Дар доираи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, роҳбари Гурӯҳи корӣ дар шаҳри Кӯлоб Вазири нақлиёти Ҷумҳурии Тоҷикистон Азим Иброҳим, раиси вилояти Хатлон Давлаталӣ Саид, раиси шаҳри Кӯлоб Назарзода Бахтиёр Худоёр ва нақшачорабинии мақомоти иҷроияи ҳокимияти давлатии шаҳри Кӯлоб истиқбол аз ҷашни 35-солагии Истиқлолияти давлатии Ҷумҳурии Тоҷикистон корҳои созандагиву бунёдкорӣ, сохта ба истифода додани иншоотҳои соҳаи маориф, тандурустӣ, таъмиру азнавсозии муассисаҳои таълимӣ ва дигар соҳаҳо, инчунин сангфарш ва мумфаршгардонии роҳҳои маҳаллӣ дар шаҳру деҳоти Кӯлоб бо маром идома доранд.
Чунин иқдоми дастаҷамъона имрӯз бо ҷалби техникаҳо, кормандони Муассисаи давлатии "Нигоҳдории роҳҳои автомобилгарди шаҳр", Корхонаи воҳиди таъмиру барқароркунии роҳҳои дохилии шаҳри Кӯлоб, соҳибкорон, шахсони саховатпеша ва аҳолӣ корҳои таъмир ва мумфаршкунӣ доир гардид.
Ёдовар мешавем, ки маҳаллаи ба номи Қурбон Зардак ба таъмир ва мумфаршкунӣ ниёз дошт, ки имрӯз аз ҷониби масъулин анҷом дода шуд.
Чунин иқдомҳои дастаҷамъона ва созанда дар дигар кӯчаву маҳаллаҳои шаҳру деҳоти Кӯлоб дар оянда низ анҷом дода мешавад.
Бахши бойгонӣ-матбуотии МИҲД-и шаҳри Кӯлоб
Бо дастгириҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Вазорати кишоварзии Ҷумҳурии Тоҷикистон ва мақомоти иҷроияи ҳокимияти давлатии вилояти Хатлон солҳои охир бо роҳандозӣ намудани барномаҳои гуногуни давлатӣ хоҷагиҳо бо техникаҳои кишоварзӣ таъмин карда шудаанд, ки кори марди деҳқон дар шудгору кишти саривақтӣ ва ҷамъоварии ҳосил хеле осон гардидааст.
Имрӯз дар доираи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, роҳбари Гурӯҳи корӣ дар шаҳри Кӯлоб, Вазири нақлиёти Ҷумҳурии Тоҷикистон Азим Иброҳим ва раиси шаҳри Кӯлоб Назарзода Бахтиёр Худоёр аз рафти нашъу намои пахта ва дигар зироатҳо шинос шуда, бо масъулин сӯҳбат намуданд.
Ёдовар мешавем, ки дар ҳошияи дастуру супоришҳои Роҳбарияти Олии сиёсии кишвар муҳтарам Эмомалӣ Раҳмон ва раиси вилояти Хатлон Давлаталӣ Саид, дар ҳамкорӣ бо шарикони рушд дар шаҳри Кӯлоб ширкати пахтаи Кӯлоб таъсис дода шудааст. Заминҳои ширкати мазкур 1900 га-ро дар бар гирифта, масъулин дар заминҳои бар зимма доштаашон кишти навъҳои пунбадонаи лотос, бухоро ва дигар навъи ба иқлими минтақа мувофиқро кишт намуданд.
Зимни сӯҳбат роҳбарияти мақомоти иҷроияи ҳокимияти давлатии шаҳри Кӯлоб иброз доштанд, ки дар асоси дастуру супоришҳои Пешвои муаззами миллат муҳтарам Эмомалӣ Раҳмон, раиси вилояти Хатлон Давлаталӣ Саид ва нақшачорабиниҳои тасдиқшуда аз рӯзи аввали кишти пунбадона бо ҷалби мутахассисону масъулон, ҷиҳати дар сатҳи баланд ва босифат ҷамъоварӣ намудани ҳосили пахта ва дигар маҳсулотҳои кишоварзӣ тамоми чораҳои агротехникиро бо ҷалби олимони соҳа дида баромада, то ин ки ҳосили фаровон ба даст оваранд.
