Бояд ёдовар шуд, ки шоми 6 август, тахминан соати 19:30, дар шаҳри Кӯлоб садамаи мудҳиши нақлиётӣ шуд, ки дар натиҷа хисороти калони ҷонию молӣ ба бор овард.
Мошини боркаши тамғаи Дулан дорои ядак (прицеп) рақами қайди давлатиаш 538 ZН 01, мутааллиқ ба ҶДММ «Кафолат Воридоту Содирот» дар шоҳроҳи «Душанбе-Кулоб-Хоруғ» дар километри якум дар ҳудуди кӯчаи Ҷумъа Алии шаҳри Кулоб бинобар сабаби аз кор баромадани маҷмӯи боздории (тормоз) воситаи нақлиёт, пайдо гардидани носозии техникӣ ва аз уҳдаи идора намудани воситаи нақлиёт набаромадани ронанда ба садама дучор гашта, даҳҳо нақлиётро бо мусофиронаш зер карда, хонаеро чаппа гардонидааст.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба хонаводаҳои ҳалокшудагон изҳори ҳамдардии амиқ ва ба захмиён шифои оҷил орзу намуданд.
Бо супориши Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Вазири корҳои дохилӣ, Вазири тандурустӣ ва ҳифзи иҷтимоии аҳолии Ҷумҳурии Тоҷикистон, Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, Вазири нақлиёти Ҷумҳурии Тоҷикистон , раиси вилояти Хатлон, раиси шаҳри Кӯлоб ва дигар масъулин ба ҷойи ҳодиса сафарбар карда шуда, ба хонаводаҳои ҳалокшудагон кумаки моддиву молиявӣ расонида, барои табобати захмбардоштагон ва барқарор намудани хонаҳои зарардида тадбирҳои фаврӣ андешиданд.
Боиси хушнудӣ ва фараҳмандист, ки дар доираи омодагӣ ба сазовор ҷашн гирифтани 35- солагии Истиқлолияти давлатии Ҷумҳурии Тоҷикистон корҳои ободониву созандагӣ бомаром идома дорад.
Бо мақсади чунин корҳои ободонию созандагӣ санаи 29 июли соли равон бо иштироки муовини раиси вилояти Хатлон Қурбонзода Амирхон, раиси шаҳри Кӯлоб Назарзода Бахтиёр Худоёр, масъулони мақомоти иҷроияи ҳокимияти давлатии шаҳр дар доираи нақшаи чорабиниҳои ҷашнӣ нуқтаи фурӯши сӯзишвории рақами 57-и ҶДММ "Газпром нефт- Таджикистан" мавриди истифода қарор дода шуда, ба дастрасӣ ба сӯзишвории босифату тарзи хизматрасонии замонавӣ мусоидат менамояд.
Зимни ифтитоҳи нуқтаи фӯруши сӯзишворӣ ба роҳбарияти ҶДММ "Газпром нефт- Таджикистан" барои кушодани нуқтаи замонавии хизматрасонии мазкур аз тарафи роҳбарияти мақомоти иҷроияи ҳокимияти давлатии шаҳри Кӯлоб изҳори сипос баён гардид.
Бояд қайд намоем, ки ширкати мазкур аввалин маротиба нуқтаи сӯзишвории худро дар минтақаи Кӯлоб дар маҳаллаи Борбади шаҳри Кӯлоб соли 2021 таъсис дода, то ин давра фаъолият намуда барои ба талаботи станадартии бехатарӣ, ба роҳ мондани кору хизматрасонӣ нуқтаи фурӯши худро дар назди даромадгоҳи шаҳри Кӯлоб ифтитоҳ намуд.
Дар нуқтаи фурӯши сӯзишвории мазкур 20 нафар кормандон, аз ҷумла 4 нафар занону духтарон аз ҳисоби истиқоматкунандагони маҳалӣ ба кор ҷалб гардиданд.
Ёдовар мешавем, ки ҶДММ "Газпром нефт- Таджикистан" ягона ширкате мебошад, ки сӯзишвории дараҷаи "Эвро-5"-ро ба фурӯш мебарорад, ки аз ҷиҳати экологӣ ба талабот ҷавобгӯ буда, назорати сифати маҳсулот мунтазам аз ҷониби озмоишгоҳҳои ширкат гузаронида мешавад ва барои бо сифати хуб ба мизоҷон дастрас намудани сӯзишворӣ мусоидат менамояд.
Баъд аз боздид Раиси вилояти Хатлон муҳтарам Давлаталӣ Саид тибқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ва нақшаи Мақомоти иҷроияи ҳокимияти давлатии вилояти Хатлон дар толори маҷлисгоҳи мақомоти иҷроияи ҳокимияти давлатии шаҳри Кӯлоб, қабул ва муроҷиати шаҳрвандонро гузаронид.
Муроҷиати 17 нафар шаҳрвандони шаҳри Кӯлоб доир ба масъалаҳои расонидани кумаки молиявӣ ба оилаҳои ниёзманду фарзандони маъюбдошта, ҷудо кардани қитъаи замини наздиҳавлигӣ, кумак дар сохтмони манзили истиқоматӣ, қитъаи замин барои сохтмони мактаб, сохтмони бунгоҳи тиббӣ, тоза кардан ва мустаҳкам кардани канал ва соҳилҳои харобшуда, сохтмони пули харобгашта, иваз намудани симчӯбҳои фарсуда ва дигар масоили рӯзгор қабул карда шуд.
