Санаи 11 ноябри соли 2024 дар толори мақомоти иҷроияи ҳокимияти давлатии шаҳри Кӯлоб таҳти раёсати раиси шаҳри Кӯлоб муҳтарам Назарзода Бахтиёр Худоёр ва бо иштироки муовини якум, муовинон, роҳбари дастгоҳи раиси шаҳри Кӯлоб, инчунин мудирони шуъбаву бахшҳои дахлдори дастгоҳи раиси шаҳр ва мақомоти иҷроияи ҳокимияти давлатии шаҳри Кӯлоб, роҳбарони корхонаву ташкилотҳо ва раисони ҷамоатҳои шаҳру деҳоти Кӯлоб ҷаласаи назоратии назди раиси шаҳр баргузор гардид.
Дар ҷаласаи мазкур вобаста ба иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни вохӯриашон бо фаъолони шаҳру ноҳияҳои вилояти Хатлон дар ноҳияи Абдураҳмони Ҷомӣ санаи 9 ноябри соли равон баргузор гардид, сурат гирифт.
Зимни баромад раиси шаҳри Кӯлоб Назарзода Бахтиёр Худоёр изҳор доштанд, ки зимни баромади пурмуҳтавояшон Пешвои муаззами миллат муҳтарам Эмомалӣ Раҳмон дар тамоми самтҳои гуногуни хоҷагии халқ гуфта гузаштанд, аз ҷумла дар сатҳи баланди ташкилию сиёсӣ истиқбол намудани 35-солагии Истиқлолияти давлатии Ҷумҳурии Тоҷикистон, риояи қонунҳои амалкунандаи Ҷумҳурии Тоҷикистон, гузаронидани вохӯриҳои судманд бо аҳолӣ, истифодаи самараноки замин, рушди корхонаҳои саноатӣ, ҷалби сармояи хориҷӣ, сохта ба истифода додани корхонаҳои саноатӣ, ҷобаҷогузории кадрҳо аз ҳисоби ҷавонони донишманд дар ҳама самтҳо, роҳ надодан ба бегонапарастӣ, эҳтиром гузоштан ба омӯзгорон ва арзишҳои миллӣ, кӯмак намудан ба шахсони яккаву танҳо, иҷроиши Барномаҳои давлатӣ, омодагии тамоми ташкилоту муассисаҳои шаҳру деҳоти Кӯлоб ба мавсими тирамоҳу зимистони солҳои 2024-2025 ва ҷонок намудани корҳои созандагиву бунёдкорӣ мавриди баррасӣ қарор дода шуд.
Таъкид гардид, ки ҳар як дастуру ҳидоятҳои созандаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳар яки моро муваззаф мегардонад, ки рисолати худро дар назди ҷомеа содиқонаву софдилона анҷом диҳем. Он ҳама вазифаҳое, ки дар назди мову Шумо гузошта шудааст, бояд бо як масъулияти баланди ватандӯстӣ иҷро намоем ва дар он ҳолат метавонем худро ҳамчун соҳибватан муаррифӣ намоем. Мо бояд дар мадди аввал шукрона намоем, ки дар замони соҳибистиқлолии кишвар зери таваҷҷӯҳи хосаи Пешвои муаззами миллат муҳтарам Эмомалӣ Раҳмон Тоҷикистони биҳиштосоямон, аз ҷумла шаҳри Кӯлоб сол то сол рушд карда истодааст, ки ин аз фазои сулҳу оромии кишвар гувоҳӣ медиҳад.
Дар идома, ба тамоми масъулини соҳаҳои мухталифи шаҳр ҷиҳати амалӣ гардидани сиёсати созандаву бунёдкоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси вилояти Хатлон Давлаталӣ Саид даъват намуда, аз масъулин талаб карда шуд, ки ҷиҳати ислоҳи он камбудиҳои ҷойдошта чораҳои дахлдор андешида шавад.
Инчунин, изҳор гардид, ки ҷиҳати амалӣ гардидани супоришҳои Пешвои муаззаму хирадсолори миллат муҳтарам Эмомалӣ Раҳмон ва раиси вилояти Хатлон Давлаталӣ Саид ҳар яки мо масъулинро мебояд фаъолияти минбаъдаи кориамонро дигар намуда, дар самтҳои гуногуни хоҷагии халқ корбариро ҷоннок намоем.