Ҳамчунин, роҳбари Гурӯҳи корӣ дар шаҳри Кӯлоб, Вазири нақлиёти Ҷумҳурии Тоҷикистон Азим Иброҳим изҳор намуданд, ки имрӯз давлату Ҳукумати Ҷумҳурии Тоҷикистон имконият ва шароитро барои марди деҳқон муҳайё намудаст ва вазифаи мо дар он мебошад, ки дар заминҳои ба зимма доштаамон хуб кор карда, маслиҳати олимон ва мутахассисони соҳаи кишоварзиро дар самти кишту парвариш намудани дилхоҳ маҳсулот истифода бурда ва дар як сол 3 ё 4 ҳосил ба даст оварем. Ҳамчунин, зери ҳадафи стратегии Ҳукумати Ҷумҳурии Тоҷикистон дар таъмини амнияти озуқаворӣ саҳми худро гузорем.
Бахши бойгонӣ-матбуотии МИҲД-и шаҳри Кӯлоб
Имрӯз дар доираи сиёсати муваффақонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси вилояти Хатлон Давлаталӣ Саид вохӯрии раиси шаҳри Кӯлоб Назарзода Бахтиёр Худоёр бо намояндагони Бонки Олмонии Рушд сурат гирифт. Зимни вохӯрӣ роҳбарияти мақомоти иҷроияи ҳокимияти давлатии шаҳри Кӯлоб меҳмононро ба яке аз гӯшаҳои Тоҷикистони биҳиштосо ба шаҳри Кӯлоби бостонӣ хайрамақдам гуфта, иброз доштанд, ки дар доираи сиёсати созандаву бунёдкоронаи Пешвои муаззами миллат муҳтарам Эмомалӣ Раҳмон ҳамкориҳо бо институтҳои молиявӣ, аз ҷумла Бонки Олмонии Рушд сол то сол ривоҷ меёбад. Инро мо хуб эҳсос намуда, медонем, ки Бонки Олмонии Рушд дар гӯшаву канори мамлакатамон як қатор лоиҳаҳоро амалӣ намуда истодааст. Аз ҷумла лоиҳаи "Тақвияти рушди деҳот тавассути истифодаи мутобиқагардонидашуда ва паст намудани офатҳои табиӣ" яке аз лоиҳаи муҳим ба ҳисоб меравад. Шаҳри Кӯлоб яке аз шаҳрҳое мебошад, ки аз шаҳр ва деҳот иборат мебошад. Вобаста ба хатари офатҳои табиӣ, аз ҷумла хавфи омадани сел дар фасли зимистону баҳор қайд кардан ба маврид аст, ки шаҳру деҳоти Кӯлоб минтақаи осебпазир ба ҳисоб рафта, дорои 32 мавзеъҳои хавфнок мебошад.
Мавриди зикр аст, ки то имрӯз аз ҷониби давлату Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилояти Хатлон ба масъалаи пешгирии офатҳои табиӣ, аз ҷумла омадани сел дар шаҳру деҳоти Кӯлоб таваҷҷуҳи махсус зоҳир карда шуда, пайваста дастгирӣ карда мешавад.
Мақомоти иҷроияи ҳокиямияти давлатии шаҳри Кӯлоб бо Бунёди миллии иҷтимоии маблағгузории Тоҷикистон ҳамкории доимӣ дошта, то имрӯз бо дастгирии ин маркази бонуфуз 22 лоиҳаро дар соҳаҳои барқарорсозии шабакаҳои барқтаъминкунии деҳаҳо, таъмиру азнавсозӣ, барқароркунии шабакаҳои гармдиҳӣ, муассисаҳои таълимӣ амалӣ намуда, дар 9 лоиҳаҳо аз ҷумла бунёди синфхонаҳои таълимӣ ва сохтмони бунгоҳҳои тиббӣ дар деҳаҳои дурдаст бо маром идома доранд, иброз доштанд раиси шаҳри Кӯлоб Назарзода Бахтиёр Худоёр.
Ҳамзамон, меҳмонон аз пешравиҳо ва дастгириҳои ҳамаҷонибаи давлату Ҳукумати Ҷумҳурии Тоҷикистон изҳори сипос намуда, барои қабул ва меҳмоннавозии мардуми тоҷик изҳори миннатдорӣ намуданд.
Дар интиҳои вохӯрӣ, роҳбарияти мақомоти иҷроияи ҳокимияти давлатии шаҳри Кӯлоб ҳамчун армуғон ба меҳмонон тӯҳфаҳои хотиравӣ тақдим намуданд.
Бахши бойгонӣ-матбуотии МИҲД-и шаҳри Кӯлоб
Имрӯз дар доираи таҷлил аз Рӯзи байналмилалии ҳифзи кӯдакон дар боғи фарҳангию фароғатии ба номи Мир Сайид Алии Ҳамадонӣ чорабинии тантанавӣ ва фарҳангӣ доир гардид, ки дар он раиси шаҳри Кӯлоб муҳтарам Назарзода Бахтиёр Худоёр, роҳбарони муассисаҳои таълимӣ, собиқадорон ва роҳбарони ташкилоту муассисаҳои шаҳру деҳоти Кӯлоб иштирок намуданд.
