Ифтитоҳи Муассисаи таҳсилоти миёнаи умумии рақами 47 ва гузоштани санги асос барои бунёди бинои нави мактаб барои 1240 ҷой дар шаҳри Кӯлоб
23.10.2022
23 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафар корӣ дар шаҳри Кӯлоб Муассисаи таҳсилоти миёнаи умумии рақами 47-ро ифтитоҳ карданд.
Мактаби нав барои 528 нафар дар ду баст пешбинӣ гардида, масоҳати замини иншоот 2,50 гектар заминро ташкил медиҳад. Корҳои сохтмонӣ дар иншооти мазкур моҳи апрели соли 2021 оғоз гардида, бино аз ду ошёна ва 10 синфхона, як кабинети фаннӣ иборат мебошад. Дар синфхонаи компютерӣ 25 адад компютер ва як тахтаи электронӣ насб гардидааст.
Мавриди зикр аст, ки санги асоси сохтмони Муассисаи таҳсилоти миёнаи умумӣ, воқеъ дар деҳоти Зарбдори деҳаи Гулистон аз ҷониби Пешвои миллат муҳтарам Эмомалӣ Раҳмон гузошта шуда буд.
Фармоишгари иншоот Муассисаи давлатии “Маркази татбиқи лоиҳаи сохтмон ва муҷаҳҳазгардонии мактабҳо” мебошад. Дар рафти корҳои сохтмонӣ 50 нафар бо кори муваққатӣ таъмин шуданд.
Мактаб дорои дегхона барои дар фасли сармо бо гармӣ таъмин кардани синфхонаҳо, ҳавзи нигоҳдории об бар зидди сӯхтор дар ҳаҷми 50 метри мукааб, анбор барои нигоҳдории сӯзишворӣ, зеристгоҳи барқӣ, ҳамзамон майдонча барои бозии футбол, баскетбол ва волейбол аст.
Ба Пешвои миллат муҳтарам Эмомалӣ Раҳмон иттиллоъ дода шуд, ки муассисаи таълимии мазкур дар доираи иқдомҳои созанда ва пуштибонӣ аз сиёсати бунёдкоронаи Президенти мамлакат муҳтарам Эмомалӣ Раҳмон мувофиқ ба талаботи замони муосир бунёд карда шудааст.
Аснои шиносоӣ Сарвари давлат аз шароити муассисаи мазкур ба корҳои сохтмонӣ баҳои баланд доданд.
Пешвои миллат муҳтарам Эмомалӣ Раҳмон бо хонандагони ин даргоҳи илму маърифат суҳбати озоду самимӣ анҷом дода, онҳоро ба омӯзиши забонҳои хориҷӣ ва технологияи компютерӣ ҳидоят намуданд.
Акнун баъди ба истифода додани бинои Муассисаи таълимии рақами 47 дар деҳоти Зарбдори шаҳри Кӯлоб мушкилоти ҷойи нишаст бартараф гардид.
Пешвои миллат муҳтарам Эмомалӣ Раҳмон омӯзгоронро ба беҳтар кардани сифати таълиму тарбия, дар замири хонандагон бедор намудани ҳисси ватандорию ватандӯстӣ, арҷ гузоштан ба таъриху тамаддуни халқ ва муқаддастои миллӣ ва ба роҳ мондани робитаи зич бо падару модарон, ҳидоят карданд.
Устодон ба ғамхориҳои беназири Сарвари маорифпарвари мамлакат изҳори миннатдорӣ намуда, иброз доштанд, ки бо фароҳам гардидани чунин шароити муосир дар таълиму тарбияи хонандагон дар руҳияи ватандӯстиву хештаншиносӣ саҳми бештар хоҳанд гузошт.