Ҳамзамон роҳбарияти мақомоти иҷроияи ҳокимияти давлатии шаҳри Кӯлоб, таъкид доштанд, ки имрӯзҳо мардуми сарбаланду муваффақи Тоҷикистони биҳиштосоямон, аз ҷумла шаҳри Кӯлоб истиқбол аз Иҷлосияи 16-уми Шӯрои Олии Ҷумҳурии Тоҷикистон ва "Рӯзи Президенти Ҷумҳурии Тоҷикистон"-ро бо ташкил намудани Конференсия ва вохӯриҳои ҳадафманд бо аҳолӣ тибқи нақшаи чорабиниҳои тасдиқгардида гузаронида истодаанд ва масъулинро вазифадор намуданд, ки чорабиниҳо бояд дар сатҳи баланди ташкилию сиёсӣ ва фарҳангӣ баргузор карда шавад.
Дар интиҳои ҷаласа, роҳбарияти мақомоти иҷроияи ҳокимияти давлатии шаҳри Кӯлоб аз ҳар як роҳбари ташкилоту муассисаҳо фаъолияти пурсамар, хизмати софдилона, иҷрои бандҳои нақшаи чорабиниҳо ва ҷиҳати саривақт иҷро намудани дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси вилояти Хатлон Давлаталӣ Саид дастурҳои қатъӣ доданд.
Бахши бойгонӣ-матбуотии мақомоти иҷроияи ҳокимияти давлатии шаҳри Кӯлоб
Ҳамдиёрони азиз!
Инак ба қабули Конститутсияи давлати соҳибихтиёру соҳибистиқлоли Тоҷикистон 30 сол пур мешавад. Ҳамон Конститутсияе, ки амалӣ намудани меъёрҳояш чуноне дар Паёми соли гузаштаашон ба Маҷлиси Олии Ҷумҳурии Тоҷикистон Асосгузори сулҳу ваҳдати Миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зикр намуданд «ба мо имкон дод, ки пояҳои устувори ҷомеа ва давлатро созмон диҳем, сулҳу оромӣ, суботи сиёсӣ ва ваҳдати миллиро таҳким бахшем, рушди устувори иқтисодии кишварамонро таъмин намоем, барои ҳар як шаҳрванди мамлакат зиндагии арзанда ва инкишофи озодонаро муҳайё созем».
Ба ин муносибат мехоҳам пеш аз ҳама барои дастгириҳои падарона, сиёсати созандаву бунёдкорона, таваҷҷуҳи беназири Пешвои муаззами миллат муҳтарам Эмомалӣ Раҳмон ва дастгириҳои раиси вилояти Хатлон Давлаталӣ Саид изҳори сипос намуда, зимнан ҳамаи Шумо ва дар шахси Шумо тамоми мардуми шарафманди Кӯлоби бостонӣ ва Тоҷикистони азизро самимона табрику муборакбод гуфта, сиҳатмандӣ, рӯзгори босаодат, барору баракат, оромиву осоиш ва фатҳу пирӯзиҳои нав ба навро таманно дорам. 30 сол муқаддам, халқи тоҷик дар таърихи беш аз 6-ҳазорсолаи худ бори нахуст бо роҳи раъйпурсии умумихалқӣ, Конститутсияи Ҷумҳурии Тоҷикистонро қабул намуд. Ҳамчунон, ки Пешвои муаззами миллат таъкид карданд «Иштироки фаъолонаи сокинони кишвар дар ин маъракаи муҳими сиёсӣ, яке аз дастовардҳои бузург ва пирӯзии демократия дар Тоҷикистон мебошад». Дар ҳамон лаҳзаи ҳассоси таърихӣ қабули Конститутсия барои аз байн бурдани хатаре, ки ба истиқлолияти давлатӣ таҳдид мекард, шароити зарурии ҳуқуқӣ муҳайё намуда, барои аз набудӣ наҷот додани давлати соҳибистиқлоли тоҷикон ва аз парокандагӣ раҳоӣ бахшидани миллати точик ва тоҷикистониён асос гузошта, ҷиҳати расидан ба ваҳдати миллӣ, таҳкурсии устувор гардид ва дар он марҳила барои гузоштани аркони давлатдории тоҷикон тақдирсози халқ нақши арзананда бозид. Инчунин, Конститутсия эҷоди қонуну заминаи меъёрии ҳуқуқии санадҳои моҳиятан миллӣ ва созгор ба манфиатҳои байналмилалиро фароҳам оварда, таъмини ҳуқуқу озодӣ ва манфиатҳои қонунии шаҳрвандон, сарфи назар аз миллату маҳал, нажоду забон, мазҳабу эътиқодро ҳадафи асосӣ қарор дод.