Дар оғоз роҳбарияти мақомоти иҷроияи ҳокимияти давлатии шаҳри Кӯлоб якҷо бо меҳмонон аз дастовардҳои кӯдакони муассисаҳои томактабӣ, мактабҳои варзишӣ ва Ташкилоти ҷамъиятии "Заршедабону" шинос шуда, ба онҳо туҳфаҳои хотиравӣ тақдим намуданд. Зимни боздид аз намоиши дастовардорҳои кӯдакону наврасон роҳбарият аз дастгириҳои ҳамешагии абармарди арсаи сиёсати сатҳи ҷаҳонӣ муҳтарам Эмомалӣ Раҳмон ва раиси вилояти Хатлон Давлаталӣ Саид ёдовар гардида, ба масъулин ҷиҳати боз ҳам беҳтар намудани сифати таълим ва пеш аз ҳама тарбия дар муассисаҳои томактабӣ ва наврасону кӯдаконро дар рӯҳияи ватандӯстӣ ва ифтихори ватандорӣ ҳидоят намуданд.
Сипас, дар макони чорабинии асосӣ раиси шаҳри Кӯлоб муҳтарам Назарзода Бахтиёр Худоёр бо сухани ифтитоҳӣ баромад намуда, таъкид доштанд, ки имрӯз дар саросари олам аз Рӯзи байналмилалии ҳифзи кӯдакон истиқбол карда мешавад, мову Шуморо пешвози ҳамин санаи фархунда дар фазои софу беғубори Ватани азизамон гирди ҳам овардааст.
Имрӯз ҳар яки мо шукрона аз он менамоем, ки фарзандонамон дар ватани соҳибистиқлол ва дар фазои оромиву ободӣ ба воя расида истодаанд. Ҳамаи ин пешравиҳо аз неъмату баракати сиёсати созандаву дурандешонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сарчашма мегирад.
Чеҳраи кушода ва дилҳои ба зиндагӣ гарми кӯдакон мо калонсолонро ба ояндаи дурахшони кишвар ва идомаи насли пурифтихори миллат умед мебахшад.
Боиси хурсандист, ки дар кишвари азизамон аз тарафи давлату ҳукумат ва аҳли ҷомеа ба тарбияи насли наврас аҳамияти ҳамаҷониба дода мешавад. Пешвои муаззами миллат муҳтарам Эмомалӣ Раҳмон борҳо таъкид доштаанд, ки танҳо насли навраси аз ҷиҳати зеҳнӣ ва ҷисмонӣ солим метавонад дар оянда барои ҳалқу миллат хизматҳои арзанда кунад. Ба ин хотир, дар кишварамон аз 22 июни соли 2019 “Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025” амал мекунад. Мақсад аз таҳияи барномаи мазкур беҳтар намудани шароит ва сифати таълиму тарбия дар муассисаҳои томактабӣ ва ба танзим даровардани системаи тарбияи кӯдакони синни томактабӣ мебошад.
Дар Конвенсияи умумибашарии ҳуқуқи кӯдакон омадааст, ки «Давлат ӯҳдадор аст кӯдакро аз ҳар гуна шаклҳои ҳуқуқпоймолкунӣ муҳофизат намояд ва баҳри муҳофизати ҳуқуқии он чораҳои дахлнопазир андешад». Дар ин миён, қабул гардидани Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, ки беҳтарин таҷрибаи қонунэҷодкунӣ дар сатҳи ҷаҳонист, иқдоми дурандешона баҳри баланд бардоштани мавқеи кӯдак ва ҳифзи ҳуқуқу озодиҳои он дар оила ва ҷомеа мебошад.
Дар ин росто, баҳри таваҷҷӯҳу бештар ба ҳифзи манфиатҳои ҳуқуқиву иҷтимоии кӯдакон дар назди мақомотҳои иҷроияи шаҳру ноҳияҳо, аз ҷумла мақомоти иҷроияи ҳокимияти давлатии шаҳри Кӯлоб Комиссияи доимоамалкунандаи ҳифзи ҳуқуқи кӯдак ташкил шудааст. Комиссияи мазкур баҳри амалисозии сиёсати имрӯзаи давлат, қарору дастурҳои Ҳукумати Ҷумҳурии Тоҷикистон, қарорҳои раиси вилоят ва раиси шаҳр корҳои зиёдеро ба анҷом расонида истодааст. Маҳз тавассути ҳамин комиссия бобати пешгирӣ аз ҳама гуна қонуншиканӣ байни ноболиғон, таъмини ҳуқуқу манфиатҳои қонунии кӯдакон, эмин нигоҳ доштани онҳо аз зӯроварии калонсолон ва ба таълиму тарбия ҷалб намудани онҳо чораҳои зарурӣ амалӣ шуда истодаанд.