Пас аз ифтитоҳи бинои нави мактаб ва суҳбат бо омӯзгорон Сарвари давлат муҳтарам Эмомалӣ Раҳмон дар саҳни ҳавлии муассисаи таълимӣ баъди шиносоӣ бо лоиҳаи бунёди иншооти нави таълимӣ дар қитъаи замини муассисаи мазкур барои корҳои сохтмонӣ дар бинои нави мактаб барои 1240 ҷой дар ду баст, ошхона, толори варзиш, маҷлисгоҳ ва дигар иншоотҳои ёрирасон оғоз бахшиданд.
Бинои нави таълимӣ аз 26 синфхона, синфхонаҳои фанҳои дақиқ, толори варзиш бо 100 ҷойи нишасту таҷҳизоти зарурӣ, ошхона бо 60 ҷой, китобхона бо қироатхона бо 20 ҷой, лабаратория бо тамоми таҷҳизот ва дигар ҳуҷраҳои ёрирасон иборат хоҳад буд.
Мавриди зикри хос аст, ки бо шарофати соҳибистиқлолӣ, ваҳдати комили сартосарӣ ва талошҳову ташаббусҳои Пешвои миллат муҳтарам Эмомалӣ Раҳмон соҳаи маориф рушд карда, ба яке аз самтҳои афзалиятнок ва пешбарандаи ҷомеа табдил ёфтааст.
Мулоқот бо собиқадорону фаъолон ва аҳли ҷамоатчигии шаҳри Кӯлоб
23.10.2022
23 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Кӯлоб бо собиқадорону фаъолон ва аҳли ҷамоатчигии шаҳр мулоқот ва суҳбати самимӣ доир намуданд.
Президенти мамлакат собиқадоронро ҷиҳати саҳмгузорӣ дар таълиму тарбияи насли наврас, тарғиби сиёсати созандаи Ҳукумати Ҷумҳурии Тоҷикистон ва тадбирҳои ободонӣ ба истиқболи 35-солагии Истиқлоли давлатии Ҷумҳурии Тоҷикистон ҳидоят намуданд.
Бо дарназардошти авзои имрӯзаи ҷомеаи байналмилалӣ таъкид гардид, ки бо истифода аз шароит ва иқлими мувофиқи шаҳр сокинон бояд ҳамасола дар таъмини амнияти озуқаворӣ саҳмгузор бошанд.
Пешвои миллат муҳтарам Эмомалӣ Раҳмон ҳамзамон бо ёдоварӣ аз нишондодҳои Паёми Президенти Ҷумҳурии Тоҷикистон ба Маҷлиси Олӣ, Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” сокинонро ҷиҳати тарбияи фарзандон дар руҳияи ватандӯстию хештаншиносӣ ва касбу ҳунардӯстӣ ҳидоят намуданд.
Риояи талаботи Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон”-ро омили муҳим дар самти пешгирӣ аз исрофкорию харҷи беҳуда маънидод карда шуд.
Собиқадорони шаҳри Кӯлоб дар навбати худ ба Пешвои муаззами миллат ҷиҳати таъмини зиндагии шоиста, ғамхорӣ ба ҳама табақаҳои ҷомеа, бахусус барҷомондагону собиқадорон изҳори сипос карданд.
Ба истифода додани Маҷмааи “Дуои Модар” дар шаҳри Кӯлоб
23.10.2022
23 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Кӯлоби вилояти Хатлон Маҷмааи “Дуои Модар”-ро мавриди истифода қарор доданд.
Дар маркази маҷмаа муҷассамаи Модар дар шакли “болои кат даст ба дуо бардошта” сохта шудааст. Дар фарҳанги мардуми тоҷик дуои Модар рамзи ҳифзу амонӣ, сабзишу пешрафт ва комёбиву муваффақиятҳо дониста мешавад.
Пасманзари муҷассамаро асари бадеии монументалӣ дар васфи Модар зеб медиҳад. Ин асар аз 6 қисм иборат аст ва ҳар яки онҳо заҳмату талошҳои шабонарӯзии Модар баҳри тарбия ва ба камол расонидани фарзандро инъикос мекунанд. Ҳамзамон дар ин асар расму ойин, рӯзгору пайкори мардуми тоҷик таҷассум ёфтааст.
