчаи чун истора”, “хол кӯбидани рӯйи кулча”, “боридани орд чун нури саҳар”, “кулчаҳои чагдон ба хуршед” ба шеър зебоиву ҷаззобият дода бошад, пас истифодаи таркиботе чун “лахча”, “кулча”, “муғпар”, “алавшӯр”, “гул бастани кулча” ва ғайра шеърро дилнишин ва диданӣ кардаанд. Албатта, шеъри “Дасту танӯр” аз лиҳози сохтор низ ҷолиб аст, зеро он дар шакли шеъри нав суруда шудааст ва оҳангу инсиҷоми шеъри озодро басо хуб дар худ нигоҳ доштааст.
Аз мазомини ашъори Файзи Ашӯр бармеояд, ки шоир дар зиндагӣ ҳадаф ва мақсади муайян дораду маромаш баёни ҳақиқат ва иҷрои адолат аст. Ӯ дар шеърҳояш афроди ноқобили ҷоҳталаб, дӯстони бемурувват, ашхоси дурӯғгӯ ва фиребгару носипосро сахт мазаммат мекунад:
Миёни боварам афшурд бозувони дурӯғ,
Бигӯ, чӣ кор кунам, бишканад миёни дурӯғ?
Сазои нафрати насли ҷадид хоҳад шуд,
Касе, ки монд ба мерос достони дурӯғ.
Аз дигар шеърҳои хубу дидании Файзи Ашӯр шеъри “Тӯфони ҷавру раҳм” аст, ки яке аз шоҳкориҳои эҷодиёти шоир аст. Яъне шеър аз рӯзгори гунҷишке қисса мекунад, ки бехабар аз ҳикмати ҳаводис аз холиқи худ гиламанд мешавад:
Гунҷишк қаҳр карда зи парвардигор буд,
Зеро ки лонааш
Вайрон зи дасти ҳодисаи рӯзгор буд.
Омад фариштае,
Пурсидаш: - Аз чӣ рӯ
Қаҳр аз Худой кардаию гиря мекунӣ?
Оё Худо ба ҳоли ту беэътибор буд?
Оре, - ҷавоб дод
Гунҷишки бехабар-
Тӯфони ӯ балои сарам шуд, ки нест кард
Он лонаро, ки ҳосилам аз гирудор буд....
Мазмуни шеър қиссаи гунҷишки шокӣ аз Парвардигор аст, ки вирди забони ҳамагон аст, аммо шоир ин мазмунро ба қолаби назму низом дароварда, бо ибораҳои дилнишин ва баёни латифу маҳини шоирона ҷаззобият ва шевоияш бахшидааст.
Бале, гунҷишк ҳамон инсонҳои нофаҳму бехабар аз ҳикмати рӯзгорро мисол мезанад, ки бо андак шикасту нобаробарӣ гила аз тақдир мекунанду шиква аз ноҷурии рӯзгор. Шоир ҳар як бурдро доди Худоӣ медонаду барои ҳар як нобарорӣ ҳикматеро ҷӯёст, ки кушояндаи сад гиреҳи дигар аст.
Оре, доираи андешаи Файзи Ашӯр фаррох аст ва масоиле, ки матраҳ мекунад, доғи рӯзанду дарди башар, мавзуъҳои баррасишаванда дар эҷодиёти ӯ сарсарӣ ё зудгузар нестанд, балки муҳимтарин мавзуи рӯзро бо баёни шоирона ба мардум мерасонад ва барои ислоҳи онҳо роҳ меҷӯяд.
Агар аз лиҳози ашколи шеърӣ ба эҷодиёти Файзи Ашӯр баҳо диҳем, пас ӯ шоирест моил ба шаклҳои суннатии шеърӣ. Анқариб тамоми ашъори ӯ дар шаклҳои суннатии шеърӣ чун ғазал, рубоӣ, дубайтӣ, қитъа, фард ва амсоли инҳо эҷод шудаанд. Агарчи дар ин баробар шеърҳое дар вазнҳои озод дида мешаванд, ки баёнгари ҳунарсанҷии шоир дар ин қолабҳост, аммо ӯ куллан ба қолабҳои суннатӣ майл дорад ва як шоири суннатгарост.
Ғазалҳои шоир бисёр равон, пурмазмун ва матраҳкунандаи масоили доғи рӯз ҳастанд. Ошиқонаҳои ӯ низ дар шакли ғазал бисёр диданӣ ва дилнишин эҷод гардидаанд, аммо аксари ғазалҳои ӯ бо мазомини иҷтимоӣ офарида шудаанд. Яъне шоир дар эҷоди ғазал маҳорати баланд ва дасти тавоно дорад:
Рафтӣ, дарахтҳои гузарро салом гӯй,
Ҳамсояҳои боғи падарро салом гӯй.