Конститутсия истиқлолияти давлатиро ба расмият дароварда, роҳи минбаъдаи инкишофи ҷомеаро муайян намуд. Ҳарчанд 30 сол барои таърих тӯлонӣ набошад ҳам, дар ин муддат Қонуни асосии давлати мо аз имтиҳонҳои ҷиддии ҳаётӣ гузашт ва собит намуд, ки барои кулли мардуми соҳибистиқлоли Тоҷикистон дар ҳақиқат ҳуҷҷати тақдирсоз аст.
Дар давоми 30 соли баъди қабули Конститутсия Тоҷикистон таҳти сарварии хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳама соҳаҳои иқтисодӣ, иҷтимоӣ, сиёсӣ ва фарҳангӣ дастовардҳои бузург ба даст оварда, бо дили пур ба ояндаи дурахшон устуворона қадам ниҳода истодааст. Бахусус фароҳам омадани фазои ором ва осоиштаву босуботи кишвар, таъмини сартосарии сулҳу ваҳдати миллӣ, барқарор намудани муносибатҳои судбахши байналмилалӣ ва сиёсати сулҳҷуёнаи Тоҷикистон аз рисолати таърихии ин санади бебаҳои сарнавиштсоз ва олии ҳуқуқии кишвар маншаъ мегиранд. Барҳақ Конститусияро бахтномаи миллат, шиносномаи давлату миллат низ ном мебаранд.
Ҳама санадҳои меъёрӣ-ҳуқуқӣ аз Конститутсия сарчашма мегиранд ва набояд ба он зид бошанд. Дар ин бобат Ҷаноби Олӣ ҳам ишора кардаанд, ки «Конститутсияи Ҷумҳурии Тоҷикистон қонуни асосии давлат, унсури марказии низоми ҳуқуқии кишвар заминаи эҷод ва такмили минбаъдаи қонунгузорӣ инчунин, ҳуҷҷати созандаи созиши иҷтимоӣ, дурнамои пешрафти ҷомеа мебошад».
Хотиррасон менамоям, ки Конститутсияи Ҷумуҳурии Тоҷикистон аз 10 боб ва 100 модда иборат аст. Боиси ифтихори ҳар як тоҷику тоҷикистонист, ки коршиносони ташкилотҳои бонуфузи байналмилалӣ, Конститутсияи моро омӯхта, онро яке аз Конститутсияҳои беҳтарини олам эътироф намуданд.
Бори дигар 30-юмин солгарди қабули Конститусияро ба ҳама шодбош гуфта, тансиҳативу хонаободӣ орзумандам. Бигузор Конститутсия ин ба мардуми тоҷик боз асрҳои аср хизмат кунад.
Саломату сарбаланд ва саодатманд бошед ҳамдиёрони азиз.
Ҳамасола 7 ноябр дар Ҷумҳурии Тоҷикистон "Рӯзи театри тоҷик" таҷлил карда мешавад.
Тибқи сарчашмаҳои таърихӣ бори аввал дар ҳамин рӯзи соли 1929 театри тоҷик ба фаъолият оғоз намуд. Ин театри драмавӣ буд, ки баъдтар соли 1933 ба ифтихори адиби машҳур Абулқосим Лоҳутӣ номгузорӣ карда шуд, ки мавсуф дар ташкил ва таъсиси театри тоҷик нақши бузург гузоштааст. А. Лоҳутӣ нахустин шуда, драмаҳои Шекспирро маҳз барои ба саҳна гузоштан ба тоҷикӣ тарҷума кардааст.
Имрӯз дар Театри вилоятии мусиқӣ-мазҳакавии ба номи Сайдалӣ Вализода дар шаҳри Кӯлоб "Рӯзи театри тоҷик" баргузор гардид.
