Дар толори Мақомоти иҷроияи ҳокимияти давлатии шаҳри Кӯлоб ба муносибати “Соли 2025-соли байналмиллалии ҳифзи пиряхҳо” ва 21-март “Рӯзи байналмиллалии пиряхҳо” конференсияи илмӣ-назариявӣ баргузор гардид.
Пеш аз оғози Конференсия иштирокчиён дар даромадгоҳи толор ба дастовардҳои илмӣ-таҳқиқотии устодону омӯзгорони шаҳри Кӯлоб ва намоиши ҳунарҳои мардумӣ шинос шуданд.
Дар конференсияи зикргардида муовини раиси шаҳри Кӯлоб Даминзода Арафамо, Академики Академияи муҳандисии Ҷумҳурии Тоҷикистон, профессор, сарходими илмии Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон” Қаюмов Абдулҳамид Қаюмович, ректори Донишкадаи технология ва менеҷменти инноватсионии шаҳри Кӯлоб Шоҳиён Алмосшо Набот, ректори Донишгоҳи давлатии Кӯлоб, номзади илмҳои ҳуқуқшиносӣ, профессор Раҳмон Дилшод Сафарбек роҳбарони ташкилоту муассисаҳои шаҳр, мудирони шуъбаву бахшҳои дастгоҳи раис ва мақомоти иҷроияи ҳокимияти давлатии шаҳри Кӯлоб донишҷуён иштирок намуданд.
Конференсияро бо сухани ифтитоҳӣ муовини раиси шаҳри Кӯлоб Даминзода Арафамо кушода, меҳмононро аз номи мақомоти иҷроияи ҳокимияти давлатии шаҳри Кӯлоб хосатан раиси шаҳри Кӯлоб Назарзода Бахтиёр Худоёр хушомадед намуданд.
Дар идома тибқи барномаи конфронс Қаюмов Абдулҳамид Қаюмович-Академики Академияи муҳандисии Ҷумҳурии Тоҷикистон, профессор, сарходими илмии Муассисаи давлатии илмии “Маркази омӯзиши пиряхҳои Академияи миллии илмҳои Тоҷикистон” дар мавзуи “Саҳми Тоҷикистон дар талошҳои ҷаҳонӣ, ҷиҳати ҳифзи пиряхҳо: таҳлили ҳолат ва динамикаи пиряхи Ванҷях (Федченко)”; ректори Донишкадаи технология ва менеҷменти инноватсионии шаҳри Кӯлоб Шоҳиён Алмосшо Набот дар мавзуи “Ташаббусҳои Пешвои муаззами миллат дар соҳаи об ва иқлим”, омӯзгори Донишгоҳи давлатии Кӯлоб ба номи Абӯабдуллоҳи Рӯдакӣ Гадоев Шералӣ маърӯзаҳои илмӣ ироа намуданд.
Иброз гардид, ки тағйирёбии глобалии иқлим ба сифати яке аз мушкилоти муосир, пеш аз ҳама, ба ҳолати пиряхҳо, захираҳои барф ва об таъсири манфӣ мерасонад, борҳо аз ҷониби Пешвои миллат аз минбарҳои созмонҳои байналмилалӣ ва минтақавӣ садо додааст. Ҳамчунин, бо истидлолу таҳлили амиқ манзур шуда, ки коҳиш ва харобшавии минбаъдаи манбаҳои обҳои ошомиданӣ дар сайёра метавонад аҳли башарро ба фалокатҳои зиёди ҷонӣ, иҷтимоӣ ва иқтисодӣ дучор намояд. Биноан, Пешвои эътирофшудаи асри XXI муҳтарам Эмомалӣ Раҳмон борҳо ҷомеаи ҷаҳониро барои таҳия ва татбиқи ҳар чи зудтари чораҳои зурурии муштарак ҷиҳати ҳалли масоили экологӣ даъват намудаанд.
Хушбахтона, Маҷмаи Умумии Созмони Милали Муттаҳид санаи 14 декабри соли 2022 зимни иҷлосияи 77-уми худ қатъномаи «Соли 2025 – Соли байналмилалии ҳифзи пиряхҳо» қабул кард. Мояи ифтихор аст, ки дар асоси ин қатънома пешниҳодҳои манзуршудаи Пешвои муаззами миллат бобати (1) эълон шудани 21 март ҳамчун Рӯзи байналмилалии ҳифзи пиряхҳо; (2) Соли 2025 – Соли байналмилалии ҳифзи пиряхҳо; (3) таъсиси Фонди боварии байналмилалӣ барои саҳмгузорӣ ба ҳифзи пиряхҳо дар назди СММ; (4) соли 2025 доир намудани Конфронси байналмилалӣ оид ба ҳифзи пиряхҳо дар шаҳри Душанбе аз ҷониби кишварҳои узви СММ дастгирӣ ёфтанд.
Дар анҷоми конфронс ба баромадкунандагон сипосномаи мақомоти иҷроияи ҳокимияти давлатии шаҳри Кӯлоб супорида шуд.
Бахши бойгонӣ-матбуотии МИҲД шаҳри Кӯлоб