Муҷассамаи “Дуои Модар” ва асари бадеии монументалӣ дар васфи Модар аз ҷониби ҳайкалтарошони маҳаллӣ, ки аъзои Иттифоқи рассомони Тоҷикистон мебошанд, бунёд ёфтааст.
Пешвои миллат муҳтарам Эмомалӣ Раҳмон пайваста дар суханрониҳои худ азамату бузургии Модарро васф карда, дар ситоиши Модар фармудаанд: “Зан-Модар ибтидои ҳастии башарият, мабдаи меҳру вафо ва рамзи муҳаббату садоқат мебошад.”
Лоиҳаи иншоот аз ҷониби Корхонаи воҳиди давлатии “Лоиҳакаш”-и шаҳри Кӯлоб таҳия шудааст. Фармоишгари иншоот Идораи сохтмони асосии Мақомоти иҷроияи ҳокимияти давлатии шаҳри Кӯлоб буда, пудратчӣ Ҷамъияти дорои масъулияти маҳдуди “Паргор” мебошад.
Дар ҳудуди маҷмаа фаввораҳо сохта шуда, чароғҳои замонавӣ насб гардидааст. Атрофи муҷассамаи Модар бо гулу буттаҳо ва дарахтони ороишӣ сабзкорӣ шуда, роҳравҳо сафолакпӯш гардидаанд.
Пешвои миллат муҳтарам Эмомалӣ Раҳмон сохтмони Маҷмааи “Дуои Модар”-ро дар даромадгоҳи шаҳр иқдоми хубу шоистаи таҳсин хонда, ба тамоми дастандакорон изҳори сипосу миннатдорӣ намуданд.
Ифтитоҳи бинои баландошёнаи истиқоматӣ дар шаҳри Кӯлоб
23.10.2022
Дар доираи сафари корӣ ба шаҳри Кӯлоб Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази шаҳр бинои баландошёнаи истиқоматиро мавриди истифода қарор доданд.
Бино аз нуҳ ошёна иборат буда, дар ошёнаи якум маркази савдою хизматрасонӣ ва дар ҳашт ошёнаи дигар 40 ҳуҷра бунёд гардидааст.
Иншоот дар асоси лоиҳаи омоданамудаи ҶДММ “Идриси Ҷаҳон” аз ҷониби фармоишгар-пудратчӣ ҶДММ “Насим сохтмон” бо истифода аз масолеҳи хушсифати ватанӣ сохта шудааст.
Вобаста ба талаботи замони муосир, дар қисмати берунии бино таҷҳизоти каммасрафи равшанидиҳанда насб карда шудааст, ки шабонгоҳ бо рангҳои гуногун ба зебогии шаҳр ҳусни дигар зам мекунад. Гирду атроф ва ҳавлии бино пурра сафолакпӯш гардида, дар рафти корҳои сохтмонӣ беш аз 20 нафар сокини маҳаллӣ бо ҷойи кор ва маоши хуб таъмин шудаанд. Бо мавриди истифода қарор гирифтани бино 40 оилаи дигар дар маркази шаҳр соҳиби манзили зист гардиданд.
Дар ошёнаи якуми бинои мазкур Пешвои миллат муҳтарам Эмомалӣ Раҳмон бо 68 нафар ятими кулл аз шаҳрҳои Кӯлоб, Норак ва ноҳияи Шамсиддин Шоҳин мулоқот намуданд. Зимни мулоқот Президенти мамлакат кӯдакону наврасони ятимро, ки пурра дар таъминоти давлату Ҳукумат мебошанд, ба омӯзиши амиқи илму фан ва касбу кори гуногун ҳидоят намуданд.
Барои кӯдакони ятиму бепарастор дастурхони пурнозу неъмат густурда шуда, аз ҷониби Сарвари давлат ба ҳар яки онҳо туҳфаҳо тақдим гардид.