Чорабинии идона бо иштироки масълунони мақомоти иҷроияи ҳокимияти давлатии шаҳри Кӯлоб, меҳмонону ҳунармандон ва мухлисони театр, дар саҳни Театри вилоятии мусиқӣ-мазҳакавии ба номи Сайдалӣ Вализода дар шаҳри шаҳри Кӯлоб оғоз ёфт.
Бахшида ба Рӯзи театри тоҷик муовини раиси шаҳри Кӯлоб Ҳамидиён Орзу бо сухани табрикӣ аз номи раиси шаҳри Кӯлоб муҳтарам Назарзода Бахтиёр Худоёр баромад намуда, аз дастовардҳои даврони соҳибистиқлолии ҳунармандон ва рушди санъати театр дар шаҳри Кӯлоб ёдовар гардид. Ҳамидиён Орзу иброз дошт, ки театр дар ҳар давру замон тарғибгари ғояҳои баланди инсонӣ ва тараннумгари фарҳангу ҳунари асили мардумӣ буда, нақши он дар ташаккули маънавиёти ҷомеа басо муҳим арзёбӣ мегардад. Зимнан таъкид карда шуд, ки заҳмату талошҳои кормандони соҳаи театру фарҳанг, ба хусус ҳунармандони театр аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, раиси вилояти Хатлон Давлаталӣ Саид ва роҳбарияти мақомоти иҷроияи ҳокимияти давлатии шаҳри Кӯлоб қадрдонӣ гардида, аҳли эҷод пайваста дастгирӣ меёбанд.
Мавриди зикр аст, ки дар солҳои соҳибистиқлолӣ дар заминаи сиёсати фарҳангпарваронаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мақому манзалати театри тоҷик боло рафта, барои кормандони соҳа шароити муносиби корӣ фароҳам оварда шудааст.
Дар идома ҳамчунин мудири бахши Раёсати фарҳанги вилояти Хатлон дар минтақаи Кӯлоб Одинаев Абдураҳим ва шоири халқии Ҷумҳурии Тоҷикистон Ҳақназар Ғоиб баромад намуда, аз рушд ва саҳми беназири ҳунармандони Театри вилоятии мусиқӣ-мазҳакавии ба номи Сайдалӣ Вализода дар шаҳри Кӯлоб ёдовар гардиданд.
Дар идомаи чорабинӣ бахшида ба "Рӯзи театри тоҷик" аз ҷониби масъулини мақомоти иҷроияи ҳокимияти давлатии шаҳри Кӯлоб
ба як қатор кормандони Театри вилоятии мусиқӣ-мазҳакавии ба номи Сайдалӣ Вализода дар шаҳри Кӯлоб дар вазъияти тантанвӣ Сипоснома ва тӯҳфаҳои хотиравӣ тақдим карда шуданд.
Дар ҷамъбасти чорабинӣ, порчаҳо аз намоишномаҳои гуногуни театр аз ҷониби ҳунармандони Театри вилоятии мусиқӣ-мазҳакавии ба номи Сайдалӣ Вализода дар шаҳри Кӯлоб пешкаши меҳмонону мухлисони театр гардонида шуд.
Бахши бойгонӣ-матбуотии мақомоти иҷроияи ҳокимияти давлатии шаҳри Кӯлоб
Дар Донишгоҳи давлатии Кӯлоб ба номи Абуабдуллоҳи Рӯдакӣ Конфронси байналмилалӣ бахшида ба "Соли маърифати ҳуқуқӣ" ва 30-солагии қабули Конститутсияи Ҷумҳурии Тоҷикистон таҳти унвони “Масъалаҳои мубрами маърифати ҳуқуқӣ дар шароити ҷаҳонишавӣ: дастовард ва дурнамо” бо иштироки олимони номвари соҳаи ҳуқуқшиносӣ, ходимони варзидаи давлатӣ, вакилони Парлумони ҷумҳурӣ, профессорони муассисаҳои таҳсилоти олии касбии дохил ва хориҷи кишвар ва омӯзгорону донишҷӯёни донишгоҳ оғоз гардид.
