апр 29, 2025

Имрӯз, дар маҷлисгоҳи Донишкадаи технология ва менеҷменти инноватсионӣ дар шаҳри Кӯлоб тибқи дастуру супоришҳои Роҳбари Дастгоҳи иҷроияи Президенти Ҷумҳурии Тоҷикистон ва бо мақсади иҷрои Нақша чорабиниҳои мақомоти иҷроияи ҳокимияти давлатии вилояти Хатлон бо иштироки муовини раиси вилояти Хатлон, муовини раиси шаҳри Кӯлоб, роҳбарияти донишкада, ҳайати профессорону омӯзгорон ва донишҷӯён, вохӯрӣ таҳти унвони – Хониши сиёсӣ бо усули «факулта ба факулта» дар мавзуи «Тарбияи ватандӯстии шаҳрвандон – омили таҳкими пояҳои давлатдории миллӣ», баргузор карда шуд. Нахуст Шоҳиён Алмосшоҳ Набот – ректори Донишкадаи мазкур меҳмонон ва ҳозиринро хайрамақдам гуфта, мақсади баргузории вохӯрӣ ва баромадкунандагонро шинос намуд. Сипас, Анзурат Абдусаломзода – муовини раиси вилояти Хатлон ҳадафи баргузории чунин вохӯриҳоро ҷиҳати иҷрои дастуру супоришҳои Пешвои муаззами миллат дар Паёми навбатӣ, ки ба Маҷлиси Олии Ҷумҳурии Тоҷикистон ва ба мардуми кишварамон ироа карда буд, маънидод намуд. Дар идомаи сухан қайд намуданд, ки чунин вохӯриҳо дар тамоми шаҳру ноҳияҳои вилояти Хатлон бо иштироки масъулини соҳаҳои маориф, кор бо ҷавонон ва варзиш, кор бо занон ва оила, шуъбаи рушди иҷтимоӣ ва робита бо ҷомеаи дастгоҳи раиси вилоят, шуъба оид ба корҳои дин, танзими анъана ва ҷашну маросими мақомоти иҷроияи шаҳру ноҳияҳои вилояти Хатлон баргузор карда мешаванд. Дар суханронии худ оид ба баланд бардоштани ҳисси ватандӯстӣ ва ҳуввияти миллӣ миёни ҷавонон, тарғиби арзишҳои демократӣ ва инсонӣ, мустаҳкам намудани ҳамкориҳои волидайн ва мактаб, дастгирии ташаббусҳои ҷавонон ва ҷалб кардани онҳо ба корҳои созанда ва инноватсионӣ, тақвияти омӯзиши хонандагон ва донишҷӯён ба забономӯзӣ ба хусус забонҳои русию англисӣ ва илмҳои муосир, иштироки онҳо дар олимпиадаю озмунҳои сатҳи ҷумҳуриявию байналмилалӣ ва ҳавасмандгардонии онҳо аз тарафи масъулони соҳа ва дигар масъалаҳоии мубрами рӯз ибрози ақида намуданд. Зимни вохӯрӣ, муовини раиси шаҳри Кӯлоб Арафамо Даминзода низ дар тақвияти суханҳои муовини раиси вилоят таъкид доштанд, ки барои нигоҳдории фарҳанги миллӣ, ба хусус муаррифии либоси миллӣ, дур намудани фарҳанги ба мо бегона, дӯст доштани Ватан, ҷалби ҷавонон ба донишандӯзию меҳнатдӯстӣ, ҳурмату эҳтироми калонсолонро ба ҷой овардан, касбомӯзӣ, бетарафӣ зоҳир накардан дар иштирок дар ҷамъомадои сиёсию фарҳангӣ ва дигар масъалаҳо суханронӣ намуданд. Ҳамчунин, дар вохӯрӣ дигар баромадкунандагон низ оид ба дастуру супоришҳои Пешвои муаззами миллат ва Раиси вилояти Хатлон ҷавононро даъват намуданд, ки бояд ҳар як ҷавони бонангу номуси Ватан имрӯз барои хизмат ба Ватан – Модар омода бошад ва барои дар корҳои ободонию пешрафти Тоҷикистон саҳми худро гузорад, зеро ки имрӯз нисфи зиёди аҳолии Тоҷикистонро маҳз ҷавонон ташкил мекунад ва оянда ва пешрафти Тоҷикистон аз ин қишри ҷомеа вобастагӣ дорад.