Раиси вилоят баъди муроҷиати шаҳрвандон ба масъулони вилоятиву шаҳрӣ барои иҷрои масъалаҳои зикршуда супориш доданд.
Дар ҷамъбасти вохӯрӣ Раиси вилоят бори дигар масъулонро вазифадор кард, ки ба соли нави таҳсил муассисаҳои таълимӣ пурра аз таъмир бароварда шуда, доир ба харидории сару либоси истеҳсоли ватанӣ ва сифати он аҳамияти ҷиддӣ диҳанд. Инчунин, омодагӣ ба даъвати навбатии хизмати ҳарбӣ, доир ба анҷом додани кишти такрорӣ, баланд бардоштани маданияти истифодабарии замин, ҷалби сармоя дар соҳаи саноатикунонӣ, вохӯрӣ ва ҷалби соҳибкорони ватанию хориҷӣ, омодагӣ ба зимистони пешомада дар соҳаи барқ ва интиқоли он, ба масъулон дастуру супориш доданд.
Субҳи 29 июли соли равон дар идомаи сафари корӣ ба шаҳру ноҳияҳои минтақаи Кӯлоб раиси вилояти Хатлон муҳтарам Давлаталӣ Саид ҷиҳати шиносоӣ аз рафти корҳои сохтмонӣ, созандагию бунёдкорӣ дар иншоотҳои сохташаванда бахшида ба ҷашни 35 - солагии Истиқлолияти давлатии Ҷумҳурии Тоҷикистон ва қабули муроҷиати шаҳрвандон ба шаҳри Кӯлоб ташриф овард.
Қобили зикр аст, дар ин чорабинӣ Раиси кумитаи телевизион ва радиои назди Ҳукумати Ҷумҳурии Тоҷикистон Нуриддин Саид, раиси шаҳри Кӯлоб Назарзода Бахтиёр ва дигар масъулони мақомоти иҷроияи ҳукумати вилоятиву шаҳрӣ иштирок доштанд.
Тибқи маълумот Телевизиони Кӯлоб соли 1992 таъсис ёфта, дар соли 2002 бо дастгирии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба узвияти Кумитаи телевизион ва радиои назди Ҳукумати Ҷумҳурии Тоҷикистон шомил гардонида шуд.
Иқдоми мазкур боис шуд, ки кормандони телевизиони Кӯлоб барои фатҳи қуллаҳои нав қадамҳои устувор гузоранд. Телевизион дар тӯли 31 соли фаъолияти худ ба пешрафту дастовардҳо ноил гардидааст.
Бо мақсади фаъолияти босамар ва вусъат ёфтани фазои иттилоотӣ дар шаҳру ноҳияҳои минтақаи Кӯлоб бо дастгирӣ ва маблағгузории Ҳукумати Ҷумҳурии Тоҷикистон дар арафаи истиқболи ҷашни 2700 –солагии Кӯлоб бинои Телевизиони Кӯлоб бо тарҳи замонавӣ сохта шуд.
Ҳамчунин, бо дастгирии Кумитаи телевизион ва радиои назди Ҳукумати Ҷумҳурии Тоҷикистон Телевизиони Кӯлоб бо таҷҳизотҳои муосир, аз он ҷумла, таҷҳизоти мавҷпахшкунандаи иқтидораш пурқувват ва нақлиёт таъмин гардид.
Теъдоди кормандони телевизион замони таъсисёбӣ ба 8 нафар, соли 2002 ба 30 нафар мерасид ва имрӯз шумораи онҳо ба 70 нафар мерасад. Ҳудуди шабонарӯзии пахши барномаҳои телевизион аз аввали соли 2014 тавассути таҷҳизоти рақамӣ дар шаҳру ноҳияҳои Кӯлоб ба 16 соат мерасад.
Айни замон 18 соат тавассути моҳвора пахш мегардад.
Тариқи телевизион барномаҳои гуногуни иттилоотӣ, сиёсӣ, иқтисодӣ, фарҳангӣ ва фароғатӣ таҳия ва омода мегардад. Фаъолияти ҳаррӯзаи телевизиони Кӯлоб аз рӯи нақшаи ҷадвали пахши барномаҳо ҷиҳати иҷрои дастуру супоришҳои Президенти Ҷумҳурии Точикистон, амалӣ гардидани самтҳои асосии Паёми Президенти Ҷумҳурии Тоҷикистон ба Маҷлиси Олӣ, иҷрои талаботҳои Қонуну қарорҳои амалкунанда ба роҳ монда шуда, дар тарғиби сиёсати имрӯзаи давлату Ҳукумати Тоҷикистон ва тарбияи маънавии аҳолӣ дар вилояти Хатлон нақши босазо дорад.
Раиси вилояти Хатлон Давлаталӣ Саид бо кормандони телевизион суҳбат намуда, аз вазъи корбурди пахши барномаҳои телевизион ва радиои маҳаллӣ шиносоӣ пайдо кард. Барои дар сатҳи баланд таҳия ва омода намудани пахши барномаҳо дастуру тавсияҳои муфид доданд.