Вобаста ба ин, ғамхориҳои ҳамешагии Сарвари давлатамон мӯҳтарам Эмомалӣ Раҳмон дар ҳаёти ҳамарӯзаи кӯдакону наврасон мушоҳида мегардад. Махсусан, Пешвои муаззами миллат ба таълиму тарбияи кӯдакони бо амри тақдир аз падару модар ятиммонда таваҷҷуҳи ҳамешагӣ зоҳир намуда, онҳоро фарзандони худ медонанд ва пайваста нисбаташон ғамхориҳо зоҳир менамоянд. Дар доираи ҳамин ғамхориҳои падарона баҳри таъмини шароити мусоиди таҳсилу истироҳати кӯдакон таъмиру азнавсозии мактаб-интернатҳо, кӯдакистонҳо, боғу гулгаштҳо, майдончаҳои бозии кӯдакон ва дигар имкониятҳо ҳамасола аз буҷети ҷумҳуриявӣ ва мақомоти иҷроияи ҳокимияти давлатии шаҳри Кӯлоб маблағҳои лозима ҷудо карда мешавад.
Айни ҳол, дар назди муассисаҳои таълимии шаҳри Кӯлоб 103 гурӯҳи инкишофи кӯдакони синни томактабӣ амал менамоянд, ки 2510 нафар кӯдакро ҳамарӯза ба таълим фаро мегиранд.
Бояд қайд намоем, ки дар шаҳри Кӯлоб 13 муассисаи таҳсилоти томактабӣ фаъолият доранд, ки дар онҳо 1710 нафар кӯдакони синни томактабӣ ба таълиму тарбия фаро гирифта шудаанд. Дар муассисаҳои мазкур мураббияҳо ва омӯзгорони пуртаҷриба ва ихтисосманд кӯдаконро таълиму тарбия медиҳанд.
Месазад қайд намоем, ки дар қонунгузории Ҷумҳурии Тоҷикистон ва санадҳои байналмилалии эътирофнамудаи кишварамон ҳар як кӯдак барои истироҳат, фароғат, иштирок дар бозиҳо ва чорабиниҳои шавқангез мувофиқи синну солаш ҳуқуқ дорад. Мақомоти иҷроияи ҳокимияти давлатии шаҳри Кӯлоб тасмим гирифтааст, ки дар мавсими тобистони имсола беш аз 4000 нафар хонандагонро дар 7 намуди истироҳатгоҳҳо ба фароғат фаро гирад. Бо ин мақсад барои лагери беруназшаҳрӣ беш аз 100 ҳазор сомонӣ ҷудо гардидааст. Дар мавсими истироҳати кӯдакон соли равон дар назди муассисаҳои таълимӣ низ лагерҳои солимгардонию фароғатӣ ташкил карда мешаванд.
Моро мебояд дар самти тарбияи насли наврас ва муҳофизати кӯдакон муносибатро боз ҳам ҷиддитар гардонем. Зеро фардои Ватани азиз ва тақдири ояндаи миллат аз тарбияи имрӯзаи насли наврас вобастагии калон дорад. Зеҳни кӯдак мисли варақи сафеди холист, ки имрӯз ҳарчи дар он навишта мешавад, фардо ҳамон хонда хоҳад шуд. Имрӯз фарзандонамонро бояд дар рӯҳияи солими худшиносиву худогоҳӣ, садоқат ба арзишҳои давлатдории миллӣ ва меҳнатдӯстиву ободкорӣ тарбият намоем.
Бо ҳамин ниятҳои нек, раиси шаҳри Кӯлоб муҳтарам Назарзода Бахтиёр Худоёр ҳозиринро ба Рӯзи байналмиллалии ҳифзи кӯдакон табрику муборакбод гуфта, барои ҳар як кӯдак – фарзандони азизи халқи тоҷик хандаи беғаш, муҳити солими оилавӣ ва рӯзгори босаодатро таманно намуданд.
Дар идомаи чорабинӣ дар вазъияти тантанавӣ ба як қатор роҳбарони муассисаҳо ва мураббиёни муассисаҳои томактабӣ барои таълиму тарбияи насли наврас ва Сипосномаҳои мақомоти иҷроияи ҳокимияти давлатии шаҳри Кӯлоб тақдим карда шуд.
Дар охири чорабинии фарҳангӣ, ки аз ҷониби кӯдакону наврасони муассисаҳои томактабӣ якҷо бо бахши фарҳанг омода гардида буд, дар фазои сулҳу оромии Ватани маҳбубамон пешниҳоди меҳмонон гардонида шуд.
Бахши бойгонӣ-матбуотии МИҲД-и шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