апр 29, 2025

Имрӯз 10.04.2025 дар Маркази ҷавонони шаҳри Кӯлоб вохӯрии муовини раиси вилояти Хатлон муҳтарам Абдусаломзода Анзурат бо донишҷӯёни Коллеҷи омӯзгории Донишгоҳи давлатии Кӯлоб ба номи Абуабдуллоҳи Рӯдакӣ ва Коллеҷи тиббии шаҳри Кӯлоб ба номи Раҳмонзода Раҳматулло Азиз бо усули факулта ба факулта дар мавзуи “Тарбияи ватандӯстии ҷавонон-омили таҳкими пояҳои давлатдории миллӣ” доир гардид. Дар ин вохӯрӣ ҳамчунин, муовини раиси шаҳри Кӯлоб Даминзода Арафамо Искандар, директорони Коллеҷи омӯзгории Донишгоҳи давлатии Кӯлоб ба номи Абуабдуллоҳи Рӯдакӣ н.и.п. дотсент Одиназода Латофат Амиршо, директори коллеҷи тиббии шаҳри Кӯлоб д.и.т Азиззода Зубайдулло, мудири бахши кор бо ҷавонони минтақаи Кӯлоб Дилшод Мадализода ва донишҷӯёну омӯзгорон иштирок доштанд. Мақсад аз ин вохӯрӣ ба роҳ мондани корҳои фаҳмондадиҳӣ миёни ҷавонон ҷиҳати иҷрои қонунҳои Ҷумҳурии Тоҷикистон “Дар бораи танзими ҷашну маросим” ва “Дар бораи масъулият дар таълиму тарбияи фарзанд" , риоя ва пӯшидани либосҳои миллии чакану адрас ва даст назадан ба бегонапарастӣ, муборизаи дастаҷамъона бо ҳама зуҳуроти номатлуби ҷомеа, аз ҷумла терроризму эсктремизм, дар фазои сулҳу амонӣ таҳсили дуруст дар муассисаҳои таълимии олию миёнаи касбӣ буд. Нахуст, меҳмони олиқадр Абдусаломзода Анзурат баромад намуда, дастоварду пешравиҳои соҳаҳои мухталифи вилоят, аз ҷумла, тиб, фарҳанг, тандурустӣ ва маорифро ба риштаи таҳлил кашиданд. Мавсуф зикр намуданд, ки дар даврони навини давлатдории мо бо азму талошҳо ва меҳнатҳои шабонарӯзии Асосгузори сулҳу ваҳдати миллӣ-Пешвои миллат, Президенти маҳбуби кишвар муҳтарам Эмомалӣ Раҳмон Тоҷикистон ба як кишвари пешрафтаи ҷаҳон табдил гардид. Сатҳи некуаҳволии мардум ба маротиб боло рафта, шароити зиндагии сокинони кишвар беҳтар шуда истодааст. Муҳимтар аз ҳама сулҳу осоиштагӣ дар ватани мо ҳукмфармо аст. Ба ин ҳама неъматҳо мебояд мо шукргузорӣ карда, дар ободии кишвар саҳим бошем. Тоҷикистон ба маҷрои нави рушд расид. Агар барои мисол соҳаи маорифро мисол орем, танҳо дар соли гузашта дар ҳудуди вилояти Хатлон беш аз 53 ҳазор ҷойҳои нави нишаст таъсис дода шуд. Муовини раиси вилоят аз ҳозирин даъват ба амал овард, ки шукргузорӣ аз даврони истиқлол ва заҳмату ғамхориҳои Пешвои миллат муҳтарам Эмомалӣ Раҳмон карда, аз ҳамаи шароити мавҷуда истифода бурда, дар оянда кадрҳои хуби соҳаи хуб гарданд ва дар таҳкими сулҳу субот нақши худро гузоранд. Дар идома муовини раиси шаҳри Кӯлоб Даминзода Арафамо Искандар, мудири бахши кор бо ҷавонони минтақаи Кӯлоб Дилшод Мадализода, директори Коллеҷи омӯзгории Донишгоҳи давлатии Кӯлоб Одиназода Латофат Амиршо, доир ба имконоти васеи таълим дар муассисаҳои таълимӣ, таваҷҷуҳи роҳбарияти олии кишвар ба соҳаи маориф ва инчунин пешгирии шомилшавии ҷавонон ба ҳизбу ҳаракатҳои мамнуъ, даст назадан ба ҷиноят, дур нашудан аз таълим ва баланд бардоштани идеологияи миёни ҷавонон маърӯзаҳо намуданд. Дар охир ҳамчун суҳбати озод чанде аз омӯзгорони ду коллеҷи болозикр доир ба вохӯрии имрӯза фикру андешаҳои худро баён доштанд.