Дар қисмати пленарии конфронс ироаи сухани ифтитоҳии ректори Донишгоҳи давлатии Кӯлоб ба номи Абуабдуллоҳи Рӯдакӣ, доктори илмҳои ҳуқуқшиносӣ, профессор Раҳмон Дилшод Сафарбек, суханронии раиси шаҳри Кӯлоб Назарзода Бахтиёр Худоёр, суханронии Прокурори шаҳри Кӯлоб Ғанизода Мансур Қадаммурод, маърӯзаҳои олимону донишмандон: Холиқзода Абдураҳим Ғафор, доктори илмҳои ҳуқуқшиносӣ, профессор, директори Маркази исломшиносӣ дар назди Президенти Ҷумҳурии Тоҷикистон дар мавзуи “Назари ахлоқӣ-ҳуқуқӣ ба табиати Конститутсия: Конститутсия ганҷинаи хайри давлат”, Раҷабзода Равшан Муҳитдин, доктори илмҳои ҳуқуқшиносӣ, вакили Маҷлиси намояндагони Маҷлиси Олии Ҷумҳурии Тоҷикистон дар мавзӯи: “Нақши тағйиру иловаҳо ба Конститутсия ҳамчун омили асосии рушди қонунгузорӣ”, Муртазозода Ҷамшед Сайдалӣ, доктори илмҳои ҳуқуқшиносӣ, вакили Маҷлиси намояндагони Маҷлиси Олии Ҷумҳурии Тоҷикистон дар мавзӯи “Саҳми Эмомалӣ Раҳмон дар қабул ва татбиқи Конститутсияи соҳибихтиёри Тоҷикистон” Ғаюрзода Шукрулло Каромат, доктори илмҳои ҳуқуқшиносӣ, профессор, мудири кафедраи ҳуқуқи мадании факултети ҳуқуқшиносии ДМТ дар мавзӯи: “Нақши Кодекси маданӣ дар амалӣ намудани меъёрҳои Конститутсияи Ҷумҳурии Тоҷикистон”, Маҳмудов Нарзулло Раҳматҷонович, мушовири давлатии адлияи дараҷаи 3, сардори шуъба оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонунияти Дастгоҳи Маҷлиси миллии Маҷлиси Олии Ҷумҳурии Тоҷикистон дар мавзуи “Асосҳои конститутсионии таъмини амнияти миллӣ”, Диноршоҳ Азиз Мусо, доктори илмҳои ҳуқуқшиносӣ, профессор, муовини аввал, муовини директори иҷроияи оид ба илм, инноватсия ва муносибатҳои байналмилалии Филиали Донишгоҳи давлатии Маскав ба номи М.В. Ломоносов дар шаҳри Душанбе мавзуи “Масъалаҳои танзими муносибатҳои ҷамъиятӣ дар Конститутсия", Угланова Оксана Александровна, номзади илмҳои ҳуқуқшиносӣ, дотсенти кафедраи ҳуқуқи конститутсионии ба номи профессор И.Е. Фарбер ва профессор В.Т. Кабышеви Академияи давлатии ҳуқуқии Саратов дар мавзуи “Ташаккули фарҳанги ҳуқуқӣ ва шуури ҳуқуқӣ” суханронӣ намуданд.
Зимни баромади худ раиси шаҳри Кӯлоб Назарзода Бахтиёр Худоёр бахшида ба 30-солагии Конститутсияи Ҷумҳурии Тоҷикистон ҳозиринро ба шаҳри Кӯлоб хайрамақдам гуфта, изҳор доштанд, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми соли гузаштаашон ба мақоми олии қонунгузори мамлакат, бо назардошти таҷлили 30-юмин солгарди қабули Конститутсияи Ҷумҳурии Тоҷикистон пешниҳод намуданд, ки "Соли 2024 ба ифтихори ин санаи бисёр муҳими таърихӣ «Соли маърифати ҳуқуқӣ» эълон карда шавад». Бо Фармони марбутаи Сарвари давлат аз 30 декабри соли 2023, №668 соли 2024 «Соли маърифати ҳуқуқӣ» эълон гардид. Мақсад аз ин икдом баланд бардоштани сатҳи маърифати ҳуқуқӣ, фарҳанги ҳуқуқии шаҳрвандон, тарғиби арзишҳои демократӣ, тақвият додани эхтиром нисбат ба қонун мебошад. Зеро мавҷудияти сатҳи баланди маърифати ҳуқуқӣ як навъ кафолати бунёди давлати соҳибихтиёр, демократӣ, ҳуқуқбунёд