Гар дар баҳор меравӣ он сӯ насимвор,
Ғарқи паём шохаи тарро салом гӯй.
Ҳангоми тирамоҳ, ки фаслест файзрез,
Дар боғи мо расида самарро салом гӯй.
Бо ин ки Файзи Ашӯр шоирест моил ба ашколи суннатии шеърӣ, вале мазмуну муҳтавои ашъораш наву замонист, яъне дар шаклҳои суннатии шеърӣ мазмуни тоза дорад, мешавад гуфт, ки ӯ навгароиро дар муҳтаво мебинад. Масалан:
Кибр аз ману ту чу дарки ҷонро гирад,
Фурсатталабе расад, миёнро гирад.
“Ман” гӯям ман, ту низ агар “ман”-гӯйӣ,
Ӯ ояду ҷойи ҳардумонро гирад.
Яъне, шоир ба хонанда арзиши ҳамдиливу иттиҳодро мехоҳад гӯшзад кунад, ки то замоне ваҳдату ягонагии кулли шаҳрвандон набошад хатари Ватанро тасаруф намудани бегонагон боқӣ мемонад.
Дар баробари ин ҳама хубиҳо ва ашъори ҷолиб бо мазомини арзишманд, ки барои хонанда ҷаҳони маънӣ ва сайри хотирмони олами андешаву хаёлоти шоирро фароҳам мекунад, дар маҷмуаи мазкур ба андешаи мо, баъзе норасоиҳо ва нуктаҳои қобили мулоҳиза вуҷуд доранд, ки чун маслиҳат пазируфтани онҳо дар оянда ба бурди шоир ва манфиати шеъри муосири тоҷик хоҳад буд. Дар шеъри “Гимни хонадон” калимаи “гимн” ба салосати сухан халал ворид мекунад, пас ҷойи он дорад, ки ба ҷойи “гимн” калимаи дигар интихоб шавад, ки ҳам мақсади шоир бароварда шавад, ҳам таркибе тоҷикона бошад. Ё ин ки калимаи “поиз”, мутаассифона, имрӯзҳо истифодаи калимаи “поиз” ба ҷойи “тирамоҳ” аз тарафи адибону шоирон роиҷ гардида истодааст, ҳатто бузургтарин шоирони имрӯзи мо низ дар шеърашон поизро зиёд истифода мекунанд. Албатта, инҷониб тарафдори истифода нашудани “поиз” нестам, аммо хубтару шевотар мебуд агар “тирамоҳ” истифода мешуд. Магар тирамоҳ дар қолаби шеър номувофиқ меояд? Вақте ки устод Турсунзода мегӯяд:
Шуҳрати бисёр дорад тирамоҳ,
Номи лангардор дорад тирамоҳ.
чӣ қадар зебо ва гушнавоз аст, пас ин масъала бастагӣ ба ҳунари шоир дорад. Ба шеъри “поиз” таваҷҷуҳ мекунем:
Поиз фасли дарду аламдори сол нест,
Зард аст агарчи, чеҳраи бемори сол нест.
Ҳамчунин, истифодаи калимаҳое чун “фач”, “пешпуртак”, “думликонӣ”, “дайду”, “бетонпора” ва ғайра ба ҳусни шеър таъсири манфӣ расонидааст. Албатта, шоир чун бонии забони адабӣ аз лаҳҷаву шеваҳо бояд вожаҳои салису равонро пайдо ва ба хонанда пешниҳод намояд. Ин аст, рисолати таркибсозии шоир. Дар миёни мардум, дар гуфтори ҳаррӯза калима ва таркибу ибораҳое ҳастанд, ки дар забони адабӣ истифода намешаванд. Дар ҳоле, ки калимаҳои таърихан тоҷикона ҳастанд, аммо аз забони адабӣ дур мондаанд. Дар ин баробар ҷо-ҷо афтиши ҳарфҳо низ ба назар мерасад, ки дар оянда диққати бештарро ҳангоми нашри китоб талаб менамояд.
Хулоса, Файзи Ашӯр шоирест дорои маҳорати баланд, ки тавониста дарди худ ва дарди ҷомеаро дар қолаби мавзуни шеър биғунҷонаду бозгӯкунандаи ҳолоти ҷомеа бошад. Албатта, шоир дар амалӣ намудани ҳадафи хеш комёб низ шудааст.
Ҳадиятуллоҳи Амриддин, номзади илмҳои филологӣ