ва дунявӣ аст. Пешвои муаззами миллат ҳам таъкид намуданд, ки «баланд бардоштани маърифати ҳуқуқӣ омили асосии эъмори давлати ҳуқуқбунёд, ҷомеаи шаҳрвандӣ ва таъмин намудани волоияти қонун мебошад. Ба 30-юмин солгарди қабули Конститутсия тавъам эълон намудани соли 2024 хамчун «Соли маърифати ҳуқуқӣ » бори дигар собит сохт, ки Ҷаноби Олӣ дар ҳақиқат шахсияти таърихӣ ва хирадсолоранд. Чунки тамоми механизми қонунгузории мамлакат аз Конститутсия сарчашма мегирад. Аз Конститутсияе, ки амалӣ намудани меъёрҳояш чуноне Президенти кишвар зикр намуданд «ба мо имкон дод пояҳои устувори ҷомеа ва давлатро созмон диҳем, суботи сиёсӣ ва ваҳдати миллиро таҳким бахшем, рушди устувори иқтисодии кишварамонро таъмин намоем, барои ҳар як шахрванди мамлакат шароити зиндагии арзанда ва инкишофи озодонаро муҳайё намоем». Ҳамин тариқ эълон шудани соли 2024 — ҳамчун «Соли маърифати ҳуқуқӣ» сохторҳои давлатию ҷамъиятӣ, шахсони мансабдорро вазифадор намуд, ки барои баланд бардоштани маърифати ҳуқуқии шахрвандон» ва дигар субъектони муносибатҳои ҷамъиятӣ, чораандешӣ ба монанди "ҷорӣ намудани корҳои фаҳмондадиҳии муқаррароти санадҳои меъёрии ҳуқуқӣ", нашри мақолаҳо ва пахши барномаҳо тавассути васоити ахбори омма ва дигар тадбирҳоро роҳандозӣ намоянд. Мебояд тазаккур дод, ки мақомоти иҷроияи ҳокимияти давлатии шаҳри Кӯлоб ҳам дар иртибот ба ҳамин вазифа нақшаи мушаххаси чорабиниҳоро таҳияву тасдиқ намуда, онҳоро ба тадриҷ амалӣ карда истодааст. Тибқи нақшаи мазкур дар давоми сол мулоқоти ҳуқуқшиносони варзидаи ҷумҳурӣ ва вилоят бо фаъолони шаҳр баргузор гардида, онҳо бо иштирокдорон дар атрофи паҳлӯҳои гуногуни қонунгузории мамлакат суҳбатҳои муфид анҷом доданд. Тавассути телевизиони Кӯлоб шурӯъ аз ибтидои сол дар мавзӯҳои ҳуқуқӣ барномаҳои ҷолиб мунтазам пахш шуда истодаанд. Бо ҷалби мутахассисон дар маҳалҳо чандин ҳамоишҳо баргузор гаштанд ва қоидаҳои умумии ҳатмии рафтори муқаррарнамудаи қонунгузорӣ фаҳмонида шуданд. Боварӣ ва умед дорем, ки ин чорабиниҳо то андозае ба баланд бардоштани шуурнокии субъектони муносибатҳои ҷамъиятӣ тавонистанд мусоидат кунанд. Дар идома ба роҳбарияти Донишгоҳи давлатии Кӯлоб ,ҷиҳати роҳандозии чунин Конференсияи байналмилалии илмӣ-амалӣ таҳти унвони «Масъалаҳои мубрами маърифати ҳуқуқӣ дар шароити ҷахонишавӣ: дастовард ва дурнамо» изҳори сипос намуда ,изҳор дошт,ки дар Конференсияи имрӯза олимони номвари соҳаи ҳуқуқ ходимони варзидаи давлатӣ ва дигар мутахассисони соҳибтаҷриба ширкат карда истодаанд, ки бешубҳа иштирокдорон имкон доранд, ҷиҳати баланд намудани сатхи донишҳои ҳуқуқии худ қадами устуворе ба пеш гузоранд. Дар охир ба кори Конференсия бурдборию муваффақиятҳоро орзу намуданд.
Кори конфронс дар нимаи 2-юми рӯз бо дарназардошти шунида шудани беш аз 60 мақола дар се бахш идома ёфт.
Бахши бойгонӣ-матбуотии мақомоти иҷроияи ҳокимияти давлатии шаҳри Кӯлоб
Подкатегории
Шабакаҳои иҷтимоӣ
30-солагии Истиқлоли давлатии Ҷумҳурии Тоҷикистон
